Wahyu 5:8 - Perjanjian Baru Bahasa Melayu Maluku Utara

⁸ Waktu Anak Domba ambe kitab yang tagulung itu, ampa binatang yang luar biasa itu deng dua pulu ampa pemimpin itu berlutut semba pa Dia sampe dong pe muka kanal di tana. Dorang masing-masing ada pegang kecapi satu deng mangko mas satu. Mangko mas itu ada isi kemenyan yang kalu bakar dia pe bobou sadap. Bobou sadap itu pe arti, doa-doa dari orang-orang yang so jadi Tuhan Allah pe umat.

Wahyu 5:8 ပူးပေါင်းရင်းမြစ်များ

Yohanes 1:29

Dia pe beso, Yohanes lia Yesus sementara datang pa dia. Kong Yohanes bilang pa orang-orang yang ada di situ, “Coba ngoni lia, Dia yang datang kamari itu Tuhan Allah mo kase jadi korban, sama deng domba pe ana yang torang orang Israel biasa kase korban untuk hapus dosa.

Yohanes 5:23

Bapa kase tugas itu pa Dia pe Anak supaya samua orang hormati pa Bapa pe Anak sama deng dorang hormati pa Bapa. Sapa saja yang tara hormati pa Dia pe Anak, dia lagi tara hormati pa Bapa yang utus pa Dia pe Anak itu.

Ibrani 1:6

Deng waktu Tuhan Allah suru Dia pe Anak yang paling terhormat itu datang di dunia, Tuhan Allah bilang bagini, “Samua Kita pe malaekat musti semba pa Dia.”

Wahyu 13:8

Kong samua orang yang tinggal di bumi mo semba pa binatang itu. Orang-orang yang semba itu, dorang yang pe nama tara tatulis di Anak Domba pe buku kehidupan waktu dunia ini bolong jadi. Buku kehidupan itu, Anak Domba yang so perna dapa bunu pe buku. Di buku itu, Tuhan Allah tulis orang-orang pe nama yang mo dapa hidup deng Tuhan Allah slama-lamanya.

Wahyu 15:2

Turus, kita lia ada satu barang yang luas sama deng laut, dia pe jerni sama deng kaca yang kanal deng cahaya api. Kong ada banya orang yang badiri di dia pe pinggir. Dorang yang badiri itu orang-orang yang so kase kala pa binatang jahat, karna dorang tara semba dia pe patong deng tara tarima nomor dari binatang jahat itu. Dorang samua itu ada pegang Tuhan Allah pe alat musik kecapi.

Wahyu 15:7

Dari ampa binatang luar biasa, ada satu yang kase mangko mas tuju pa malaekat tuju itu. Mangko tuju itu ponong deng Tuhan Allah pe mara. Tuhan Allah itu suda yang hidup sampe slama-lamanya.

Wahyu 19:4

Kong dua pulu ampa pemimpin deng ampa binatang yang luar biasa itu berlutut semba pa Tuhan Allah yang dudu di kursi raja, kong dong bilang bagini, “Haleluya, puji pa Tuhan Allah! Amin.”

Wahyu 4:10

dua pulu ampa pemimpin itu berlutut semba pa Dia yang dudu di kursi raja itu. Dia itu yang hidup slama-lamanya. Kong waktu itu, dorang buka dong pe makota, turus dorang taru di muka kursi raja itu deng bilang bagini,

Wahyu 4:4

Ada lagi dua pulu ampa kursi raja laeng yang kuliling kursi raja itu. Di dua pulu ampa kursi raja itu, dua pulu ampa pemimpin ada dudu. Dorang pake baju puti kong di dorang pe kapala ada makota mas.

Wahyu 4:6

Deng di kursi raja itu pe muka ada barang satu, macam deng lautan kaca, dia jerni sama deng kristal. Ada ampa binatang luar biasa kuliling di kursi raja itu. Binatang ampa itu pe bagian muka deng balakang ponong deng mata.

Wahyu 4:8

Ampa binatang itu masing-masing pe sayap ada anam. Di sayap-sayap itu, dia pe bagian luar deng dalam ponong deng mata. Siang deng malam binatang-binatang itu tara perna berenti babilang bagini, “Suci, suci, Tuhan Allah itu paling suci suda! Dia Yang Paling Berkuasa. Dia yang dari dulu ada, yang skarang ada, deng yang nanti akan datang untuk slama-lamanya.”

Wahyu 5:11

Abis itu, kita lia deng dengar malaekat banya skali pe suara. Dorang itu pe banya deng ribu-ribu sampe juta-juta. Malaekat-malaekat itu badiri kuliling Tuhan Allah pe kursi raja itu, sama-sama deng ampa binatang luar biasa itu deng dua pulu ampa pemimpin.

Wahyu 5:12

Dorang manyanyi kuat-kuat bagini, “Dia ini Anak Domba yang so perna dapa bunu. Dia yang pantas tarima kuasa, kekayaan, deng pikiran bae untuk ator samua. Dia me pantas tarima kekuatan, puji deng hormat, deng Dia lagi luar biasa.”

Wahyu 5:14

Kong ampa binatang luar biasa itu sama-sama bilang, “Amin!” Turus, dua pulu ampa pemimpin itu berlutut semba pa Tuhan Allah sampe dong pe muka kanal di tana.

Wahyu 5:6

Abis itu, kita lia Anak Domba satu badiri di pinggir Tuhan Allah pe kursi raja. Kong ampa binatang luar biasa itu, deng samua dua pulu ampa pemimpin itu kuliling pa Dia. Anak Domba itu dapa lia sama deng so perna dapa bunu, tapi so hidup ulang. Dia pe tandu ada tuju deng mata tuju. Mata tuju itu pe arti, tuju Roh yang Tuhan Allah utus di seluru dunia ini.

Wahyu 6:1

Turus, kita lia Anak Domba buka segel yang pertama yang talém di kitab tagulung itu. Kong kita dengar binatang yang pertama dari ampa binatang luar biasa itu bicara kuat-kuat sama deng guntur pe babunyi. Dia bilang, “Mari suda!”