Roma 15:2 - Perjanjian Baru Bahasa Melayu Maluku Utara

² Tapi masing-masing orang dari torang musti biking yang bae pa orang laeng yang percaya, supaya dorang pe percaya pa Tuhan lebe tamba kuat.

Roma 15:2 ပူးပေါင်းရင်းမြစ်များ

Roma 14:19

Jadi, mari suda torang salalu berusaha baku bawa bae-bae deng baku kase kuat torang samua pe percaya.

1 Korintus 10:23

Sudara-sudara, ada yang bilang bagini, “Torang bole biking apa saja yang torang mau.” Itu memang butul, tapi tara samua yang torang mo biking itu ada dia pe guna. Jadi biar lagi torang bole biking samua, tapi tara samua yang tong biking itu, biking torang pe percaya jadi lebe kuat.

1 Korintus 10:24

Jang ada dari ngoni yang berusaha cari dia pe bae sandiri, tapi paling bagus tiap orang berusaha lagi untuk biking orang laeng pe bae.

1 Korintus 10:33

Ngoni biking suda sama deng yang kita jaga biking: di samua hal yang kita biking, kita biking samua itu bae-bae supaya samua orang sanang deng apa yang kita biking itu. Apa saja yang kita biking, itu bukang untuk kita pe bae sandiri, tapi untuk orang banya pe bae, supaya dorang me bole dapa slamat.

1 Korintus 13:5

Kong dia lagi tara biking yang tara sopan, deng tara paksa orang untuk iko dia pe mau. Dia tara pangmara, deng tara simpang hati pa orang yang ada biking sala pa dia.

1 Korintus 14:26

Jadi bagini sudara-sudara, kalu ngoni bakumpul sama-sama untuk baibada, lebe bae ngoni masing-masing ambe bagian: ada yang manyanyi puji pa Tuhan, ada yang mangajar, ada yang kase jelas apa yang Tuhan Allah so kase tunju pa dia, ada yang bicara pake bahasa roh, deng ada lagi yang kase mangarti bahasa roh itu untuk jemaat. Ngoni biking samua itu untuk kase kuat jemaat.

1 Korintus 14:3

Padahal, orang yang dapa karunia untuk kase turus Tuhan Allah pe pasáng pa orang-orang, dia itu bicara pa manusia, kong dia pe kata-kata itu dia pe guna untuk tamba kase kuat dorang pe percaya, untuk kase smangat pa dorang, deng untuk kase hibur pa dorang.

2 Korintus 12:19

Mangkali ngoni pikir, torang tulis samua ini cuma untuk mo bela tong pe diri sandiri saja. Tarada, itu bukang torang pe maksut. Sudara-sudara yang kita sayang, samua yang torang kase tau ini, tong kase tau karna tong so percaya pa Yesus Kristus, kong Tuhan Allah jadi saksi, samua itu butul. Samua yang torang kase tau deng yang tong biking pa ngoni itu, cuma untuk kase kuat ngoni pe percaya.

2 Korintus 13:9

Barang, biar orang lia torang ini pemimpin yang tara kuat, torang pe hati tetap sanang asal ngoni pe percaya kuat pa Tuhan Yesus. Torang minta pa Tuhan la ngoni jadi tamba butul-butul iko pa Dia.

Efesus 4:12

Yesus Kristus kase Dia pe kemampuan pa dorang itu, supaya dorang bole tolong pa orang-orang yang so jadi Tuhan Allah pe umat. Tuhan Allah pe umat itu sama deng Yesus Kristus pe badan. Kalu Tuhan Allah pe umat dapa tolong bagitu, Dia pe umat bole biking dorang pe tugas, deng dorang lagi bole baku kase kuat dong pe percaya,

Efesus 4:29

Kalu ngoni bicara, jang ada kata-kata tara bae kaluar dari ngoni pe mulu. Lebe bae, yang musti ngoni pake waktu bicara itu, kata-kata yang bisa kase kuat orang laeng pe hati, deng kata-kata yang perlu dorang dengar untuk dong pe bae.