Roma 8:9 - Perjanjian Baru Bahasa Melayu Maluku Utara

⁹ Tapi ngoni, ngoni so tara hidup iko manusia pe mau yang suka biking dosa itu. Ngoni so hidup iko Tuhan Allah pe Roh pe mau, kalu memang Roh itu so ada di ngoni pe hati. Tapi inga e, orang yang tara ada Yesus Kristus pe Roh di dia pe hati, dia itu bukang Yesus Kristus pe umat.

Roma 8:9 ပူးပေါင်းရင်းမြစ်များ

Lukas 11:13

Jadi biar ngoni pe hati tara bae, tapi ngoni tau bagimana kase barang yang bae pa ngoni pe ana-ana. Apalagi ngoni pe Bapa yang di sorga! Dia pasti mo kase Roh Kudus pa orang-orang yang minta pa Dia.”

Yohanes 14:17

Penolong itu Tuhan Allah pe Roh, yang mo kase ajar pa ngoni apa yang butul tentang Tuhan Allah. Orang-orang yang tara percaya pa Tuhan Allah, tara bisa tarima Tuhan Allah pe Roh itu, barang dorang tara dapa lia pa Dia deng tara kanal pa Dia. Tapi ngoni ini kanal pa Dia karna Dia ada sama-sama deng ngoni kong akan jadi satu deng ngoni.

Yohanes 14:23

Yesus jawab pa dia, “Kalu orang sayang pa Kita, dia mo biking Kita pe ajaran, kong Kita pe Bapa akan sayang pa dia. Kong Kita deng Kita pe Bapa mo datang tinggal sama-sama deng dia.

Yohanes 3:34

Barang, Dia yang Tuhan Allah utus, Dia itu yang kase tau Tuhan Allah pe kata-kata, karna Tuhan Allah kase Dia pe Roh pa Dia tara abis-abis.

Yohanes 3:6

Barang, torang manusia lahir dari torang pe orang tua, tapi cuma Roh Kudus saja yang bisa ruba pa torang jadi Tuhan Allah pe ana.

Kisah Para Rasul 16:7

Waktu dorang sampe di daera Misia pe batas, dong mo coba maso di daera Bitinia, tapi di situ me Yesus pe Roh bilang pa dorang, jang dulu maso ka sana.

Roma 7:5

Karna waktu torang bolong percaya pa Yesus, torang pe hidup itu cuma iko manusia pe mau sandiri yang suka biking dosa. Waktu torang tau aturan di lima kitab Musa yang kase tau apa itu dosa yang torang tara bole biking, itu yang biking torang lebe tamba ingin biking dosa. Kong karna torang biking dosa itu, torang so mo dapa hukum tapisa deng Tuhan Allah slama-lamanya.

Roma 8:1

Jadi, skarang Tuhan Allah so tara hukum lagi pa torang karna torang so satu hati deng Kristus Yesus.

Roma 8:11

Tuhan Allah pe Roh so kase hidup ulang pa Kristus Yesus, kong Roh itu suda yang ada di ngoni pe hati. Jadi biar ngoni pe badan mo mati, tapi Tuhan Allah nanti mo kase hidup ulang pa ngoni pake kuasa dari Dia pe Roh yang ada pa ngoni itu.

Roma 8:2

Barang, Roh Kudus itu suda yang biking torang bole hidup satu hati deng Yesus Kristus. Roh Kudus itu tolong pa torang supaya torang tara iko dosa pe mau lagi yang biking torang mati tapisa deng Tuhan Allah slama-lamanya.

1 Korintus 15:23

Tapi samua yang akan hidup ulang itu iko dia pe giliran: yang kakamuka hidup ulang itu, Yesus Kristus. Kong nanti waktu Yesus Kristus datang ulang di dunia ini, orang-orang yang percaya pa Dia me mo hidup ulang.

1 Korintus 3:16

Ngoni tau ka tarada, ngoni itu sama deng Tuhan Allah pe Ruma, kong Tuhan Allah pe Roh tinggal pa ngoni.

1 Korintus 6:17

Tapi orang yang so hidup satu hati deng Tuhan, dia itu so jadi satu roh deng Tuhan.

1 Korintus 6:19

Ngoni so tau to, Roh Kudus tinggal dalam ngoni pe diri, jadi ngoni sama deng so jadi Tuhan Allah pe Ruma yang Roh Kudus tinggal. Tuhan Allah yang kase Roh Kudus itu pa ngoni, kong ngoni pe diri itu bukang ngoni punya sandiri, tapi Tuhan Allah punya.

2 Korintus 10:7

Sudara-sudara, inga bae-bae apa yang butul yang ngoni so tau. Ada orang di situ yang bilang kata, cuma dorang itu saja yang biking apa yang Yesus Kristus suru, tapi dorang musti inga lagi, torang lagi orang yang biking apa yang Yesus Kristus suru, sama deng dorang.

2 Korintus 6:16

Apa ada hubungan antara Tuhan Allah pe Ruma deng manusia pe tampa semba puji-puji? Tara ada hubungan! Torang orang-orang percaya, tong ini sama deng Tuhan Allah pe Ruma, karna Tuhan Allah yang hidup tinggal di torang pe hati. Itu sama deng Tuhan Allah janji dulu, kong skarang so jadi, “Kita mo tinggal sama-sama deng dorang, deng hidup deng dorang, kong Kita mo jadi dorang pe Tuhan Allah, deng dorang mo jadi Kita pe umat.”

Galatia 4:6

Kong karna torang so jadi Tuhan Allah pe ana-ana, Tuhan Allah so suru pa Dia pe Anak pe Roh tinggal di torang pe hati, kong Roh yang ada di torang pe hati itu bakarja deng biking torang bole pangge pa Tuhan Allah itu, “Papa e, ya Bapa!”

Galatia 5:24

Sapa saja yang so jadi Kristus Yesus pe umat, dia itu so tara iko manusia pe mau yang suka biking dosa deng napsu yang tara bae. Itu bole mo kase sama deng dia so kase mati sifat itu di atas kayu salib.

Efesus 1:13

Kong ngoni orang-orang yang bukang Yahudi, skarang ngoni me so dengar ajaran yang butul kong so jadi percaya pa Yesus Kristus. Ajaran yang butul itu, Kabar Bae tentang Yesus Kristus yang so kase slamat pa ngoni dari dosa-dosa. Kong waktu ngoni percaya pa Yesus Kristus, Tuhan Allah kase Roh Kudus pa ngoni supaya jadi tanda ngoni itu so jadi Tuhan Allah punya. Roh Kudus itu suda yang Tuhan Allah so janji dari dulu.

Efesus 2:22

Jadi skarang, karna torang so jadi satu hati deng Yesus Kristus, biar dari bangsa mana saja, Dia biking torang samua jadi satu, sama deng satu ruma, kong di situ tampa untuk Tuhan Allah pe Roh tinggal.

Efesus 3:17

supaya Yesus Kristus tetap tinggal di ngoni pe hati karna ngoni percaya pa Dia. Kita minta pa Tuhan Allah supaya ngoni pe sayang lebe tamba basar pa Tuhan Allah deng pa samua orang, itu sama deng pohong pe akar yang lebe tatanam kuat di tana.

Filipi 1:19

barang kita tau, kita akan slamat dari sengsara ini, karna ngoni pe doa deng karna Yesus Kristus pe Roh mo tolong pa kita.

2 Timotius 1:14

Ngana pe tugas, kase tau Kabar Bae. Kabar Bae itu sama deng harta yang mahal. Jadi jaga ngana pe tugas itu bae-bae. Roh Kudus yang ada di torang pe hati, mo bantu pa torang jaga tugas itu, supaya tarada orang yang biking itu jadi ajaran sesat.

1 Petrus 1:11

Yesus Kristus pe Roh yang ada pa nabi-nabi itu yang kase tau pa dorang tentang Dia mo dapa sengsara, deng abis itu dapa puji deng hormat. Jadi, nabi-nabi itu me cari tau lagi bagimana deng tempo apa itu mo jadi.

1 Yohanes 3:24

Sapa yang iko Tuhan Allah pe parenta-parenta, dia so jadi satu hati deng Tuhan Allah, kong Tuhan Allah me jadi satu hati deng dia. Deng bagitu, torang bisa tau, Tuhan Allah satu hati deng torang, barang Tuhan Allah so kase Dia pe Roh pa torang.

1 Yohanes 4:13

Tuhan Allah so kase Dia pe Roh pa torang supaya torang bole tau, Tuhan Allah tetap ada di torang pe hati, kong torang tetap jadi satu hati deng Dia.

1 Yohanes 4:4

Tapi, ngoni yang kita so sayang sama deng kita pe ana-ana, ngoni ini dari Tuhan Allah. Jadi ngoni so kase kala pa nabi-nabi palsu, karna Roh yang ada pa ngoni Dia pe kuasa lebe basar dari roh yang ada di dunia ini.

Wahyu 13:8

Kong samua orang yang tinggal di bumi mo semba pa binatang itu. Orang-orang yang semba itu, dorang yang pe nama tara tatulis di Anak Domba pe buku kehidupan waktu dunia ini bolong jadi. Buku kehidupan itu, Anak Domba yang so perna dapa bunu pe buku. Di buku itu, Tuhan Allah tulis orang-orang pe nama yang mo dapa hidup deng Tuhan Allah slama-lamanya.

Wahyu 20:15

Tiap orang yang dia pe nama tara tatulis di buku kehidupan itu, dia dapa lempar di dalam api yang luas skali itu.