Roma 9:5 - Perjanjian Baru Bahasa Melayu Maluku Utara

⁵ Dorang itu me turunan dari Abraham, Ishak deng Yakub, kong dari turunan ini Yesus Kristus lahir sebagai manusia untuk mo kase slamat pa manusia. Yesus Kristus itu suda Tuhan Allah, Dia pe kuasa lebe basar dari samua yang ada. Jadi Dia yang pantas dapa puji sampe slama-lamanya. Amin.

Roma 9:5 ပူးပေါင်းရင်းမြစ်များ

Roma 1:25

Apa yang butul dari Tuhan Allah, dorang tara iko. Dorang so tara puji deng semba pa Tuhan Allah yang so cipta langit deng bumi, mala dorang cuma puji deng semba pa apa yang Tuhan Allah so cipta. Padahal cuma Tuhan Allah saja yang pantas dapa puji slama-lamanya. Amin.

1 Yohanes 5:20

Torang me tau Anak Allah so datang kong so biking torang mangarti la torang kanal Tuhan Allah yang Butul. Torang so hidup satu hati deng Tuhan Allah, karna torang so hidup satu hati deng Dia pe Anak Yesus Kristus. Dia itu suda Tuhan Allah yang Butul deng Dia yang biking orang bole dapa hidup deng Tuhan Allah slama-lamanya.

Yohanes 10:30

Kita deng Kita pe Bapa itu satu.”

1 Timotius 3:16

Ajaran yang Tuhan Allah kase pa torang itu butul, kong pe bagus skali, tarada yang bisa lawan! Biar dulu orang bolong tau ajaran itu, skarang Tuhan Allah so kase tau pa torang bagini: Yesus so datang jadi manusia. Roh Kudus yang kase tunju pa torang Dia itu Orang yang butul, deng malaekat-malaekat lia pa Dia. Dia pe Kabar so tasiar sampe di bangsa-bangsa laeng, kong orang-orang di dunia ini percaya pa Dia. Tuhan Allah so angka pa Dia di sorga deng cara yang luar biasa.

Roma 1:3

Kabar Bae itu tentang Anak Allah yang datang di dunia sebagai manusia, Dia lahir dari raja Daud pe turunan.

Wahyu 1:18

Kita ini yang hidup! Memang Kita so perna mati, tapi lia skarang Kita so hidup ulang, kong Kita tetap hidup sampe slama-lamanya. Kita yang pegang samua kunci maut, itu berarti, Kita ada kuasa untuk kase hidup ulang orang yang so mati. Pa Kita me ada kunci kerajaan maut, itu berarti, Kita ada kuasa di tampa orang-orang yang mati.

Wahyu 22:16

Yesus bilang lagi, “Kita ini Yesus. Kita so utus Kita pe malaekat untuk kase tau samua hal yang mo jadi ini pa ngoni, la ngoni me kase tau ini pa jemaat-jemaat. Kita ini raja Daud pe turunan. Kita ini sama deng bintang yang paling tarang yang basinar kalu so amper siang di sabla timur.”

2 Korintus 11:31

Yang kita bilang itu, butul. Tuhan Allah, torang pe Tuhan Yesus pe Bapa, Dia tau kita tara bafoya. Puji suda pa Dia sampe slama-lamanya.

Roma 11:28

Biar bagitu me, banya dari kita pe sudara bangsa Yahudi yang tara percaya Kabar Bae tentang Yesus Kristus, karna itu dorang so jadi Tuhan Allah pe musu. Tapi karna dorang tara percaya Kabar Bae itu, biking ngoni untung, skarang Tuhan Allah so tarima pa ngoni. Cuma biar bagitu, orang-orang Yahudi tetap Tuhan Allah sayang, barang Tuhan Allah so pili pa dorang jadi Dia pe umat. Itu Dia pe janji dari dulu pa dorang pe orang tua dulu-dulu.

Roma 10:12

Samua orang bole dapa slamat, barang orang Yahudi deng orang yang bukang Yahudi tarada dia pe beda, karna Tuhan Allah itu samua orang pe Tuhan. Dia itu paling bae pa samua orang yang minta tolong pa Dia.

Wahyu 22:20

Yesus yang so kase tau pa kita tentang samua pasáng itu, Dia bilang bagini, “Butul, so tara lama lagi Kita akan datang!” Karna itu kita bilang, “Amin. Datang suda Tuhan Yesus!”

2 Timotius 2:8

Inga bae-bae, Yesus Kristus itu, raja Daud pe turunan, Dia mati tapi Tuhan Allah kase hidup ulang pa Dia lagi. Jadi, ini suda Kabar Bae yang kita salalu kase tau di mana-mana.

1 Timotius 6:15

Tuhan Allah sandiri yang tentukan tempo apa Tuhan Yesus mo datang lagi. Cuma Tuhan Allah saja yang berkuasa, jadi pantas torang puji. Dia itu Raja dari samua raja, deng Tuhan dari samua tuhan.

1 Korintus 14:16

Karna, kalu ngoni berdoa bilang tarimakasi pa Tuhan Allah pake bahasa roh dari ngoni pe roh saja, nanti orang-orang yang ada di situ tara akan bilang “Amin” pa ngoni pe doa itu, barang dorang tara mangarti apa yang ngoni bilang.

Matius 28:20

Kong ngoni ajar pa dorang supaya dorang biking samua parenta yang Kita so perna ajar pa ngoni. Ngoni inga bae-bae e, Kita salalu sama-sama deng ngoni turus sampe ahir jaman.”

Wahyu 5:14

Kong ampa binatang luar biasa itu sama-sama bilang, “Amin!” Turus, dua pulu ampa pemimpin itu berlutut semba pa Tuhan Allah sampe dong pe muka kanal di tana.

Kisah Para Rasul 20:28

Karna itu sudara-sudara, ngoni musti jaga bae-bae ngoni pe diri, deng jemaat yang Roh Kudus so kase pa ngoni untuk ngoni jaga. Ngoni jaga Tuhan Allah pe jemaat sama deng gembala yang jaga dia pe domba. Jemaat-jemaat itu so jadi Tuhan Allah punya, barang Dia pe Anak Yesus so mati di kayu salib untuk tebus pa torang.

Matius 6:13

Kong jang kase biar torang tagoda biking barang yang jahat, tapi kase lapas suda pa torang dari yang jahat. [Karna Bapa yang jadi Raja, Bapa yang punya kuasa, deng yang pantas dapa puji deng hormat sampe slama-lamanya. Amin.’]

Kisah Para Rasul 3:13

Ngoni tau, Tuhan Allah yang torang pe orang tua dulu-dulu Abraham, Ishak deng Yakub jaga semba, Dia so biking Yesus dapa puji deng hormat. Yesus itu yang jaga biking apa yang Tuhan Allah suru. Tempo hari ngoni tara tarima pa Yesus, kong ngoni serakan Dia pa gubernur Pilatus supaya Dia dapa hukum. Padahal, waktu itu gubernur mo kase bebas pa Dia.

Ibrani 7:24

Tapi Yesus Kristus, Dia tetap ada sampe slama-lamanya, jadi Dia pegang Dia pe jabatan Imam tara ganti-ganti deng orang laeng.

Lukas 20:44

Jadi, kalu raja Daud sandiri saja bilang Mesias itu dia pe Tuhan, bagimana lagi torang mo bilang Mesias itu cuma raja Daud pe turunan?”