Roma 8:4 - Perjanjian Baru Bahasa Melayu Maluku Utara

⁴ Tuhan Allah pe maksut biking bagitu, supaya torang bole jadi orang yang tara sala pa Tuhan Allah pe muka iko deng apa yang tatulis di lima kitab Musa. Kong torang lagi bole iko yang butul karna torang so iko Roh Kudus pe mau, bukang lagi iko torang manusia pe mau yang suka biking dosa.

Roma 8:4 ပူးပေါင်းရင်းမြစ်များ

Lukas 1:6

Dorang dua laki bini ini hidup butul pa Tuhan Allah pe muka, deng dong iko samua Dia pe parenta deng aturan-aturan, kong tarada yang bisa kase sala pa dorang.

Roma 2:26

Jadi kalu ada orang yang bukang Yahudi yang tara dapa sunat tapi dia iko aturan di lima kitab Musa, yang pasti Tuhan Allah tarima pa dia sama deng orang Yahudi yang so dapa sunat, to?

Roma 3:31

Tapi ada kaapa orang yang pikir, “Jadi kalu Tuhan Allah biking torang jadi orang yang tara sala karna torang percaya pa Yesus, itu pe arti, torang tara perlu mo biking lagi aturan di lima kitab Musa.” Sama skali bukang bagitu. Mala karna torang percaya, torang lebe tamba biking aturan di lima kitab Musa itu.

2 Korintus 10:2

kita minta pa ngoni, jang biking sampe kita musti togor karas pa ngoni waktu torang sama-sama nanti, barang ada dari ngoni laeng yang tara dengar-dengaran pa torang. Dorang bilang kata, torang ini cuma iko manusia pe mau saja. Pa dorang-dorang itu suda yang kita mo togor karas.

2 Korintus 10:3

Memang torang manusia biasa, tapi kalu ada orang yang malawang Tuhan pe firman, torang tara lawan pa dorang pake manusia pe cara.

Galatia 5:16

Kita pe maksut bagini: ngoni musti hidup iko Roh Kudus pe mau. Kalu ngoni hidup bagitu, ngoni tara akan iko manusia pe mau yang suka biking dosa.

Kolose 1:22

Tapi skarang, Tuhan Allah biking supaya ngoni pe hubungan bole bae-bae ulang deng Dia, karna Yesus Kristus so mati di kayu salib. Dia mati itu, supaya di Dia pe muka, ngoni jadi orang yang bersi dari dosa, tara sala apa-apa, kong tarada orang yang bisa kase sala pa ngoni.

Ibrani 12:23

Di sana ngoni me baku dapa deng orang-orang yang percaya pa Tuhan Allah yang ada bakumpul, dorang itu Dia sebut Dia pe ana-ana yang tua, dorang itu pe nama-nama so tatulis di sorga. Di sana ngoni me baku dapa deng Tuhan Allah, Dia yang mo adili pa samua orang. Ngoni me baku dapa deng orang-orang yang so mati kamuka, yang waktu dong masi hidup, dong jaga biking yang butul pa Tuhan Allah pe muka, kong dorang itu Tuhan Allah so biking dorang jadi sempurna.

1 Yohanes 3:2

Sudara-sudara yang kita sayang, skarang torang ini Tuhan Allah pe ana-ana. Jadi torang tau, nanti waktu Yesus Kristus, Raja yang Tuhan Allah pili itu so datang ulang, torang mo jadi sama deng Dia, barang torang mo lia pa Dia yang sebenarnya. Tapi tentang torang pe hidup nanti bagimana, Dia bolong kase tau samua pa torang.

Yudas 1:24

Tuhan Allah ada kuasa untuk jaga pa ngoni supaya ngoni tara taiko biking dosa. Dia me biking ngoni jadi orang yang tara sala apa-apa, kong bawa pa ngoni badiri deng hati yang paling sanang di Dia pe muka yang hebat itu.

Wahyu 14:5

Dorang itu tara perna bicara putar bale, deng tarada orang yang bisa kase sala pa dorang.