Matius 7:15 - Perjanjian Baru Bahasa Melayu Maluku Utara

¹⁵ Yesus bilang lagi, “Ngoni musti ati-ati deng nabi-nabi palsu yang datang pa ngoni! Barang, dorang bilang kata, dorang itu orang yang jaga kase turus Tuhan Allah pe pasáng, padahal bukang. Dorang pura-pura bae sama deng domba, padahal dorang jahat sama deng anjing utang.

Matius 7:15 ပူးပေါင်းရင်းမြစ်များ

Matius 10:17

Ngoni musti ati-ati pa samua orang! Barang, ada orang-orang yang mo serakan pa ngoni la dapa adili di pemimpin-pemimpin agama Yahudi. Ngoni me mo dapa pukul di ruma-ruma ibada agama Yahudi, pake tali yang ada barang tajam di dia pe ujung.

Matius 16:11

Turus kalu bagitu, bikiapa kong skarang ngoni tara mangarti? Sebenarnya, yang Kita bilang tadi itu bukang tentang roti. Tapi Kita bilang ulang lagi pa ngoni, ngoni musti ati-ati deng ragi dari orang-orang aliran Farisi deng aliran Saduki!”

Matius 16:6

Kong Yesus bilang pa dorang, “Ngoni musti ati-ati deng orang dari aliran Farisi pe ragi deng yang dari aliran Saduki pe ragi.”

Matius 24:11

Nanti ada banya orang yang datang, bilang kata, dorang itu nabi yang kase turus Tuhan Allah pe pasáng. Padahal dorang cuma tipu la banya orang so tara percaya lagi.

Matius 7:14

Tapi, kalu ngoni maso iko pintu yang sempit, ngoni mo dapa hidup deng Tuhan Allah slama-lamanya, dia pe jalang memang sengsara, deng cuma sadiki orang yang iko di situ.”

Lukas 12:15

Kong Yesus bicara pa orang banya yang ada di situ, “Ati-ati deng jaga diri bae-bae, jang sampe ngoni tara puas deng apa yang ngoni punya. Karna manusia pe hidup itu bukang cuma dari harta saja biar dia kaya skali lagi.”

Lukas 6:26

Kong ngoni yang dapa puji dari samua orang, cilaka suda ngoni, karna itu sama deng yang jadi dulu-dulu pa nabi-nabi yang tara butul. Dorang bilang kata, dong bawa Tuhan Allah pe pasáng, padahal tarada. Ngoni pe orang tua dulu-dulu jaga puji pa dorang.”

Yohanes 10:12

Tapi orang yang bukang domba pe gembala, dia dapa bayar untuk jaga domba-domba itu. Domba-domba itu bukang dia punya, jadi waktu dia lia anjing utang datang, dia lari kase tinggal domba-domba itu sampe anjing utang datang serang domba-domba itu, kong domba-domba laeng jadi tako kong lari takaruang.

Kisah Para Rasul 13:40

Jadi skarang, ngoni musti bae-bae, supaya apa yang Tuhan Allah bilang dulu itu pa Dia pe nabi-nabi, tara mo jadi pa ngoni. Bagini yang Tuhan Allah bilang,

Kisah Para Rasul 13:6

Abis itu, dorang bakuliling di samua tampa di pulo itu sampe di kota Pafos. Di situ, dorang baku dapa deng orang Yahudi satu, dia pe nama Baryesus. Dia itu tukang tiop-tiop. Orang bilang kata, dia itu yang jaga kase turus Tuhan Allah pe pasáng, padahal dia foya.

Galatia 2:4

Memang ada babarapa orang laeng yang tantang supaya Titus dapa sunat. Dorang itu maso babadiam di jemaat, biking diri percaya pa Yesus Kristus sama deng torang, padahal dorang itu cuma mo cari tau pa torang. Dorang lia torang so bebas dari aturan-aturan di lima kitab Musa karna torang so percaya pa Kristus Yesus, kong dorang mo biking torang taika ulang deng aturan-aturan itu, sama deng orang karja yang taika pa dia pe tuang.

Efesus 4:14

Kalu torang pe percaya so kuat bagitu, torang so tara gampang dapa tipu sama deng ana kacil. Jadi kalu ada orang yang datang kase ajar ajaran macam-macam yang tara butul untuk pengaru pa torang, torang tara akan gampang taiko pa dorang. Torang tara akan sama deng omba yang kasana-kamari iko angin batiop.

Efesus 5:6

Jang ngoni dapa kase bodo dari orang-orang yang bilang kata, hal-hal itu bukang dosa. Barang, Tuhan Allah pasti mo hukum pa orang-orang yang biking hal-hal itu, karna dorang tara dengar-dengaran pa Tuhan Allah.

Filipi 3:2

Ngoni musti ati-ati deng orang-orang yang bawa ajaran yang tara butul, dorang yang bilang kata, kalu ngoni mo jadi Tuhan Allah pe umat, ngoni musti dapa sunat dulu. Padahal, deng dorang paksa pa ngoni bagitu, dorang jahat sama deng anjing-anjing. Dorang itu sama saja deng orang yang tara percaya.

Kolose 2:8

Sudara-sudara, ngoni musti ati-ati, jang sampe ada orang yang pengaru pa ngoni untuk iko deng dong pe ajaran-ajaran agama yang tara butul. Dorang pe ajaran itu tara ada dia pe guna, karna bukang ajaran tentang Yesus Kristus. Tapi dorang pe ajaran itu dari dong pe orang tua dulu-dulu deng dari roh-roh yang berkuasa di dunia ini.

2 Timotius 3:13

Tapi orang yang jahat deng yang tukang tipu, dorang itu lebe hari lebe tamba jahat. Dorang tipu pa orang-orang kong orang laeng me tipu pa dorang.

2 Timotius 4:3

Ngana musti rajin biking itu karna akan ada dia pe waktu, orang-orang tara mau dengar lagi ajaran yang butul. Mala dorang cuma mo pangge guru-guru agama yang dorang suka. Guru-guru itu mo bilang pa dorang hal-hal yang dorang suka dengar saja supaya cuma iko dorang pe mau.

2 Petrus 3:17

Jadi sudara-sudara yang kita sayang, ngoni so kamuka tau samua itu. Karna itu ngoni musti ati-ati deng guru-guru palsu yang jaga malawang Tuhan Yesus pe ajaran, supaya ngoni tara iko dong pe sala itu, tapi ngoni tetap percaya.

1 Yohanes 4:1

Sudara-sudara yang kita sayang, jang ngoni percaya pa samua orang yang bilang, pa dorang ada Tuhan Allah pe Roh. Lebe bae ngoni lia dulu bae-bae kalu dorang butul dari Tuhan ka bukang, karna banya orang yang datang skarang bilang kata, dong kase turus Tuhan Allah pe pasáng, padahal bafoya. Dorang cuma nabi palsu.

Yudas 1:4

Barang, ada orang-orang yang bawa ajaran yang tara butul yang so maso pa ngoni pe jemaat, tapi ngoni tara sadar. Dorang itu tara iko Tuhan Allah pe mau. Dorang memang so tarima ajaran tentang torang pe Tuhan Allah pe bae, tapi dorang kase putar bale ajaran itu la orang bisa iko dorang pe napsu yang tara bae. Deng dorang me manyangkal, Yesus Kristus yang cuma satu itu saja torang pe Tuhan, yang berkuasa pa samua-samua. Orang-orang model bagini, dari dulu ada tatulis di Kitab Suci, dorang memang akan dapa hukuman.

Wahyu 16:13

Kong kita lia ada setang tiga yang dong pe rupa sama deng kodok. Dari tiga setang itu, satu kaluar dari naga pe mulu, satu kaluar dari binatang jahat pe mulu deng satu lagi kaluar dari nabi palsu pe mulu.

Wahyu 17:6

Kita lia parampuang tara bae itu mabo karna dia minum dara dari orang-orang yang so jadi Tuhan Allah pe umat, deng dara dari orang-orang yang mati karna kase tau tentang Tuhan Yesus. Waktu kita lia itu, kita herang skali.

Wahyu 19:20

Tapi, Dia deng Dia pe tentara-tentara langsung tangka pa binatang jahat itu deng tangka pa binatang jahat itu pe nabi palsu. Nabi palsu itu yang perna biking tanda-tanda yang biking orang herang, pake binatang itu pe kuasa. Dia biking tanda-tanda itu la biking sesat pa orang-orang yang so tarima cap dari binatang jahat itu, deng yang so semba pa binatang jahat itu pe patong. Binatang jahat deng nabi palsu itu dapa buang hidup-hidup di api belerang yang luas skali.

Wahyu 20:10

Turus, Iblis yang kase sesat pa orang-orang itu dapa lempar di api belerang yang luas skali. Binatang jahat deng nabi palsu so dapa buang kamuka di situ. Kong dorang samua dapa siksa siang deng malam sampe slama-lamanya.