Matius 5:37 - Perjanjian Baru Bahasa Melayu Maluku Utara

³⁷ Jadi kalu memang butul, bilang saja, ‘Iyo’. Kalu tarada, bilang saja ‘Tarada’. Karna kalu ngoni bilang lebe dari itu, itu pe asal so dari Iblis, setang-setang pe raja.”

Matius 5:37 ပူးပေါင်းရင်းမြစ်များ

Matius 13:19

Bibit yang jatu di jalang itu sama deng orang-orang yang dengar firman tentang Tuhan Allah Berkuasa sebagai Raja, tapi dorang tara mangarti butul-butul. Pe abis dorang dengar firman Tuhan itu, Iblis, setang-setang pe raja datang kong ambe firman itu dari dorang pe hati.

Matius 13:38

Kalu kobong itu, sama deng dunia. Turus, bibit yang bagus itu, sama deng orang-orang yang Tuhan Allah so Berkuasa sebagai Raja pa dorang. Tapi bibit kusu-kusu itu, sama deng orang-orang yang iko pa Iblis, setang-setang pe raja.

Matius 15:19

Barang, dari manusia pe dalam hati, timbul samua yang jahat: pikiran yang jahat, bunu orang, baku suka deng orang yang bukang dia pe laki atau dia pe bini, baseks sabarang, bapancuri, jadi saksi yang tara butul, deng kase tara bae orang pe nama.

Matius 5:36

Ngoni me jang basumpa demi ngoni pe kapala sandiri, karna ngoni tarada kuasa la mo biking puti atau itam ngoni pe rambu biar cuma satu ujung rambu.

Matius 6:13

Kong jang kase biar torang tagoda biking barang yang jahat, tapi kase lapas suda pa torang dari yang jahat. [Karna Bapa yang jadi Raja, Bapa yang punya kuasa, deng yang pantas dapa puji deng hormat sampe slama-lamanya. Amin.’]

Yohanes 17:15

Bapa, Kita tara minta pa Bapa supaya Bapa kase jao pa dorang dari orang-orang yang tara percaya pa Bapa. Tarada. Tapi Kita minta supaya Bapa jaga pa dorang dari Iblis, setang-setang pe raja.

Yohanes 8:44

Ngoni pe papa itu Iblis, setang-setang pe raja, barang ngoni suka biking ngoni pe papa itu pe mau. Iblis itu, dari dulu sampe skarang ini, dia pangbunu orang. Dia tara tau biking yang butul, karna pa dia itu tara ada yang butul. Waktu dia bafoya, dia bilang itu memang dari dia pe sifat sandiri, karna dia itu pangbafoya, kong dia itu samua pangbafoya pe papa.

Efesus 4:25

Jadi, berenti suda bicara yang foya-foya, tapi bicara suda yang butul-butul satu deng yang laeng, karna torang orang percaya ini so taika jadi satu sama deng kaki, tangan, deng samua-samua yang ada pa torang pe badan.

Efesus 6:16

Kong di keadaan apa saja, ngoni musti pegang kuat ngoni pe percaya, supaya ngoni bole lawan pa Iblis yang mo serang pa ngoni. Deng bagitu, ngoni itu bole kase sama deng tentara yang salalu pegang dia pe alat prang untuk kase pele dia pe diri dari samua pana api dari musu yang datang serang.

Kolose 3:9

Jang ngoni baku kase foya satu deng yang laeng, karna ngoni so buang ngoni pe hidup yang lama deng dia pe kalakuang yang tara bae itu.

Kolose 4:6

Waktu ngoni bicara pa dorang, bicara bae-bae la dorang pe hati sanang deng dong suka dengar apa yang ngoni bilang. Kalu ngoni jaga bicara bae-bae bagitu, nanti ngoni akan tau apa yang pantas ngoni jawab pa tiap-tiap orang yang tanya tentang ngoni pe percaya.

2 Tesalonika 3:3

Tuhan Allah itu setia. Dia mo kase kuat ngoni pe hati deng jaga pa ngoni dari yang jahat.

Yakobus 5:12

Sudara-sudara, yang paling penting itu, waktu ngoni bilang satu barang atau bajanji tentang satu hal, jang ngoni kase kuat ngoni pe kata-kata atau ngoni pe janji itu pake sumpa demi nama Tuhan Allah, demi orang di bumi, atau demi apa saja. Kalu yang ngoni bilang itu butul, ngoni cukup bilang saja “Iyo”. Kalu itu tara butul, bilang saja “Tarada”. Kalu ngoni biking bagitu, Tuhan Allah tara akan hukum pa ngoni.

1 Yohanes 2:13

Bapa-bapa, kita tulis surat ini pa ngoni, karna ngoni so kanal pa Dia yang so ada dari dulu waktu dunia ini bolong ada. Kita me tulis surat ini pa ngoni pemuda-pemuda karna ngoni so kase kala Iblis, setang-setang pe raja.

1 Yohanes 3:12

Jang ngoni sama deng Kain. Iblis so kuasai pa dia jadi dia bunu dia pe ade sandiri. Kain bunu pa dia pe ade karna Kain itu jahat, deng karna samua yang dia pe ade biking, Tuhan Allah lia itu butul.

1 Yohanes 5:18

Torang tau, samua orang yang so jadi Tuhan Allah pe ana-ana, dorang so tara biking dosa lagi. Barang, Anak Allah jaga pa dorang, sampe Iblis, setang-setang pe raja tara mampo mo kase kala pa dorang.