Wahyu 3:18 - Perjanjian Baru Bahasa Melayu Maluku Utara

¹⁸ Jadi Kita kase nasehat pa ngoni bagini: Kita so ada barang yang berharga sama deng mas yang dapa bakar di api supaya jadi murni, jadi ngoni musti bili suda supaya Kita lia ngoni butul-butul kaya pa Kita pe muka. Kita me ada baju puti bersi, ngoni musti bili kong pake la Kita lia ngoni tara talanjang lagi yang biking ngoni jadi malu. Kita me ada obat mata yang kase sembu mata. Jadi ngoni musti bili suda obat itu pa Kita la ngoni bisa lia butul-butul.

Wahyu 3:18 ပူးပေါင်းရင်းမြစ်များ

Matius 13:44

Yesus bilang lagi, “Kalu torang jadi Tuhan Allah pe umat yang Dia Berkuasa sebagai Raja, itu lebe berharga dari apa saja. Itu sama deng umpama ini: ada harta yang mahal skali yang so lama tasambunyi dalam tana di kobong. Satu hari, ada satu orang yang dapa harta yang mahal itu, kong dia tambung ulang deng tana. Orang itu sanang skali kong dia jual samua yang dia punya, turus dia pake doi itu untuk bili kobong yang ada tambung harta itu supaya jadi dia punya.”

Matius 25:9

Tapi nona-nona yang pande itu bilang bagini, ‘Torang tara bisa kase minya ini pa ngoni, barang nanti minya ini tara cukup untuk torang deng untuk ngoni. Lebe bae ngoni pigi bili di orang yang bajual minya.’

Lukas 12:21

Bagitu yang akan mo jadi pa orang yang cuma tau kumpul harta untuk dia pe diri sandiri saja. Dia tara peduli deng Tuhan Allah pe mau, dia itu sama deng orang yang tarada arti apa-apa pa Tuhan Allah pe muka.”

2 Korintus 5:3

Barang, deng torang dapa badan yang baru itu, itu sama deng tong kase lapas tong pe pakeang lama la pake pakeang baru, biar torang tara talanjang.

2 Korintus 8:9

Sebenarnya kita tara perlu suru ngoni bantu pa dorang, barang ngoni so tau Yesus Kristus torang pe Tuhan pe bae yang Dia so kase pa ngoni. Biar Dia punya samua-samua yang ada, tapi karna Dia sayang pa torang, Dia kase tinggal samua itu supaya jadi manusia yang tara punya apa-apa. Dia biking bagitu la torang dapa banya yang bae dari Tuhan Allah.

1 Timotius 6:18

Kase inga pa orang-orang kaya itu supaya dorang biking banya barang yang bae. Dorang musti suka kase pa orang-orang apa yang dorang perlu, deng apa yang ada pa dorang musti kase bage-bage pa orang-orang deng sanang hati.

Yakobus 2:5

Sudara-sudara yang kita sayang, dengar yang kita mo bilang ini: orang miskin yang ada di dunia ini, Tuhan Allah so pili pa dorang la butul-butul percaya pa Dia. Dorang itu yang mo jadi Tuhan Allah pe umat yang Dia Berkuasa sebagai Raja pa dorang pe hidup, sama deng yang Dia so janji pa samua orang yang sayang pa Dia.

1 Petrus 1:7

Sengsara yang ngoni dapa itu jadi bukti, ngoni butul-butul percaya pa Tuhan. Itu sama deng mas yang kalu mo tau dia pe asli musti bakar dulu deng api. Tapi ngoni pe percaya lebe berharga dari mas, karna mas itu tara akan ada turus-turus. Kalu ngoni so lolos dari cobaan itu, nanti di hari kiamat, waktu Yesus Kristus datang ulang, Dia mo puji deng hormat pa ngoni.

Wahyu 16:15

Tuhan bilang, “Perhatikan bae-bae, tarada yang tau tempo apa Kita mo datang ulang dari sorga. Kita datang tara sangka-sangka, sama deng papancuri datang. Orang yang salalu bajaga-jaga dalam dia pe hidup, dia itu paling sanang. Dia itu sama deng orang yang jaga perhatikan dia pe baju, supaya tara bajalang batalanjang deng tara malu di muka umum.”

Wahyu 19:8

Tuhan Allah so kase pa dia pakeang pengantin parampuang yang bagus warna puti mangkilat dari kaeng alus.” (Pakeang pengantin bagus itu, dia pe arti kalakuang yang butul yang orang-orang yang so jadi Tuhan Allah pe umat jaga biking).

Wahyu 2:9

Kita tau ngoni so dapa siksa, baru ngoni miskin lagi. Tapi Tuhan lia ngoni kaya karna ngoni percaya butul-butul pa Tuhan. Kita tau lagi tentang orang-orang Yahudi yang bilang kata, dorang Tuhan Allah pe umat yang Dia pili, padahal dorang pe kalakuang tara iko Tuhan Allah pe mau. Dorang bicara tara bae tentang ngoni. Dorang itu sama deng jemaat yang semba pa Iblis, setang-setang pe raja.

Wahyu 3:17

Ngoni bilang ngoni kaya, ngoni pe hidup lengkap, ngoni tara perlu apa-apa lagi! Padahal ngoni tara tau, pa Tuhan Allah pe muka, ngoni pe hati buta, miskin skali deng talanjang lagi. Kasiang skali ngoni!

Wahyu 4:4

Ada lagi dua pulu ampa kursi raja laeng yang kuliling kursi raja itu. Di dua pulu ampa kursi raja itu, dua pulu ampa pemimpin ada dudu. Dorang pake baju puti kong di dorang pe kapala ada makota mas.

Wahyu 7:13

Kong satu orang dari pemimpin-pemimpin itu batanya pa kita, “Orang-orang yang pake juba puti itu, ngana tau dorang itu sapa? Kong dorang itu dari mana?”