Wahyu 14:13 - Perjanjian Baru Bahasa Melayu Maluku Utara

¹³ Kong kita dengar suara dari sorga bilang bagini, “Yohanes, tulis ini: mulai skarang, orang-orang yang mati karna percaya pa Tuhan, dorang itu paling sanang suda!” Kong Tuhan Allah pe Roh bilang bagini, “Butul, butul dorang itu paling sanang suda! Dorang akan istrahat dari dong pe karja karas, jadi Tuhan akan balas dong pe lala itu deng apa yang bae di sorga.”

Wahyu 14:13 ပူးပေါင်းရင်းမြစ်များ

Matius 3:17

Kong dapa dengar Tuhan Allah pe suara dari sorga bagini, “Ini Kita pe Anak, Kita paling sayang pa Dia. Dia yang biking Kita pe hati sanang.”

Lukas 16:25

Tapi Abraham bilang bagini, ‘Ana e, inga dulu waktu ngana masi hidup di dunia, ngana so dapa samua yang bae. Tapi kasiang Lazarus, selama hidup, dia cuma dapa samua yang tara bae saja. Jadi skarang dia dapa sanang di sini, kong ngana dapa sengsara.

Lukas 16:9

Jadi ini yang Kita mo bilang pa ngoni: pake ngoni pe harta dunia untuk tolong orang supaya bole dapa banya tamang. Jadi kalu ngoni pe harta so abis, ngoni nanti mo dapa tarima di ngoni pe tampa tinggal di sorga.

Roma 14:8

Karna torang hidup, torang hidup untuk Tuhan, deng torang mati, torang mati untuk Tuhan. Jadi torang hidup ka mati ka, torang ini Tuhan punya.

1 Korintus 15:18

Bagitu lagi orang yang percaya pa Yesus Kristus yang so mati, dorang pe dosa me tara dapa ampun kong dorang mo dapa hukum.

1 Korintus 15:20

Tapi yang butul itu bagini: Yesus Kristus mati kong Tuhan Allah so kase hidup ulang pa Dia. Dia itu yang pertama hidup ulang, kong nanti orang-orang percaya yang so mati me, dorang lagi akan hidup ulang.

1 Korintus 15:58

Jadi sudara-sudara yang kita sayang, ngoni pe percaya musti tetap kuat. Jang kase biar ada yang pengaru pa ngoni sampe ngoni ragu deng ngoni pe percaya itu. Ngoni karja turus untuk Tuhan butul-butul, karna ngoni tau, apa yang ngoni biking untuk Tuhan itu tara akan parcuma.

2 Korintus 5:8

Jadi torang pe hati tetap kuat, kong torang lebe suka kase tinggal tong pe badan di dunia ini, la tinggal deng Tuhan di sorga.

Filipi 2:17

Dulu waktu pertama kita kase tau Kabar Bae tentang Yesus Kristus pa ngoni, ngoni jadi percaya deng ngoni kase ngoni pe diri untuk biking Dia pe mau. Jadi biar lagi orang mo bunu pa kita nanti gara-gara kita so kase tau Kabar Bae, itu tara apa-apa. Barang, itu sama deng kita pe dara so tatumpa untuk jadi korban persembahan pa Tuhan Allah. Jadi biar kita pe dara tatumpa sampe mati, kita pe hati tetap sanang deng kita rasa sanang sama-sama deng ngoni samua.

1 Tesalonika 4:14

Torang percaya Tuhan Yesus mati kong Tuhan Allah so kase hidup ulang pa Dia. Jadi torang me percaya, kalu orang-orang yang percaya pa Yesus mati, pasti Tuhan Allah mo kase hidup ulang pa dorang, kong mo bawa pa dorang sama-sama deng Dia.

1 Tesalonika 4:16

Kalu Tuhan Yesus so mo datang dari sorga, nanti ada parenta satu dari sorga bilang deng suara yang kuat skali, malaekat pe pemimpin mo bicara kuat, kong Tuhan Allah pe trompet mo babunyi. Waktu itu, Yesus Kristus sandiri mo turung dari sorga kong orang-orang mati yang percaya pa Dia nanti mo kamuka hidup ulang.

1 Tesalonika 5:10

Yesus Kristus so mati untuk torang samua, supaya torang dapa hidup sama-sama deng Dia nanti waktu Dia datang ulang. Kong tara jadi masala kalu waktu itu torang masi hidup atau so mati.

1 Timotius 5:24

Ada orang yang biking dosa kantara skali. Biar Tuhan bolong adili pa dorang, orang-orang so tau dong pe dosa. Ada laeng yang biking dosa tapi bolong kantara. Nanti satu waktu baru dapa tau dorang pe sala.

1 Timotius 5:25

Bagitu lagi deng orang yang biking yang bae. Yang laeng dia pe bae kantara skali, tapi yang laeng dia pe bae bolong kantara. Nanti satu waktu baru orang-orang mo dapa tau.

Wahyu 1:11

Suara itu bilang pa kita bagini, “Yohanes, tulis suda samua yang Kita mo kase tunju pa ngana ini di satu kitab, kong kirim di tuju jemaat ini: jemaat di kota Efesus, kota Smirna, kota Pergamus, kota Tiatira, kota Sardis, kota Filadelfia deng di kota Laodikia.”

Wahyu 10:4

Abis tuju guntur itu bicara, kita mo tulis apa yang guntur bilang, cuma kita dengar suara dari sorga yang bilang bagini, “Jang dulu ngana tulis itu! Jang dulu ngana kase tau pa sapa-sapa apa yang tuju guntur itu bilang.”

Wahyu 11:15

Malaekat yang ketuju tiop dia pe trompet, turus kita dengar banya suara yang kuat skali dari sorga bilang bagini, “Skarang yang berkuasa di dunia cuma torang pe Tuhan Allah deng Yesus Kristus, Raja yang Tuhan Allah pili untuk kase slamat pa manusia. Dia itu akan Berkuasa sebagai Raja sampe slama-lamanya.”

Wahyu 11:19

Abis itu, kita dapa lia Tuhan Allah pe Ruma di sorga tabuka, kong di dalam itu kita dapa lia Tuhan Allah pe Kotak Perjanjian. Turus ada kilat deng guntur babunyi, tana goyang yang kuat, deng ujang es yang karas skali.

Wahyu 16:17

Abis itu, malaekat yang ketuju buang mangko yang dia pegang itu pe isi di udara. Kong dapa dengar suara dari kursi raja yang ada di dalam Tuhan Allah pe Ruma di sorga, yang bilang bagini, “Samua Kita pe hukuman ini so abis, Kita so tara mara lagi.”

Wahyu 19:9

Turus malaekat itu bilang pa kita bagini, “Yohanes, tulis kata-kata ini: orang-orang yang dapa undang iko Anak Domba pe pesta kawing, dorang itu paling sanang suda.” Malaekat itu bilang lagi pa kita, “Kata-kata ini dari Tuhan Allah, jadi samua itu butul.”

Wahyu 2:1

Anak Manusia yang dari sorga bilang pa kita, “Yohanes, tulis suda untuk malaekat yang jaga pa jemaat di kota Efesus. Ngana tulis bagini: Ini pasáng dari Anak Manusia, yang pegang tuju bintang di tangan kanan, deng yang bajalang kuliling lia satu-satu tuju tiang lampu mas itu.

Wahyu 2:7

Jadi dengar bae-bae apa yang Tuhan Allah pe Roh kase tau pa Dia pe jemaat-jemaat, bagini, ‘Sapa yang menang dari pengaru jahat, Kita mo kase pa dorang hak untuk makang bua dari pohong kehidupan yang ada di Tuhan Allah pe taman Firdaus.’ ”

Wahyu 20:6

Dorang yang pertama dapa hidup ulang, dorang itu paling sanang suda. Dorang itu yang so jadi Tuhan Allah pe umat. Dorang me tara rasa yang dia pe nama kematian yang kedua. Dorang akan jadi imam-imam yang pe tugas layani pa Tuhan Allah deng Yesus Kristus, turus dorang me akan berkuasa sama-sama deng Dia selama saribu taong.

Wahyu 21:5

Tuhan Allah yang dudu di kursi raja itu bilang bagini, “Perhatikan bae-bae, Kita biking samua jadi baru!” Kong Dia bilang pa kita, “Tulis suda samua ini! Karna samua kata-kata ini butul deng orang bisa percaya.”

Wahyu 22:17

Kong Tuhan Allah pe Roh deng pengantin parampuang itu bilang, “Mari suda!” Sapa saja yang dengar itu, lebe bae dia bilang, “Mari suda!” Sapa yang aus, lebe bae dia datang. Deng sapa yang mau minum, lebe bae dia ambe aer deng cuma-cuma, aer yang biking orang hidup deng Tuhan Allah slama-lamanya.

Wahyu 6:11

Abis itu, samua orang mati itu pe roh masing-masing tarima dong pe juba puti, kong ada yang bilang pa dorang, supaya tunggu sadiki karna dong pe jumla bolong genap. Barang, masi ada lagi dong pe sudara-sudara yang percaya, deng orang laeng yang jaga biking apa yang Tuhan suru yang nanti mo mati dapa bunu sama deng dorang itu. Waktu itu, baru dong pe jumla jadi genap, kong Tuhan mo hukum pa orang-orang di dunia.