Wahyu 21:6 - Perjanjian Baru Bahasa Melayu Maluku Utara

⁶ Dia bilang lagi pa kita, “Samua itu so selesai. Kita ini Alfa deng Omega, yang pe arti, mulai dari pertama dunia ini bolong ada, Kita so ada, deng sampe dunia abis, Kita tetap ada. Sapa yang aus, Kita mo kase aer minum deng cuma-cuma pa dia. Aer itu dari mata aer yang biking orang hidup deng Tuhan Allah slama-lamanya.

Wahyu 21:6 ပူးပေါင်းရင်းမြစ်များ

Yohanes 4:10

Turus Yesus bilang pa dia, “Kalu ibu tau sapa sebenarnya yang minta minum pa ibu, deng pe bagus apa itu yang Tuhan Allah mo kase pa ibu, pasti ibu yang mo bale minta minum pa Kita kong Kita mo kase aer yang bisa biking manusia hidup.”

Yohanes 4:11

Turus parampuang itu bilang, “Bapa, parigi ini dolom skali, baru Bapa tarada timba. Dari mana Bapa mo dapa aer hidup itu kong?

Yohanes 4:14

Tapi sapa saja yang minum aer yang Kita mo kase, dia tara akan aus lagi untuk slama-lamanya. Lebe-lebe lagi aer yang Kita mo kase pa dia, nanti mo jadi sama deng mata aer di dia pe dalam diri yang tara mo berenti-berenti, sampe dia bole dapa hidup deng Tuhan Allah slama-lamanya.”

Roma 3:24

Deng karna Tuhan Allah pe bae yang Dia kase deng cuma-cuma bole biking torang jadi orang yang tara sala pa Dia pe muka, karna torang so percaya pa Kristus Yesus yang so tebus manusia pe dosa-dosa.

Roma 8:32

Dia pe Anak sandiri saja Dia tara tahang-tahang, tapi Dia kase sampe mati di kayu salib supaya tebus torang pe dosa. Karna itu, torang jadi tau, apa saja yang bae untuk torang, pasti Dia kase.

1 Korintus 2:12

Kong torang, torang tara tarima roh yang dari dunia ini, tapi torang tarima Roh Kudus yang dari Tuhan Allah, supaya torang tau samua yang Tuhan Allah so kase pa torang deng cuma-cuma.

1 Korintus 3:12

Kalu orang biking bagus dia pe karja yang Tuhan Allah kase pa dia, dia sama deng tukang bangunan yang pake bahan yang bagus, macam deng mas, perak, atau permata, la bangun ruma di atas fandasi itu. Tapi kalu dia biking dia pe karja tara bagus, dia sama deng tukang bangunan yang pake bahan yang tara bagus, macam deng kayu lombo, rumpu kiring, atau kusu-kusu.

1 Korintus 3:21

Karna itu, kita minta pa ngoni sudara-sudara: jang ngoni basombong karna ngoni iko pa pemimpin yang satu, kong pandang enteng pa pemimpin yang laeng. Barang, samua yang Tuhan kase pa ngoni itu untuk ngoni pe bae.

1 Korintus 3:5

Jang ngoni anggap kita deng Apolos orang penting. Torang dua ini cuma orang-orang yang jaga biking apa yang Tuhan suru. Torang kase tau Kabar Bae tentang Yesus Kristus pa ngoni sampe ngoni jadi percaya. Torang cuma biking tugas yang Tuhan kase pa torang masing-masing.

Wahyu 1:11

Suara itu bilang pa kita bagini, “Yohanes, tulis suda samua yang Kita mo kase tunju pa ngana ini di satu kitab, kong kirim di tuju jemaat ini: jemaat di kota Efesus, kota Smirna, kota Pergamus, kota Tiatira, kota Sardis, kota Filadelfia deng di kota Laodikia.”

Wahyu 1:17

Waktu kita lia pa Dia, kita jatu di tana pas pa Dia pe kaki, sama deng orang mati. Tapi Dia taru Dia pe tangan kanan pa kita deng bilang bagini, “Yohanes, jang ngana tako! Kita ini so ada dari pertama waktu dunia bolong ada, deng tetap ada lagi sampe ahir jaman.

Wahyu 1:8

Tuhan Allah bilang bagini, “Kita ini, Alfa deng Omega, yang pe arti, mulai dari pertama dunia ini bolong ada, Kita so ada, kong Kita so ada skarang, deng sampe dunia abis, Kita tetap ada. Kita Yang Paling Berkuasa.”

Wahyu 10:6

Malaekat itu basumpa demi Tuhan Allah yang hidup slama-lamanya, deng yang so biking sorga deng dia pe isi, bumi deng dia pe isi, laut deng dia pe isi. Malaekat itu bilang bagini, “Tuhan Allah so tara tunda-tunda lagi. Apa yang Dia so bilang itu so mo jadi!

Wahyu 16:17

Abis itu, malaekat yang ketuju buang mangko yang dia pegang itu pe isi di udara. Kong dapa dengar suara dari kursi raja yang ada di dalam Tuhan Allah pe Ruma di sorga, yang bilang bagini, “Samua Kita pe hukuman ini so abis, Kita so tara mara lagi.”

Wahyu 22:13

Kita ini Alfa deng Omega, yang pe arti, mulai dari pertama dunia ini bolong ada, Kita so ada, deng sampe dunia abis, Kita tetap ada.”

Wahyu 22:17

Kong Tuhan Allah pe Roh deng pengantin parampuang itu bilang, “Mari suda!” Sapa saja yang dengar itu, lebe bae dia bilang, “Mari suda!” Sapa yang aus, lebe bae dia datang. Deng sapa yang mau minum, lebe bae dia ambe aer deng cuma-cuma, aer yang biking orang hidup deng Tuhan Allah slama-lamanya.

Wahyu 3:14

Anak Manusia yang dari sorga bilang lagi pa kita, “Yohanes, tulis suda untuk malaekat yang jaga pa jemaat di kota Laodikia. Ngana tulis bagini: Ini pasáng dari yang pe nama Amin, yang pe arti, Yang Butul, deng yang setia kase tau samua tentang Tuhan Allah, deng samua yang Dia bilang itu butul. Kong Tuhan Allah pake pa Dia untuk biking samua-samua yang ada di dunia ini:

Wahyu 7:17

Karna Anak Domba yang ada di tenga-tenga kursi raja pe muka itu, Dia mo jadi dorang pe Gembala. Dia mo bawa pa dorang minum di mata aer yang biking dorang hidup, kong Tuhan Allah mo hapus dorang samua pe aer mata.”