Roma 9:4 - Perjanjian Baru Bahasa Melayu Maluku Utara

⁴ Dorang itu orang Israel. Dari dulu, Tuhan Allah pili kong biking pa dorang jadi Dia pe ana-ana. Deng Tuhan Allah so kase tunju Dia pe kuasa yang hebat pa dorang pe orang tua dulu-dulu. Tuhan Allah me so biking janji deng dorang pe orang tua dulu-dulu yang biking dorang jadi Dia pe umat. Tuhan Allah so kase pa dorang aturan di lima kitab Musa kong kase tunju pa dorang bagimana cara yang butul supaya semba pa Dia. Turus ada banya lagi janji yang Dia kase pa dorang pe orang tua dulu-dulu.

Roma 9:4 ပူးပေါင်းရင်းမြစ်များ

Matius 21:33

Yesus bilang lagi, “Coba ngoni dengar umpama satu lagi ini. Ada tuang kobong satu, dia babiking kobong anggur kong biking pagar kase kuliling kobong itu. Turus dia gale lobang la jadi tampa untuk baramas anggur. Kong dia biking lagi ruma kobong yang tinggi satu untuk orang bajaga kobong itu. Turus, dia baku ator deng orang yang bakarja di kobong itu la urus dia pe kobong. Abis itu, dia pigi di daera laeng.

Yohanes 1:17

Memang dari nabi Musa, torang tau Tuhan Allah pe aturan di lima kitab Musa, tapi dari Yesus Kristus, torang bole tau Tuhan Allah pe sayang deng Dia pe ajaran yang butul.

Yohanes 1:47

Turus dorang dua pigi pa Yesus. Pe lia Natanael datang pa Dia, Yesus bilang, “Coba ngoni lia, dia yang kamari ini butul-butul orang Israel, dia tara putar bale.”

Kisah Para Rasul 2:39

Barang, samua itu Tuhan Allah so janji pa ngoni deng pa ngoni pe turunan, deng pa orang-orang bukang Yahudi lagi. Janji itu Tuhan Allah mo kase pa samua orang yang Dia pangge iko pa Dia.”

Roma 3:2

Yang pasti, banya skali dia pe untung. Yang paling penting itu, torang orang Yahudi yang kakamuka Tuhan Allah pili untuk tarima deng jaga Dia pe firman.

Roma 8:15

Torang tau, tong itu Tuhan Allah pe ana-ana, karna Tuhan Allah pe Roh yang Dia so kase pa torang itu, tara biking torang tako sama deng orang karja yang tako dia pe tuang. Tapi Tuhan Allah pe Roh itu so biking torang jadi Tuhan Allah pe ana-ana, sampe torang me bole pangge pa Dia itu, “Papa e, ya Bapa!”

Roma 9:6

Memang banya orang Yahudi tara percaya pa Yesus Kristus. Tapi biar bagitu, kita tarada maksut mo bilang Tuhan Allah pe janji-janji pa torang pe orang tua dulu-dulu itu so tara akan jadi. Tapi kita pe maksut, tara samua orang yang lahir dari orang Israel pe turunan itu yang mo jadi Tuhan Allah pe umat.

2 Korintus 11:22

Dorang puji dong pe diri, barang dorang dari bangsa Ibrani, orang Israel pe turunan, deng Abraham pe turunan. Tapi biar bagitu, kita me bole puji kita pe diri sama deng dorang, karna kita me dari bangsa Ibrani, kita me orang Israel pe turunan, deng kita me Abraham pe turunan.

Galatia 3:16

Bagitu lagi deng Tuhan Allah pe janji-janji yang Dia biking pa Abraham deng Abraham pe turunan. Di Kitab Suci itu, tara tatulis Tuhan Allah kase Dia pe janji itu pa “Abraham pe turunan-turunan” sama deng janji itu untuk banya orang, tapi ada tulis, Dia kase Dia pe janji itu cuma pa “Abraham pe turunan” saja, jadi itu pe maksut, janji itu cuma pa satu orang saja, Dia itu Yesus Kristus.

Efesus 2:12

Waktu itu, ngoni tara tau sama skali sapa itu Yesus Kristus. Ngoni itu orang asing yang bukang dari bangsa Israel. Jadi ngoni bukang Tuhan Allah pe umat yang Dia pili, deng ngoni tara akan dapa apa yang Tuhan Allah janji pa orang Israel. Ngoni hidup di dunia ini tara ada hubungan deng Tuhan Allah, jadi ngoni tara bisa baharap pa sapa-sapa supaya bole dapa slamat dari dosa-dosa.

Ibrani 9:1

Memang dulu, waktu Tuhan Allah biking janji yang lama deng bangsa Israel itu, ada aturan-aturan untuk semba pa Dia, deng ada lagi Dia pe Tenda Ibada yang dong biking.

Ibrani 9:10

Barang, aturan-aturan di janji yang lama itu, cuma ator tentang apa yang orang musti makang deng minum, deng cara-cara untuk orang biking bersi diri saja. Kong samua aturan itu cuma ator di manusia pe bagian luar diri saja, bukang untuk manusia pe dalam hati, turus aturan itu cuma ada dia pe guna sampe di waktu Tuhan Allah ganti deng janji yang baru.

Ibrani 9:3

Di dalam Tenda itu, ada kaeng pampele basar satu yang ada gantong untuk kase pele ruang yang pertama deng ruang yang kedua. Ruang yang kedua itu pe nama Ruang Paling Suci.

Ibrani 9:5

Di atas Kotak Perjanjian itu, ada patong dua yang pe model sama deng malaekat yang orang jaga bilang kerub. Kerub dua itu jadi lambang Tuhan Allah yang hebat ada di situ. Kerub dua itu pe sayap ada tabuka lebar kong tutu Kotak Perjanjian itu pe panutu, di tampa yang imam jaga kase percik dara untuk Tuhan Allah kase ampun orang pe dosa-dosa. Tapi skarang bukang dia pe waktu untuk carita samua itu.

Ibrani 9:6

Bagitu suda dong so ator samua barang yang ada di Tenda itu. Turus, imam-imam jaga maso di Ruang Suci itu untuk biking dong pe tugas.