Matius 7:25 - Perjanjian Baru Bahasa Melayu Maluku Utara

²⁵ Jadi waktu ujang basar sampe banjir datang deng angin kuat bage ruma itu, ruma itu tara rubu karna dia badiri di atas batu fandasi yang kuat.

Matius 7:25 ပူးပေါင်းရင်းမြစ်များ

Matius 16:18

Karna itu, Kita kase nama pa ngana Petrus, yang pe arti, batu fandasi yang kuat. Kong di atas batu fandasi itu Kita mo kase badiri Kita pe jemaat. Kong Kita pe jemaat itu akan ada turus, tarada apa-apa yang mampo kase berenti pa dorang, biar itu kuasa kematian.

Matius 7:24

Yesus bilang lagi, “Tiap orang yang dengar apa yang Kita bilang ini kong biking, dia itu sama deng orang pande yang kase badiri ruma di atas batu fandasi yang kuat.

Matius 7:26

Tapi tiap orang yang dengar apa yang Kita bilang ini kong dia tara biking, dia sama deng orang bodo yang kase badiri ruma di atas paser.

Matius 7:27

Waktu ujang basar sampe banjir datang, deng angin kuat bage ruma itu, ruma itu rubu kong rusak barát.”

Kisah Para Rasul 14:22

Di tampa-tampa itu, Paulus deng Barnabas kase kuat orang-orang percaya pe hati deng kase nasehat supaya dorang tetap batahang percaya pa Tuhan Yesus. Paulus deng Barnabas bilang pa dorang, “Kalu torang mau jadi Tuhan Allah pe umat yang Dia Berkuasa sebagai Raja, torang akan dapa banya sengsara.”

Efesus 3:17

supaya Yesus Kristus tetap tinggal di ngoni pe hati karna ngoni percaya pa Dia. Kita minta pa Tuhan Allah supaya ngoni pe sayang lebe tamba basar pa Tuhan Allah deng pa samua orang, itu sama deng pohong pe akar yang lebe tatanam kuat di tana.

Kolose 2:7

Ngoni pe percaya pa Dia musti kuat, sama deng pohong pe akar yang tatanam kuat di tana. Deng ngoni pe hidup musti bagantong kuat pa Dia, sama deng ruma yang ada bangun di atas fandasi yang kuat. Kong ngoni pe percaya pa Dia me musti lebe tamba kuat, iko sama deng ajaran yang ngoni so tarima. Kong ngoni musti salalu bilang tarimakasi banya pa Tuhan Allah.

Yakobus 1:12

Orang yang dapa cobaan kong batahang deng tetap percaya pa Tuhan, dia itu orang yang paling sanang. Karna kalu dia berhasil lolos dari samua cobaan itu, dia mo dapa hadia. Hadia itu, hidup deng Tuhan Allah slama-lamanya. Itu yang Tuhan Allah so janji mo kase pa orang-orang yang sayang pa Dia.

1 Petrus 1:5

Ngoni ini, Tuhan Allah ada jaga deng Dia pe kuasa karna ngoni percaya pa Dia. Dia jaga pa ngoni sampe ngoni mo dapa slamat dari dosa-dosa. Slamat itu yang Dia so kase sadia di hari kiamat nanti.

1 Petrus 1:7

Sengsara yang ngoni dapa itu jadi bukti, ngoni butul-butul percaya pa Tuhan. Itu sama deng mas yang kalu mo tau dia pe asli musti bakar dulu deng api. Tapi ngoni pe percaya lebe berharga dari mas, karna mas itu tara akan ada turus-turus. Kalu ngoni so lolos dari cobaan itu, nanti di hari kiamat, waktu Yesus Kristus datang ulang, Dia mo puji deng hormat pa ngoni.

1 Yohanes 2:19

Dorang yang musu pa Yesus Kristus itu, dulu dorang satu jemaat deng torang. Tapi dorang so kaluar dari torang. Kalu dorang butul iko Tuhan sama deng torang, dorang tara kase tinggal pa torang. Tapi biar bagitu suda, supaya torang tau, dorang itu tara sama deng torang yang iko pa Tuhan.