Wahyu 3:11 - Perjanjian Baru Bahasa Melayu Maluku Utara

¹¹ So tara lama lagi Kita mo datang. Jadi jaga turus ngoni pe percaya pa Tuhan Allah supaya hadia makota yang Dia mo kase pa ngoni itu tarada orang yang mo rampas.

Wahyu 3:11 ပူးပေါင်းရင်းမြစ်များ

1 Korintus 9:25

Samua orang yang iko lomba, kalu mau dapa hadia, dorang musti latihan bae-bae deng jaga diri bae-bae, biar hadia itu tara akan tahang sampe slama-lamanya. Tapi torang yang percaya pa Tuhan Yesus, torang nanti dapa hadia, kong hadia itu sampe slama-lamanya. Jadi, torang musti tahang diri.

Filipi 4:5

Kong biar suda samua orang bole lia ngoni pe kalakuang yang bae. Inga! So tara lama lagi Tuhan mo datang ulang.

2 Timotius 2:5

Kalu torang karja untuk Tuhan, torang musti iko Dia pe aturan-aturan sama deng orang yang iko lomba musti iko aturan-aturan lomba supaya dapa juara.

2 Timotius 4:8

Satu conto lagi, kalu orang iko lomba kong juara, dia dapa hadia. Bagitu lagi deng kita, Tuhan so kase sadia kita pe hadia karna Dia lia kita hidup butul pa Dia pe muka. Hadia itu Dia simpang kong nanti Dia mo kase pa kita di hari yang Dia mo adili pa samua orang deng adil. Hadia itu bukang cuma kita yang mo dapa, tapi samua orang yang percaya yang tunggu-tunggu Dia datang lagi, dorang me mo dapa.

Yakobus 1:12

Orang yang dapa cobaan kong batahang deng tetap percaya pa Tuhan, dia itu orang yang paling sanang. Karna kalu dia berhasil lolos dari samua cobaan itu, dia mo dapa hadia. Hadia itu, hidup deng Tuhan Allah slama-lamanya. Itu yang Tuhan Allah so janji mo kase pa orang-orang yang sayang pa Dia.

Yakobus 5:9

Sudara-sudara, jang ngoni mengelu deng baku tudu, supaya ngoni tara dapa hukum. Inga e, Tuhan so mo datang ulang. Dia sama deng hakim yang mo adili pa samua orang.

Wahyu 1:3

Orang yang baca apa yang so tatulis ini, dia itu paling sanang skali. Bagitu lagi deng orang-orang yang dengar kong biking apa yang tatulis ini. Dorang itu paling sanang skali, karna samua ini so tara lama mo jadi.

Wahyu 16:15

Tuhan bilang, “Perhatikan bae-bae, tarada yang tau tempo apa Kita mo datang ulang dari sorga. Kita datang tara sangka-sangka, sama deng papancuri datang. Orang yang salalu bajaga-jaga dalam dia pe hidup, dia itu paling sanang. Dia itu sama deng orang yang jaga perhatikan dia pe baju, supaya tara bajalang batalanjang deng tara malu di muka umum.”

Wahyu 2:10

Ngoni tara usa tako kalu nanti ngoni masi dapa siksa. Dengar bae-bae, nanti babarapa orang dari ngoni, Iblis mo coba, ngoni butul-butul percaya pa Kita ka tarada. Cobaan itu macam bagini, ngoni mo dapa maso di penjara kong dapa siksa di situ selama spulu hari. Tapi biar ngoni dapa siksa sampe mo mati me, ngoni musti tetap percaya pa Kita. Kalu ngoni tetap batahang percaya, Kita mo kase pa ngoni hidup deng Tuhan Allah slama-lamanya, itu sama deng ngoni dapa makota, tanda ngoni so menang.

Wahyu 2:13

Kita tau ngoni pe tampa tinggal. Ngoni tinggal di kota Pergamus, memang kota yang Iblis, setang-setang pe raja pe tampa berkuasa. Tapi biar bagitu, ngoni percaya turus pa Kita. Tempo hari, ada orang yang dia pe nama Antipas, Kita pe saksi yang setia, dia kase tau Tuhan Allah pe pasáng, kong dong bunu pa dia. Tapi biar dorang bunu pa dia di ngoni pe tenga-tenga, ngoni percaya turus pa Kita, ngoni tara manyangkal pa Kita.

Wahyu 2:25

Tapi ajaran yang ngoni so percaya itu, pegang deng iko turus sampe Kita datang ulang.

Wahyu 22:12

Abis itu Yesus bilang, “Inga bae-bae! So tara lama lagi Kita akan datang ulang di dunia ini. Kita datang untuk balas pa orang-orang iko deng apa yang dorang biking.

Wahyu 22:20

Yesus yang so kase tau pa kita tentang samua pasáng itu, Dia bilang bagini, “Butul, so tara lama lagi Kita akan datang!” Karna itu kita bilang, “Amin. Datang suda Tuhan Yesus!”

Wahyu 22:7

Abis itu, Yesus bilang bagini, “Inga e! Tara lama lagi Kita akan datang ulang. Jadi orang yang iko Tuhan pe pasáng di kitab ini, dorang itu paling sanang.”

Wahyu 3:3

Karna itu, ngoni inga suda turus ajaran yang ngoni so dengar deng tarima itu waktu ngoni baru percaya pa Kita. Ngoni musti iko ajaran itu deng bertobat suda. Kalu ngoni tara bertobat, Kita mo datang hukum pa ngoni. Kita mo datang kage-kage sama deng papancuri, deng ngoni tara tau tempo apa Kita datang.

Wahyu 4:10

dua pulu ampa pemimpin itu berlutut semba pa Dia yang dudu di kursi raja itu. Dia itu yang hidup slama-lamanya. Kong waktu itu, dorang buka dong pe makota, turus dorang taru di muka kursi raja itu deng bilang bagini,

Wahyu 4:4

Ada lagi dua pulu ampa kursi raja laeng yang kuliling kursi raja itu. Di dua pulu ampa kursi raja itu, dua pulu ampa pemimpin ada dudu. Dorang pake baju puti kong di dorang pe kapala ada makota mas.