Roma 4:6 - Perjanjian Baru Bahasa Melayu Maluku Utara

⁶ Bagitu lagi deng raja Daud ada bilang dulu. Dia ada bilang, orang-orang yang Tuhan Allah biking dorang jadi orang yang tara sala pa Dia pe muka, dorang itu sanang skali, karna Tuhan Allah tarima pa dorang, bukang karna dorang biking barang yang bae, tapi karna dorang pe percaya.

Roma 4:6 ပူးပေါင်းရင်းမြစ်များ

Matius 25:19

Lama skali baru dong pe tuang pulang. Bagitu dia datang, dia kumpul dia pe orang-orang karja kong dia suru dia pe orang-orang karja itu kase lapor pa dia, bagimana deng doi yang dia so kase percaya pa dorang.

Roma 1:17

Kabar Bae itu ada kuasa dari Tuhan Allah, karna Kabar Bae itu kase tau bagimana supaya torang bole jadi orang yang tara sala pa Tuhan Allah pe muka. Dia pe cara, torang musti percaya pa Tuhan Allah, tarada cara laeng. Itu sama deng yang so tatulis di Kitab Suci bagini, “Orang yang percaya pa Tuhan, dia itu yang Tuhan biking jadi orang yang tara sala pa Tuhan pe muka, kong dia yang mo hidup deng Tuhan Allah slama-lamanya.”

Roma 3:27

Kong kalu Tuhan Allah sandiri yang biking torang jadi orang yang tara sala, torang tarada alasan untuk puji diri. Jang torang pikir Tuhan Allah anggap tong tara sala pa Dia pe muka, karna torang so iko aturan di lima kitab Musa. Tara bagitu, to? Barang, Tuhan Allah sandiri yang biking torang jadi orang yang tara sala pa Dia pe muka karna torang percaya pa Yesus.

Roma 4:11

Jadi Abraham so percaya dulu pa Tuhan Allah, baru dia dapa sunat. Kong sunat itu yang jadi tanda, Tuhan Allah so tarima pa dia jadi orang yang tara sala karna dia pe percaya pa Tuhan Allah. Deng karna dia pe percaya itu, Abraham jadi samua orang yang percaya pe papa. Biar orang-orang yang percaya itu tara sunat, Tuhan Allah tetap tarima pa dorang jadi orang yang tara sala, karna dorang pe percaya.

Roma 4:24

Tapi itu ada tatulis untuk torang samua. Barang torang me Tuhan Allah tarima sama deng orang yang tara sala pa Tuhan Allah pe muka karna torang percaya pa Dia yang kase hidup ulang pa Yesus. Yesus itu torang pe Tuhan.

Roma 4:5

Tapi torang tara bagitu. Torang jadi orang yang tara sala pa Tuhan Allah pe muka, bukang karna torang pe suar lala, tapi karna torang percaya pa Dia. Dia itu yang biking torang jadi orang yang tara sala pa Dia pe muka, bukang karna torang jaga biking barang yang butul, tapi karna torang pe percaya pa Dia. Dia itu yang bole biking orang yang malawang Dia pe parenta jadi orang yang tara sala pa Dia pe muka.

Roma 4:7

Bagini raja Daud bilang, “Paling sanang skali dorang yang so dapa ampun dari dorang pe kalakuang yang jahat deng dari dorang pe dosa-dosa samua.

Roma 4:9

Rasa sanang itu bukang cuma untuk orang yang dapa sunat saja, tapi untuk orang yang tara dapa sunat lagi. Barang torang so bilang tentang conto Abraham tadi, Tuhan Allah tarima pa dia jadi orang yang tara sala pa Tuhan Allah pe muka, itu karna dia pe percaya pa Tuhan Allah.

1 Korintus 1:30

Barang, Tuhan Allah sandiri yang buka jalang untuk ngoni, supaya ngoni bole percaya pa Kristus Yesus. Deng bagitu, torang bole tau Tuhan Allah pe rencana yang bijaksana untuk kase slamat pa manusia. Yesus Kristus itu yang biking torang jadi orang yang tara sala pa Tuhan Allah pe muka deng yang biking torang jadi Dia pe umat, deng Yesus me yang tebus torang pe dosa-dosa.

2 Korintus 5:21

Yesus Kristus tara perna biking dosa, tapi Tuhan Allah so kase hukuman pa Dia untuk ganti pa torang yang berdosa, supaya torang yang percaya pa Yesus Kristus, Tuhan Allah biking torang jadi orang yang tara sala pa Dia pe muka.

Galatia 3:14

Yesus Kristus serakan Dia pe diri mati bagitu, supaya orang-orang yang bukang Yahudi me bole dapa berkat untuk jadi orang yang tara sala pa Tuhan Allah pe muka, sama deng Tuhan Allah janji pa Abraham deng dia pe turunan Yahudi dulu. Jadi, kalu torang percaya pa Kristus Yesus, torang samua bole tarima Roh Kudus yang Tuhan Allah so janji dari dulu itu.

Galatia 4:15

Waktu itu, ngoni dapa lia sanang skali. Tapi skarang, bikiapa kong ngoni so tara sanang macam bagitu lagi? Kita sandiri bole mo jadi saksi tentang ngoni dulu. Waktu itu ngoni suka skali bantu pa kita, rasa-rasa ngoni mo cungkel lagi ngoni pe mata kong kase pa kita.

Efesus 1:3

Mari suda torang puji pa Tuhan Allah, torang pe Tuhan Yesus Kristus pe Bapa! Dia so kase sagala berkat rohani dari sorga pa torang, karna torang so percaya pa Yesus Kristus.

Filipi 3:9

deng bole hidup satu hati deng Dia. Tuhan Allah biking kita jadi orang yang tara sala pa Dia pe muka, bukang karna kita berusaha iko aturan-aturan di lima kitab Musa, tapi itu cuma karna kita percaya pa Yesus Kristus. Jadi, cuma deng percaya saja pa Yesus Kristus, kita jadi orang yang tara sala pa Tuhan Allah pe muka.

2 Timotius 1:9

Tuhan Allah yang so kase slamat pa torang dari dosa-dosa deng Dia pangge pa torang untuk jadi Dia pe umat sandiri la hidup deng hati bersi. Dia biking samua itu bukang karna torang ada biking yang bae, tapi karna Tuhan Allah pe mau deng karna Dia pe hati bae pa manusia. Memang, dari dulu waktu Tuhan Allah bolong biking dunia ini, Dia so sayang pa torang, jadi Tuhan Allah biking rencana Kristus Yesus datang di dunia.

Yakobus 2:18

Mangkali ada yang tara setuju kong mo bilang bagini, “Ada orang yang cuma percaya saja pa Tuhan, deng ada orang yang cuma biking saja barang yang bae.” Kita mo bilang pa orang yang bilang bagitu, “Ngana tara bisa kase bukti ngana percaya pa Tuhan, karna ngana cuma biking hal yang bae. Tapi kita, kita mo kase tunju kita pe percaya pa Tuhan deng cara biking hal yang bae.”

2 Petrus 1:1

Sudara-sudara yang percaya, salam dari kita Simon Petrus. Kita ini orang yang jaga biking apa yang Yesus Kristus suru, deng kita ini me Dia pe utusan yang orang sebut rasul. Yesus Kristus itu Tuhan Allah, deng Dia me yang kase slamat pa torang dari dosa-dosa. Dia itu yang biking sampe ngoni percaya pa Dia sama deng torang yang so percaya pa Dia, karna Dia salalu biking barang yang butul.