Wahyu 14:4 - Perjanjian Baru Bahasa Melayu Maluku Utara

⁴ Dorang itu pe hidup bersi pa Tuhan Allah pe muka, itu sama deng laki-laki yang tara perna tidor deng parampuang. Dorang itu jaga iko pa Anak Domba itu di mana saja Dia pigi. Tuhan Allah so tebus pa dorang kamuka dari samua orang, jadi dorang itu so jadi sama deng korban persembahan yang pertama untuk Tuhan Allah deng Anak Domba.

Wahyu 14:4 ပူးပေါင်းရင်းမြစ်များ

Matius 19:12

Barang, ada laki-laki yang tara kawing karna dari lahir so memang bagitu. Kong ada lagi laki-laki yang tara kawing karna orang laeng biking sampe dia tara bisa kawing. Ada lagi yang tara kawing karna dong pe mau sandiri, supaya dorang bisa pake dong pe waktu untuk layani pa Tuhan Allah yang Berkuasa sebagai Raja. Sapa yang mampo tarima Kita pe ajaran ini, dia tarima suda.”

Matius 25:1

Yesus bilang lagi, “Nanti kalu Anak Manusia yang dari sorga datang ulang kong Berkuasa sebagai Raja, itu pe keadaan bole kase sama deng umpama ini: ada nona-nona spulu orang yang bawa lentera untuk sambut pengantin laki-laki.

Matius 8:19

Kong ada satu guru agama yang ahli lima kitab Musa datang pa Yesus. Dia bilang bagini, “Guru, kita mo iko sama-sama deng Guru ka mana saja Guru mo pigi.”

Yohanes 10:27

Barang, Kita pe umat dengar Kita pe suara kong Kita kanal pa dorang, turus dong iko pa Kita, sama deng domba iko dia pe gembala.

Yohanes 12:26

Sapa yang suka biking apa yang Kita suru, dia musti iko pa Kita, kong di mana saja Kita ada, dia lagi musti ada di situ. Kong sapa yang biking apa yang Kita suru, Kita pe Bapa akan hormati pa dia.”

Yohanes 13:37

Petrus bilang pa Yesus, “Tuhan, bikiapa kong skarang kita bolong bole mo iko pa Tuhan? Kita so siap mati untuk Tuhan.”

Yohanes 8:12

Yesus kase turus Dia pe bicara pa orang banya yang masi ada di situ bagini, “Kita ini tarang dunia yang kase tarang manusia pe hati. Sapa saja yang iko pa Kita, dia itu tara akan hidup dalam galap, tapi dia akan hidup di dalam tarang, yang biking dia dapa hidup deng Tuhan Allah slama-lamanya.”

Kisah Para Rasul 20:28

Karna itu sudara-sudara, ngoni musti jaga bae-bae ngoni pe diri, deng jemaat yang Roh Kudus so kase pa ngoni untuk ngoni jaga. Ngoni jaga Tuhan Allah pe jemaat sama deng gembala yang jaga dia pe domba. Jemaat-jemaat itu so jadi Tuhan Allah punya, barang Dia pe Anak Yesus so mati di kayu salib untuk tebus pa torang.

1 Korintus 16:15

Sudara-sudara, ngoni pasti so tau, Stefanus deng dia pe keluarga yang kakamuka percaya pa Yesus Kristus di daera Akhaya. Kong ngoni me tau lagi, dorang yang kase dong pe diri deng sunggu-sunggu untuk layani pa orang-orang yang so jadi Tuhan pe umat. Karna itu, kita minta pa ngoni,

1 Korintus 6:20

Barang, waktu Tuhan Yesus mati untuk tebus ngoni pe dosa, itu pe arti, Dia so bili pa ngoni untuk jadi Dia pe umat. Jadi, ngoni musti pake ngoni pe badan untuk biking apa yang bae, supaya Tuhan Allah dapa puji deng hormat.

1 Korintus 7:28

Tapi kalu nyong-nyong kawing, dia tara biking dosa. Bagitu lagi, kalu nona-nona kawing, dia tara biking dosa. Tapi untuk orang-orang yang so kawing, dong mo dapa banya sengsara di dunia ini, deng kita tara mau ngoni dapa sengsara macam bagitu.

2 Korintus 11:2

Kita jaga bae-bae pa ngoni sama deng Tuhan Allah sandiri jaga pa ngoni, jang sampe ada yang ganggu ngoni pe percaya pa Yesus Kristus. Kita sama deng papa satu yang so janji mo kase kawing dia pe ana parampuang deng laki-laki satu, jadi papa itu jaga turus pa ana parampuang itu supaya dia tetap bersi sampe dia kawing deng dia pe calon kawing.

Efesus 1:14

Roh Kudus itu jadi tanda, torang akan dapa samua hal yang Tuhan Allah janji untuk torang, karna torang ini yang so jadi Tuhan Allah punya. Dia so kase janji itu pas di waktu yang Dia so tentukan untuk kase bebas pa torang dari samua-samua yang jahat. Karna itu, mari suda torang puji pa Tuhan Allah yang hebat itu.

Efesus 5:27

Jadi, torang yang so jadi Dia pe jemaat bole jadi Tuhan pe umat yang bersi dari dosa, kong tarada orang yang mo kase sala pa torang. Torang tarada dosa apa-apa sampe waktu Tuhan Yesus datang ulang jemput pa torang, jadi torang bole badiri pa Dia pe muka.

1 Timotius 4:3

Dorang kase ajar kata, orang tara bole kawing, deng tara bole makang makanang yang dorang bilang haram. Padahal, Tuhan Allah so biking samua makanang la torang makang. Jadi kalu torang yang percaya yang iko ajaran yang butul itu mo makang, bole, asal makang deng bilang tarimakasi pa Tuhan Allah.

Ibrani 12:23

Di sana ngoni me baku dapa deng orang-orang yang percaya pa Tuhan Allah yang ada bakumpul, dorang itu Dia sebut Dia pe ana-ana yang tua, dorang itu pe nama-nama so tatulis di sorga. Di sana ngoni me baku dapa deng Tuhan Allah, Dia yang mo adili pa samua orang. Ngoni me baku dapa deng orang-orang yang so mati kamuka, yang waktu dong masi hidup, dong jaga biking yang butul pa Tuhan Allah pe muka, kong dorang itu Tuhan Allah so biking dorang jadi sempurna.

Yakobus 1:18

Tuhan Allah biking torang jadi Dia pe ana-ana itu iko Dia pe mau sandiri, karna torang percaya Dia pe ajaran yang butul. Dia biking torang jadi Dia pe ana-ana supaya torang jadi yang paling penting dari samua yang Dia cipta.

1 Petrus 2:9

Tapi ngoni ini suda yang Tuhan Allah so pili jadi Dia pe umat, kong biking ngoni jadi sama deng imam yang jaga layani pa Dia yang jadi torang pe Raja. Dia kase pisa pa ngoni dari samua orang untuk jadi Dia pe umat sandiri, kong ngoni jadi Dia pe rakyat yang pe hati bersi pa Dia pe muka. Ngoni jadi bagitu, supaya ngoni bole kase tau pa orang-orang hal-hal luar biasa yang Dia so biking. Dia itu suda yang so pangge pa ngoni kaluar dari galap, maso pa Dia pe tarang yang luar biasa.

Wahyu 17:14

Dorang mo baku prang deng Anak Domba. Tapi Anak Domba itu sama-sama deng Dia pe umat mo kase kala pa dorang, karna Anak Domba itu, Tuhan dari samua tuhan, deng Raja dari samua raja. Kong orang-orang yang sama-sama deng Anak Domba, dorang itu yang Tuhan so pangge, so pili deng yang setia pa Dia.”

Wahyu 21:22

Tapi kita tara lia ruma ibada di dalam kota itu. Barang, ruma ibada itu, itu Tuhan Allah suda, Tuhan Allah Yang Paling Berkuasa, deng itu lagi Anak Domba.

Wahyu 21:23

Kota itu tara perlu sinar matahari deng bulan untuk kase tarang, karna Tuhan Allah pe cahaya yang luar biasa yang kase tarang kota itu, deng Anak Domba itu yang so jadi sama deng lampu yang manyala.

Wahyu 3:4

Tapi ada babarapa orang di Sardis yang dorang pe hidup bersi pa Tuhan Allah pe muka, dorang itu sama deng orang yang jaga dong pe baju la jang kotor. Kong dorang itu nanti akan bajalang sama-sama deng Kita pake baju puti, karna dorang memang pantas bajalang sama-sama deng Kita.

Wahyu 5:9

Kong dorang manyanyi puji pa Anak Domba itu deng lagu baru bagini: “Anak Domba ini yang pantas tarima kitab tagulung itu, deng yang pantas buka tuju segel yang talém di kitab itu. Barang, Anak Domba ini so perna dapa bunu, kong Dia pe dara so tatumpa untuk hapus orang-orang pe dosa dari tiap fam, suku, bahasa deng bangsa supaya dorang jadi Dia pe umat.