Roma 5:6 - Perjanjian Baru Bahasa Melayu Maluku Utara

⁶ Tuhan Allah pe sayang pa torang itu bagini: waktu torang tara bisa biking apa-apa la bebas dari dosa-dosa, Yesus Kristus mati untuk torang yang hidup tara iko Tuhan Allah pe mau. Yesus Kristus mati, pas di waktu yang Tuhan Allah so tentukan.

Roma 5:6 ပူးပေါင်းရင်းမြစ်များ

Roma 11:26

Kalu orang bukang Yahudi so percaya pa Yesus Kristus, itu baru samua orang Yahudi me akan jadi percaya kong dapa slamat dari dosa-dosa. Dorang mo dapa slamat itu, barang ada tatulis di Kitab Suci bagini, “Nanti ada satu Orang yang datang kase slamat pa orang-orang, Dia datang dari gunung Sion. Dia mo hapus orang Yahudi pe kajahatan, orang Yahudi itu, Yakub pe turunan.”

Roma 4:25

Yesus itu yang so serakan Dia pe diri mati untuk torang samua karna torang pe dosa. Tapi Tuhan Allah kase hidup ulang pa Dia supaya Tuhan Allah biking torang jadi orang yang tara sala pa Dia pe muka.

Roma 4:5

Tapi torang tara bagitu. Torang jadi orang yang tara sala pa Tuhan Allah pe muka, bukang karna torang pe suar lala, tapi karna torang percaya pa Dia. Dia itu yang biking torang jadi orang yang tara sala pa Dia pe muka, bukang karna torang jaga biking barang yang butul, tapi karna torang pe percaya pa Dia. Dia itu yang bole biking orang yang malawang Dia pe parenta jadi orang yang tara sala pa Dia pe muka.

Roma 5:10

Karna dulu, waktu torang masi pangmalawang pa Tuhan Allah, Tuhan Allah sandiri yang kase bae-bae ulang torang pe hubungan deng Dia, deng cara Dia kase Dia pe Anak supaya mati untuk torang. Kong karna torang deng Dia pe hubungan so bae-bae ulang skarang, torang tau, torang pasti akan dapa slamat dari dosa-dosa karna Dia pe Anak so hidup ulang.

Roma 5:7

Barang, kalu cuma iko torang manusia pe biasa, tarada orang yang mau mati untuk dia pe tamang biar dia pe tamang pe hidup butul. Cuma kaapa ada orang yang mau mati untuk dia pe tamang kalu dia pe tamang itu bae-bae.

Roma 5:8

Tapi Tuhan Allah pe sayang pa torang itu tara bagitu. Waktu torang masi berdosa, Yesus Kristus mati untuk torang. Itu yang kase tunju Tuhan Allah pe sayang yang basar pa torang.

Roma 8:32

Dia pe Anak sandiri saja Dia tara tahang-tahang, tapi Dia kase sampe mati di kayu salib supaya tebus torang pe dosa. Karna itu, torang jadi tau, apa saja yang bae untuk torang, pasti Dia kase.

Roma 8:34

Tarada yang bisa kase hukuman pa torang yang percaya, karna Kristus Yesus yang ada bela pa torang pa Tuhan Allah pe muka. Kristus Yesus mati supaya tebus torang pe dosa. Kong lebe dari itu lagi, skarang Dia so hidup ulang kong dudu di tampa yang terhormat, pa Tuhan Allah pe sabla kanan.

Galatia 2:20

Jadi, skarang kita hidup tara iko kita pe kekuatan sandiri lagi, tapi Yesus Kristus yang hidup deng berkuasa pa kita pe diri. Kong selama kita hidup di dunia skarang ini, kita hidup cuma deng percaya saja pa Anak Allah. Dia yang so sayang pa kita deng yang so serakan Dia pe diri mati untuk kita.

Galatia 4:4

Tapi, bagitu waktu yang Tuhan Allah tentukan so sampe, Tuhan Allah utus Dia pe Anak datang di dunia. Anak itu yang lahir dari parampuang satu, kong Anak itu, hidup iko agama Yahudi pe aturan-aturan yang ada di lima kitab Musa.

Efesus 5:2

Ngoni musti hidup baku-baku sayang, sama deng Kristus Yesus me sayang pa torang sampe Dia serakan Dia pe diri mati untuk torang. Kong apa yang Dia biking itu Tuhan Allah tarima, sama deng korban persembahan yang bobou sadap yang biking Tuhan Allah pe hati sanang.

Kolose 2:13

Dulu waktu ngoni bolong percaya pa Tuhan, ngoni jaga langgar Tuhan Allah pe parenta, jadi Tuhan Allah lia pa ngoni sama deng orang yang so mati. Ngoni me tara dapa sunat karna ngoni bukang orang Yahudi, jadi ngoni bukang Tuhan Allah pe umat. Tapi skarang, karna Yesus Kristus so mati deng so hidup ulang, Dia so kase ampun ngoni pe dosa-dosa deng so kase pa ngoni hidup yang baru.

1 Tesalonika 5:9

Barang, Tuhan Allah pili pa torang jadi Dia pe umat. Dia tara pili pa torang supaya Dia hukum pa torang, tapi supaya torang dapa slamat karna torang percaya pa Yesus Kristus, torang pe Tuhan.

1 Timotius 1:9

Torang tau aturan-aturan yang ada di lima kitab Musa itu Tuhan Allah pe tujuan bukang untuk orang yang so hidup butul pa Dia pe muka, tapi untuk larang orang-orang yang bagini: yang malawang Tuhan Allah pe parenta, yang tara iko Tuhan Allah pe aturan, yang jaga biking dosa, yang cuma iko dorang pe mau sandiri, yang tara percaya pa Tuhan, yang bunu pa dorang pe papa deng mama deng pa orang laeng,

Titus 2:12

Tuhan kase Dia pe bae itu, biking torang jadi sadar la kase tinggal torang pe kalakuang yang tara iko Tuhan Allah pe mau deng yang cuma iko dunia pe mau. Deng bagitu torang mampo kuasai diri dalam sagala hal, jadi orang yang hidup butul pa Tuhan Allah pe muka, deng setia pa Dia di dunia skarang ini.

Ibrani 8:3

Barang, tiap imam basar di dunia ini dapa pili untuk biking tugas serakan umat pe binatang korban persembahan deng persembahan laeng pa Tuhan Allah. Bagitu lagi deng Yesus Kristus. Karna Dia torang pe Imam Basar, Dia lagi musti ada persembahan yang Dia kase pa Tuhan Allah.

Ibrani 9:26

Barang, kalu ulang-ulang kali Dia kase korban Dia pe diri, itu berarti, mulai dari dunia ini jadi, Dia musti ulang-ulang menderita turus. Tapi skarang ini, yang orang bilang dunia so mo kiamat, Dia datang di dunia cuma satu kali saja untuk hapus manusia pe dosa-dosa deng cara Dia kase Dia pe diri sandiri mati untuk jadi korban persembahan.

1 Petrus 1:20

Waktu dunia ini bolong ada, Tuhan Allah so pili pa Yesus Kristus. Kong di hari-hari yang so dekat deng kiamat ini, Dia so datang di dunia supaya ngoni samua bole slamat dari ngoni pe dosa-dosa.

2 Petrus 3:7

Kong cuma deng bicara lagi, Tuhan Allah jaga langit deng bumi skarang, sampe di waktu Dia mo hukum pa orang-orang yang tara iko Dia pe mau deng Dia mo biking dorang mati slama-lamanya. Di waktu itu, Dia mo bakar kase abis dunia deng langit ini.

Yudas 1:15

Dia datang untuk adili pa samua orang, deng Dia lagi mo hukum pa orang-orang yang tara semba pa Tuhan Allah karna samua dong pe kalakuang yang tara iko Tuhan Allah pe mau deng samua dong pe kata-kata kasar tentang Tuhan.”

Yudas 1:18

Dorang bilang, nanti waktu so mo kiamat, akan datang orang-orang yang suka bahina torang pe percaya. Dorang itu akan hidup iko dong pe napsu yang baku lawan deng Tuhan Allah pe mau.

Yudas 1:4

Barang, ada orang-orang yang bawa ajaran yang tara butul yang so maso pa ngoni pe jemaat, tapi ngoni tara sadar. Dorang itu tara iko Tuhan Allah pe mau. Dorang memang so tarima ajaran tentang torang pe Tuhan Allah pe bae, tapi dorang kase putar bale ajaran itu la orang bisa iko dorang pe napsu yang tara bae. Deng dorang me manyangkal, Yesus Kristus yang cuma satu itu saja torang pe Tuhan, yang berkuasa pa samua-samua. Orang-orang model bagini, dari dulu ada tatulis di Kitab Suci, dorang memang akan dapa hukuman.