Roma 12:2 - Perjanjian Baru Bahasa Melayu Maluku Utara

² Jang ngoni iko dunia ini pe mau. Lebe bae ngoni kase biar la Tuhan Allah ruba ngoni pe pikiran jadi baru supaya ngoni pe kalakuang me beruba. Karna deng ngoni pe pikiran yang baru, ngoni bole tau Tuhan Allah pe mau: yang bagus, yang butul, deng yang biking Dia pe hati sanang.

Roma 12:2 ပူးပေါင်းရင်းမြစ်များ

Matius 13:22

Bibit yang jatu di tana yang ada rumpu baduri, itu sama deng orang-orang yang so dengar firman, tapi dong pe hati tara tenang tentang dong pe hidup, deng dong cuma cari harta. Jadi firman yang dorang dengar itu dorang tara biking, sampe firman itu tara bawa hasil apa-apa.

Markus 4:19

tapi dorang pe hati tara tenang tentang dong pe hidup, deng dorang cuma cari harta deng keinginan-keinginan yang laeng. Jadi firman yang dorang dengar itu dorang tara biking, sampe firman itu tara bawa hasil apa-apa.

Yohanes 14:30

Kita so tara bicara banya lagi deng ngoni, karna Iblis, setang-setang pe raja mo datang. Iblis berkuasa di dunia ini, tapi dia tara berkuasa untuk ator pa Kita.

Yohanes 15:19

Kalu misalnya ngoni ini sama deng dorang, pasti dorang sayang pa ngoni sama deng ngoni jadi dorang pe ana-ana. Tapi ngoni ini beda deng dorang. Kita pili pa ngoni supaya ngoni beda deng dorang, jadi dorang binci pa ngoni.

Yohanes 17:14

Kita so kase tau Bapa pe firman pa dorang yang iko pa Kita. Kong orang-orang di dunia ini yang tara percaya pa Bapa binci pa dorang, barang dorang yang iko pa Kita tara sama deng orang-orang yang tara percaya pa Bapa. Itu sama deng Kita lagi tara sama deng orang-orang yang tara percaya pa Bapa.

Yohanes 7:7

Barang, orang-orang yang tara percaya pa Kita, dorang itu tara binci pa ngoni, tapi dorang binci pa Kita, karna Kita kase tau dorang pe kalakuang jahat.

Roma 12:1

Sudara-sudara, Tuhan Allah bagitu kasiang pa torang. Karna itu, kita minta butul-butul pa ngoni: serakan suda ngoni pe diri pa Tuhan Allah untuk iko Dia pe mau, itu sama deng ngoni pe hidup so jadi korban persembahan pa Dia. Ngoni kase ngoni pe hidup jadi Dia punya, deng ngoni hidup untuk biking Dia pe hati sanang. Itu baru bilang ngoni pe ibada itu butul.

Roma 13:14

Tapi lebe bae tiap hari torang iko cara hidup yang Yesus Kristus torang pe Tuhan so kase conto. Deng jang sama skali torang iko manusia pe mau yang suka biking dosa untuk kase puas torang pe keinginan.

Roma 7:12

Jadi, aturan-aturan di lima kitab Musa itu suci, kong samua parenta yang ada di aturan-aturan itu me butul deng bagus. Samua aturan itu dari Tuhan Allah.

Roma 7:14

Torang tau, aturan di lima kitab Musa itu Tuhan Allah yang kase. Tapi kita ini cuma manusia yang suka biking dosa, itu sama deng dosa so jadi kita pe tuang.

Roma 7:22

Karna, di kita pe hati, kita suka skali iko Tuhan Allah pe aturan.

1 Korintus 3:19

Karna apa yang manusia anggap pande, itu bodo pa Tuhan Allah pe muka. Itu so tatulis di Kitab Suci bagini, “Tuhan Allah biking sampe orang yang anggap diri pande itu pe rencana tara jadi, kong dong pe rencana itu tabale pa dong pe diri sandiri.”

2 Korintus 4:4

Dorang tara percaya Kabar Bae itu karna Iblis, setang-setang pe raja, yang tutu dong pe pikiran. Iblis itu yang orang banya di dunia iko pa dia. Deng bagitu, dorang tara dapa tau Kabar Bae itu butul, deng dorang tara mangarti Yesus Kristus yang pe kuasa luar biasa itu sama persis deng Tuhan Allah.

2 Korintus 5:17

Karna itu, sapa saja yang so percaya pa Yesus Kristus, dia itu so jadi manusia baru. Dia pe sifat dulu-dulu yang tara bae itu so ilang. Samua so jadi baru.

Galatia 1:4

Tuhan Yesus Kristus yang so serakan Dia pe diri untuk tebus torang pe dosa-dosa, supaya Dia bole kase bebas pa torang dari kuasa jahat yang skarang ada di dunia ini. Dia biking samua itu, iko Tuhan Allah, torang pe Bapa pe mau.

Efesus 1:18

Kong kita minta lagi supaya Dia buka ngoni pe hati, la ngoni bisa mangarti butul samua hal yang ngoni bole harap pa Dia karna ngoni yang Dia so pili jadi Dia pe umat. Deng kita minta lagi supaya ngoni mangarti pe hebat skali samua janji yang Dia mo kase pa ngoni itu.

Efesus 2:2

Waktu itu, ngoni hidup masi suka biking dosa sama deng orang yang bolong kanal pa Tuhan Allah, baru ngoni lagi iko Iblis pe mau. Iblis itu setang-setang pe raja yang berkuasa di udara, deng dia itu suda yang skarang ini ada pengaru pa orang-orang yang tara dengar-dengaran pa Tuhan Allah.

Efesus 5:17

Jang ngoni sama deng orang yang bodo, tapi ngoni berusaha suda supaya ngoni mangarti bae-bae Tuhan pe mau.

Kolose 1:9

Jadi, mulai dari torang dengar tentang ngoni pe percaya itu, torang tara berenti-berenti berdoa untuk ngoni. Torang minta pa Tuhan Allah, supaya Dia pe Roh Kudus buka ngoni pe pikiran deng biking ngoni lebe mangarti tentang Tuhan Allah, supaya ngoni butul-butul tau Dia pe mau.

Kolose 3:10

Kong skarang ngoni yang so jadi percaya, ngoni pe hidup so beruba jadi baru, kong lebe hari Tuhan Allah lebe tamba ruba turus-turus ngoni pe sifat la jadi sama deng Dia pe sifat. Dia biking bagitu la ngoni bisa lebe tamba kanal pa Dia.

Kolose 4:12

Epafras lagi ada kirim salam pa ngoni. Dia satu jemaat deng ngoni, dia lagi jaga biking apa yang Kristus Yesus suru. Dia salalu berdoa sunggu-sunggu untuk ngoni. Dia minta pa Tuhan Allah supaya ngoni pe percaya pa Kristus Yesus jadi kuat deng supaya ngoni butul-butul tau Tuhan Allah pe mau.

1 Tesalonika 4:3

Ini Tuhan Allah pe mau: serakan ngoni pe hidup pa Dia la ngoni hidup deng hati bersi. Jang ngoni baseks sabarang.

Titus 3:5

Tuhan Allah kase slamat pa torang, bukang karna torang so biking barang yang butul, tapi itu karna Dia sayang pa torang. Deng Roh Kudus pe kuasa, Dia biking torang jadi bersi dari torang pe dosa-dosa, la torang pe hubungan deng Tuhan Allah jadi baru, sama deng torang lahir ulang.

Yakobus 1:27

Tapi ibada yang butul yang torang musti biking pa Tuhan Allah, torang pe Bapa pe muka itu, bagini: tolong pa ana-ana yang dong pe orang tua so tarada, tolong pa janda-janda yang susa, deng jaga diri bae-bae la tara tagoda iko dunia pe mau yang jahat.

Yakobus 4:4

Ee, ngoni orang-orang yang tara setia pa Tuhan! Ngoni pasti tau, kalu ngoni cuma iko dunia pe mau, itu ngoni so baku musu deng Tuhan Allah. Sapa yang suka batamang deng dunia ini pe sanang, dia sandiri yang biking dia pe diri baku musu deng Tuhan Allah.

1 Petrus 1:14

Ngoni ini Tuhan Allah pe ana-ana, jadi ngoni dengar-dengaran suda pa Dia, deng jang ngoni iko keinginan yang tara bae yang kuasai ngoni pe hidup dulu waktu ngoni bolong percaya pa Tuhan.

1 Petrus 1:18

Barang ngoni tau, Tuhan Allah bayar mahal supaya ngoni dapa bebas dari ngoni pe cara hidup yang lama yang tara ada dia pe guna. Cara hidup yang lama itu yang ngoni tarima dari ngoni pe orang tua dulu-dulu. Tuhan Allah bayar mahal supaya ngoni bole bebas, itu Dia tara bayar deng barang yang nanti mo rusak macam deng mas atau perak,

1 Petrus 2:3

Ngoni musti suka skali Tuhan pe firman karna memang ngoni sandiri so rasa Tuhan pe bae.

1 Petrus 4:2

Jadi selama ngoni masi hidup di dunia, ngoni pake waktu yang ada untuk iko Tuhan Allah pe mau, jang iko manusia pe keinginan.

2 Petrus 1:4

Kong karna Dia hebat deng hati bae itu, Dia kase pa torang slamat, deng kase banya hal yang laeng lagi yang bagus deng berharga, sama deng yang Dia so janji. Dia kase itu supaya ngoni bisa talapas dari keinginan yang tara bae yang bisa kase rusak manusia pe hidup, deng supaya ngoni pe sifat bisa beruba jadi bae sama deng Dia pe sifat.

2 Petrus 2:20

Kita pe maksut, kalu dorang itu so kanal pa Yesus Kristus torang pe Tuhan deng Juruslamat, dorang me so lapas dari dunia pe mau yang jahat. Tapi kalu dorang bale ulang untuk iko keinginan-keinginan yang jahat itu, dorang pe keadaan nanti mo lebe soe dari yang pertama.

1 Yohanes 3:13

Sudara-sudara, jang ngoni herang kalu orang-orang yang tara percaya binci pa ngoni.

1 Yohanes 5:19

Biar Iblis kuasai seluru dunia ini, torang tau, torang ini Tuhan Allah pe ana-ana.

Wahyu 12:9

Naga basar itu, setang-setang pe raja yang dong jaga bilang ‘Iblis’. Naga itu yang dari dulu salalu kase sesat orang-orang di seluru dunia ini. Dia deng malaekat-malaekat yang iko pa dia, samua dapa buang dari sorga di bumi.

Wahyu 13:8

Kong samua orang yang tinggal di bumi mo semba pa binatang itu. Orang-orang yang semba itu, dorang yang pe nama tara tatulis di Anak Domba pe buku kehidupan waktu dunia ini bolong jadi. Buku kehidupan itu, Anak Domba yang so perna dapa bunu pe buku. Di buku itu, Tuhan Allah tulis orang-orang pe nama yang mo dapa hidup deng Tuhan Allah slama-lamanya.