Wahyu 14:2 - Perjanjian Baru Bahasa Melayu Maluku Utara

² Turus kita dengar ada suara dari sorga. Suara itu kuat skali, sama deng aer terjun basar deng guntur pe babunyi. Tapi suara itu bagus skali, sama deng alat musik kecapi yang banya, kong ada banya orang yang bakuti.

Wahyu 14:2 ပူးပေါင်းရင်းမြစ်များ

1 Korintus 13:1

Biar lagi Roh Kudus kase pa kita karunia sampe kita bisa bicara deng macam-macam bahasa yang manusia jaga pake, deng bahasa yang malaekat jaga pake lagi, tapi kalu kita tara sayang pa orang laeng, yang kita bicara itu tarada dia pe guna. Itu kita cuma baribut, sama deng orang yang pake gong deng ceker kong kase babunyi sabarang-sabarang.

Wahyu 1:10

Satu kali bagini, pas hari sambayang, Tuhan pe Roh kuasai pa kita. Turus, kita dapa dengar suara yang kuat skali dari kita pe balakang. Suara itu pe bunyi sama deng trompet pe babunyi.

Wahyu 1:15

Dia pe kaki, mera mangkilat sama deng tembaga yang orang bakar di api. Dia pe suara, sama deng aer terjun basar pe babunyi.

Wahyu 11:12

Dua orang itu dapa dengar suara dari sorga kuat skali yang bilang pa dorang bagini, “Ngoni dua nae kamari!” Turus dorang dua nae pigi di sorga. Sementara dorang dua nae, awan bungkus pa dorang. Waktu itu, dorang pe musu-musu lia-lia dorang nae.

Wahyu 11:15

Malaekat yang ketuju tiop dia pe trompet, turus kita dengar banya suara yang kuat skali dari sorga bilang bagini, “Skarang yang berkuasa di dunia cuma torang pe Tuhan Allah deng Yesus Kristus, Raja yang Tuhan Allah pili untuk kase slamat pa manusia. Dia itu akan Berkuasa sebagai Raja sampe slama-lamanya.”

Wahyu 15:2

Turus, kita lia ada satu barang yang luas sama deng laut, dia pe jerni sama deng kaca yang kanal deng cahaya api. Kong ada banya orang yang badiri di dia pe pinggir. Dorang yang badiri itu orang-orang yang so kase kala pa binatang jahat, karna dorang tara semba dia pe patong deng tara tarima nomor dari binatang jahat itu. Dorang samua itu ada pegang Tuhan Allah pe alat musik kecapi.

Wahyu 18:22

Di kota itu so tarada lagi orang yang akan maeng musik pake kecapi, suling deng trompet. Deng so tara akan dengar lagi orang manyanyi di situ. Tarada lagi tukang yang karja di dia pe tampa karja lagi. Tarada lagi orang yang bagiling gandum di kota itu.

Wahyu 5:8

Waktu Anak Domba ambe kitab yang tagulung itu, ampa binatang yang luar biasa itu deng dua pulu ampa pemimpin itu berlutut semba pa Dia sampe dong pe muka kanal di tana. Dorang masing-masing ada pegang kecapi satu deng mangko mas satu. Mangko mas itu ada isi kemenyan yang kalu bakar dia pe bobou sadap. Bobou sadap itu pe arti, doa-doa dari orang-orang yang so jadi Tuhan Allah pe umat.

Wahyu 6:1

Turus, kita lia Anak Domba buka segel yang pertama yang talém di kitab tagulung itu. Kong kita dengar binatang yang pertama dari ampa binatang luar biasa itu bicara kuat-kuat sama deng guntur pe babunyi. Dia bilang, “Mari suda!”

Wahyu 8:7

Waktu malaekat yang pertama tiop dia pe trompet, ujang es deng api yang bacampur deng dara turung di bumi. Samua rumpu iko tabakar. Kalu mo bagi dunia ini jadi tiga bagian, yang tabakar itu satu bagian. Deng kalu mo bagi samua pohong di dunia ini jadi tiga bagian, yang tabakar itu satu bagian.