Matius 7:6 - Perjanjian Baru Bahasa Melayu Maluku Utara

⁶ Jang ngoni kase Tuhan pe firman pa orang yang tara mau tarima. Barang, itu sama deng ngoni buang apa yang kudus di anjing kong anjing itu cuma bale gigi pa ngoni, atau sama deng ngoni buang mutiara yang mahal ka sana di babi kong babi itu cuma injang-injang mutiara itu.”

Matius 7:6 ပူးပေါင်းရင်းမြစ်များ

Matius 15:26

Di situ Dia bilang bagini, “Ngana bukang orang Israel, jadi kalu Kita tolong pa ngana, itu tara bagus, sama deng Kita ada ambe roti yang so sadia untuk ana-ana, kong kase di anjing.”

Matius 24:10

Turus, banya orang yang percaya pa Kita so tara mo percaya lagi. Dorang mo baku binci deng serakan dong pe tamang la dapa siksa.

Matius 7:5

Ee, ngoni orang munafik, kase kaluar dulu balak spanggal dari ngoni pe mata, baru ngoni bisa lia bae-bae, supaya ngoni bisa kase kaluar ampas kayu dari ngoni pe sudara pe mata.

2 Korintus 11:26

So ulang-ulang kita pigi ka mana-mana kase tau Kabar Bae tentang Yesus Kristus, banya kali bahaya yang kita dapa yang biking kita amper mati macam deng bagini: kita dapa banjir, kita dapa rampok, kita dapa tantang dari orang-orang satu bangsa deng kita deng dari orang-orang yang bukang Yahudi lagi. Kita mangada lagi bahaya yang ada di kota deng bahaya di padang gurun, bahaya di laut, deng bahaya dari orang-orang yang bilang dong percaya pa Tuhan Yesus, padahal tarada.

Filipi 3:2

Ngoni musti ati-ati deng orang-orang yang bawa ajaran yang tara butul, dorang yang bilang kata, kalu ngoni mo jadi Tuhan Allah pe umat, ngoni musti dapa sunat dulu. Padahal, deng dorang paksa pa ngoni bagitu, dorang jahat sama deng anjing-anjing. Dorang itu sama saja deng orang yang tara percaya.

Ibrani 10:29

Orang yang tara iko lima kitab Musa saja dapa hukuman barát bagitu, apalagi orang yang so pandang enteng pa Anak Allah, dia pasti dapa hukuman yang lebe barát lagi karna dia so tolak pa Yesus Kristus. Dia sama deng so injang-injang pa Anak Allah, deng anggap Yesus Kristus pe dara tara arti apa-apa. Padahal, Yesus Kristus pe dara so tatumpa untuk biking janji yang baru antara manusia deng Tuhan Allah, kong dara itu lagi yang biking orang itu jadi Tuhan Allah pe umat yang bersi dari dosa. Jadi orang yang pandang enteng itu so hina pa Roh Kudus, padahal Roh Kudus itu yang Tuhan Allah kase pa torang cuma karna Dia pe bae pa torang.

Ibrani 6:6

Kong biar dorang so tau deng rasa samua itu, dorang so kase tinggal dorang pe percaya pa Dia, jadi tara mungkin mo pimpin bale pa dorang untuk bertobat. Barang, deng dorang kase tinggal dong pe percaya itu, dorang sama deng so kase salib ulang pa Anak Allah deng kase malu pa Dia di muka umum.

2 Petrus 2:22

Yang dorang biking itu, memang sama deng orang jaga bilang bagini, ‘Anjing bale jilat ulang dia pe munta, deng babi yang so bersi, bale ulang di pece-pece.’

Wahyu 22:15

Tapi ada orang-orang yang tara bole maso di kota itu. Dorang itu: orang yang tara percaya pa Tuhan, orang yang jaga pake tiop-tiop, orang yang baseks sabarang, orang yang jaga bunu orang, orang yang semba dong pe puji-puji, deng tiap orang yang suka bafoya kong biking itu turus-turus.