Roma 7:7 - Perjanjian Baru Bahasa Melayu Maluku Utara

⁷ Kong, kalu gara-gara aturan di lima kitab Musa itu torang lebe tamba biking dosa, apa torang mo bilang aturan itu sala? Pasti tarada, to? Aturan di lima kitab Musa itu tara sala, mala karna aturan itu ada, kita sandiri baru tau apa itu dosa. Dia pe conto bagini: di lima kitab Musa ada aturan yang tatulis, “Tara bole ingin orang laeng pe barang.” Kita tara tau kalu ingin orang laeng pe barang itu dosa, kong kita baru tau itu dosa, karna aturan itu.

Roma 7:7 ပူးပေါင်းရင်းမြစ်များ

Matius 5:28

Tapi Kita mo bilang pa ngoni e, kalu ada laki-laki yang lia parampuang saja kong di dia pe dalam hati ada napsu mau tidor deng parampuang itu, itu sama saja deng dia so baku tidor deng parampuang itu.

Lukas 12:15

Kong Yesus bicara pa orang banya yang ada di situ, “Ati-ati deng jaga diri bae-bae, jang sampe ngoni tara puas deng apa yang ngoni punya. Karna manusia pe hidup itu bukang cuma dari harta saja biar dia kaya skali lagi.”

Lukas 20:16

Pasti dia mo datang kong bunu pa dorang. Abis itu, dia kase pa orang-orang laeng untuk jaga dia pe kobong itu.” Pe dengar Yesus bilang bagitu, dorang mangarti Dia pe maksut kong dorang itu bilang, “Jangan! Jang sampe jadi bagitu!”

Kisah Para Rasul 20:33

Dalam kita pe hidup ini, kita tara perna ingin doi, biar itu doi mas atau doi perak. Deng kita tara perna ingin baju dari sapa saja.

Roma 13:9

Karna di lima kitab Musa itu ada tatulis bagini: ‘Jang baku suka deng orang pe laki atau orang pe bini, jang bunu orang, jang pancuri, deng jang ingin apa yang orang laeng punya.’ Torang so biking samua parenta itu kalu torang biking Tuhan Allah pe parenta satu yang bagini, “Ngoni musti sayang pa orang laeng sama deng ngoni sayang pa ngoni pe diri sandiri!”

Roma 3:20

Barang, tarada satu orang yang jadi orang yang butul pa Tuhan Allah pe muka karna dia iko aturan-aturan di lima kitab Musa. Mala dari aturan itu, torang jadi tau, torang berdosa.

Roma 3:5

Torang orang Yahudi jaga biking barang yang tara butul. Deng bagitu, banya orang lebe tau Tuhan Allah itu salalu butul. Tapi jang sampe ada yang bilang bagini, “Itu berarti, ada dia pe bae torang biking dosa. Jadi, kalu torang dapa hukum, itu pe arti, Tuhan Allah tara butul.” Kalu dorang bilang bagitu, itu cuma manusia pe pikiran saja.

Roma 4:1

Jadi, apa yang musti torang biking supaya torang jadi orang yang tara sala pa Tuhan Allah pe muka? Torang ambe conto pa Abraham. Dia itu torang pe orang tua dulu-dulu.

Roma 4:15

Barang, kalu orang mo iko aturan di lima kitab Musa, dia tara mampo iko aturan itu, mala dia cuma biking Tuhan Allah mara sampe Tuhan Allah mo hukum pa dorang. Tapi kalu tarada aturan di lima kitab Musa, pasti tarada orang yang mo langgar aturan itu.

Roma 5:20

Tuhan Allah kase aturan di lima kitab Musa supaya manusia tau persis, dorang so paling banya biking dosa. Tapi biar manusia pe dosa tamba banya, Tuhan Allah pe bae pa manusia lebe tamba banya.

Roma 6:15

Tuhan Allah kase slamat pa torang dari dosa-dosa, bukang karna torang iko aturan di lima kitab Musa, tapi karna Dia pe bae pa torang. Deng bagitu, apa skarang torang bole biking dosa turus-turus? Yang pasti tarada!

Roma 7:11

Aturan di lima kitab Musa itu butul. Tapi deng bagitu, dosa dapa kesempatan untuk tipu pa kita, barang kita pikir kalu kita biking aturan di lima kitab Musa, kita bole dapa slamat. Tapi ternyata kita pe hati lebe tamba ingin biking dosa, dia pe ahir kabawa, kita mo dapa hukum tapisa deng Tuhan Allah slama-lamanya.

Roma 7:13

Tapi jang sampe ada orang pikir, aturan yang bagus itu biking torang tapisa deng Tuhan Allah slama-lamanya. Pasti tara bagitu. Dosa yang kita jaga biking itu yang biking kita dapa hukum kong tapisa deng Tuhan Allah slama-lamanya. Sebenarnya, aturan itu bagus, tapi waktu kita tau aturan itu, kita pe hati lebe tamba ingin biking dosa, sampe kita lebe tamba biking dosa turus. Jadi deng ada aturan yang bagus itu, kita bole tau mana itu dosa, kong kita bole tau lebe jelas, dosa itu jahat.

Roma 7:5

Karna waktu torang bolong percaya pa Yesus, torang pe hidup itu cuma iko manusia pe mau sandiri yang suka biking dosa. Waktu torang tau aturan di lima kitab Musa yang kase tau apa itu dosa yang torang tara bole biking, itu yang biking torang lebe tamba ingin biking dosa. Kong karna torang biking dosa itu, torang so mo dapa hukum tapisa deng Tuhan Allah slama-lamanya.

Roma 7:8

Tapi waktu kita tau aturan itu, itu mala biking kita pe hati lebe tamba ingin orang laeng pe barang. Padahal kalu aturan itu tarada, itu berarti, kita pe keinginan mo biking dosa itu tara ada.

1 Korintus 15:56

Dosa itu bisa biking orang mati, itu sama deng binatang pe bisa yang bole biking orang mati. Kong torang yang biking dosa musti dapa hukum, karna torang so langgar aturan-aturan di lima kitab Musa.

Efesus 5:3

Ngoni itu Tuhan Allah pe umat, jadi jang ngoni baseks sabarang, jang biking hal-hal yang cafarune, deng jang ingin orang pe barang jadi ngoni punya. Samua itu biar cuma sebut saja me jangan, karna itu tara pantas untuk orang-orang yang so jadi Tuhan Allah pe umat.

Kolose 3:5

Jadi, karna Yesus Kristus so ruba ngoni pe hidup jadi baru, ngoni berenti suda iko dunia pe mau, macam deng: baseks sabarang, biking hal-hal yang cafarune, iko napsu yang tara bae, ingin biking barang yang jahat, deng golojo orang pe barang. Karna kalu torang golojo orang pe barang, itu berarti, torang so kase lebe penting barang itu daripada Tuhan.

1 Tesalonika 4:5

Jang ngoni hidup iko ngoni pe napsu yang tara bae. Cuma orang-orang yang tara kanal pa Tuhan Allah yang jaga biking bagitu.

Ibrani 7:19

Aturan-aturan di lima kitab Musa itu tara berhasil biking manusia pe hubungan deng Tuhan Allah jadi sempurna. Tapi skarang, torang so ada tampa baharap yang lebe bae. Itu Yesus suda, Dia yang biking torang bole badekat deng Allah.