Wahyu 16:14 - Perjanjian Baru Bahasa Melayu Maluku Utara

¹⁴ Itu suda tiga setang yang jaga biking mujizat yang biking orang herang. Dorang pigi cari pa raja-raja di seluru dunia, kong kumpul pa dorang la baku prang lawan pa Tuhan Allah Yang Paling Berkuasa. Prang itu nanti jadi di hari basar, hari yang Tuhan Allah Yang Paling Berkuasa so tentukan mo kase kala Dia pe musu-musu.

Wahyu 16:14 ပူးပေါင်းရင်းမြစ်များ

Matius 24:14

Kong nanti Kabar Bae tentang Tuhan Allah Berkuasa sebagai Raja akan tasiar di seluru dunia la samua suku dapa kesempatan untuk tarima Kabar Bae itu. Abis itu, baru dunia mo kiamat.”

Matius 24:24

Karna nanti ada banya orang datang bilang kata, dorang Mesias, atau bilang kata, dorang nabi yang kase turus Tuhan Allah pe pasáng. Deng dorang me biking mujizat-mujizat deng tanda-tanda yang kase tunju dong pe kuasa yang hebat, supaya orang percaya pa dorang kong jang percaya pa Tuhan yang butul lagi. Deng kalu bisa, dorang me mo biking sesat pa orang-orang yang Tuhan Allah so pili.

Markus 13:22

Karna nanti ada banya orang datang bilang kata, dorang Mesias, atau bilang kata, dorang nabi yang kase turus Tuhan Allah pe pasáng. Deng dorang me biking mujizat-mujizat deng tanda-tanda yang kase tunju dong pe kuasa supaya orang percaya pa dorang kong jang percaya pa Tuhan yang butul lagi. Deng kalu bisa, dorang me mo biking sesat pa orang-orang yang Tuhan Allah so pili.

Lukas 2:1

Waktu itu, ada raja basar Roma, dia pe nama Agustus. Dia kase kaluar parenta pa samua daera di dunia yang dia kuasai, supaya kase daftar samua orang pe nama.

Yohanes 8:44

Ngoni pe papa itu Iblis, setang-setang pe raja, barang ngoni suka biking ngoni pe papa itu pe mau. Iblis itu, dari dulu sampe skarang ini, dia pangbunu orang. Dia tara tau biking yang butul, karna pa dia itu tara ada yang butul. Waktu dia bafoya, dia bilang itu memang dari dia pe sifat sandiri, karna dia itu pangbafoya, kong dia itu samua pangbafoya pe papa.

Roma 1:8

Pertama, kita bilang tarimakasi pa Tuhan Allah karna ngoni orang-orang percaya di kota Roma. Barang ngoni pe percaya pa Yesus Kristus so kuat, sampe orang di seluru dunia so dengar tentang ngoni pe percaya itu.

2 Tesalonika 2:9

Tapi waktu Tuhan Yesus bolong datang, orang jahat itu mo muncul deng kuasa dari Iblis, setang-setang pe raja, la biking mujizat-mujizat deng tanda-tanda, supaya biking orang herang sampe tipu pa dorang la dorang kira kata, dia itu pake Tuhan Allah pe kuasa.

1 Timotius 4:1

Roh Kudus so bilang deng jelas, nanti dekat-dekat hari kiamat, ada orang percaya yang akan kase tinggal lagi dorang pe percaya pa Tuhan Allah, kong taiko pa setang-setang yang jaga kase sesat pa manusia. Dorang itu cuma mo iko setang-setang pe ajaran.

Yakobus 3:15

Kalu ngoni pe pande cuma itu, itu bukang pande yang dari Tuhan, tapi dari dunia ini, dari manusia pe keinginan yang tara bae deng dari setang-setang pe mau.

1 Yohanes 5:19

Biar Iblis kuasai seluru dunia ini, torang tau, torang ini Tuhan Allah pe ana-ana.

Wahyu 12:9

Naga basar itu, setang-setang pe raja yang dong jaga bilang ‘Iblis’. Naga itu yang dari dulu salalu kase sesat orang-orang di seluru dunia ini. Dia deng malaekat-malaekat yang iko pa dia, samua dapa buang dari sorga di bumi.

Wahyu 13:3

Di binatang itu pe kapala satu, ada bakas luka. Luka itu bisa kase mati pa dia, tapi luka itu so sembu. Karna itu, samua orang di dunia herang skali lia pa binatang itu, kong iko pa dia.

Wahyu 16:16

Kong tiga setang itu bakumpul pa raja-raja di satu tampa, di tampa yang dalam bahasa Ibrani dapa sebut, Harmagedon.

Wahyu 16:7

Kong kita dengar suara dari tampa bakar korban persembahan, bilang bagini, “Ya Tuhan, Tuhan Allah Yang Paling Berkuasa. Hukuman yang Tuhan kase itu samua adil deng butul!”

Wahyu 17:14

Dorang mo baku prang deng Anak Domba. Tapi Anak Domba itu sama-sama deng Dia pe umat mo kase kala pa dorang, karna Anak Domba itu, Tuhan dari samua tuhan, deng Raja dari samua raja. Kong orang-orang yang sama-sama deng Anak Domba, dorang itu yang Tuhan so pangge, so pili deng yang setia pa Dia.”

Wahyu 20:8

Bagitu Iblis so bebas, dia mo pigi kase sesat pa orang-orang dari samua suku bangsa di dunia ini yang ada di mana-mana. Suku-suku bangsa itu yang dong sebut Gog deng Magog. Iblis mo kumpul pa dorang la baku prang. Dorang itu banya skali sama deng paser di pante.

Wahyu 3:10

Ngoni tetap batahang percaya pa Kita biar ngoni dapa siksa, kong deng bagitu ngoni so biking Kita pe parenta. Karna itu, nanti Kita mo jaga pa ngoni supaya ngoni tara dapa siksa yang hebat yang nanti mo jadi untuk samua orang di dunia ini. Siksa itu untuk uji samua orang di dunia ini la dapa tau sapa orang-orang yang butul-butul percaya pa Tuhan Allah.

Wahyu 6:17

Barang, waktu yang Tuhan Allah deng Anak Domba mo adili samua orang so sampe, kong tarada satu orang yang bisa tahang mo mangada hukuman yang barát itu.