Matius 3:11 - Perjanjian Baru Bahasa Melayu Maluku Utara

¹¹ Kita baptis pa ngoni deng aer, tanda ngoni so bertobat kong iko pa Tuhan Allah. Tapi abis kita ini, ada satu Orang yang mo datang, Dia pe kuasa lebe basar dari kita. Kong mo jadi Dia pe suru-suru yang bawa Dia pe sandal saja me, kita tara pantas. Dia itu nanti yang mo baptis pa ngoni pake Roh Kudus deng api.

Matius 3:11 ပူးပေါင်းရင်းမြစ်များ

Matius 3:6

Dorang mangaku dong pe dosa-dosa, turus Yohanes baptis pa dorang di kali Yordan.

Markus 1:4

Tuhan pe utusan itu pe nama Yohanes Pembaptis. Dia datang di padang gurun, tampa yang jao dari kampong, kong di situ dia kase tau pa orang-orang bagini, “Bertobat suda kong iko pa Tuhan Allah, deng bagitu Tuhan Allah mo kase ampun pa ngoni. Kong kase suda ngoni pe diri la dapa baptis, itu tanda ngoni so bertobat.”

Lukas 1:17

Ana itu nanti pe kuasa basar sama deng nabi Elia dulu, karna Roh Kudus so kuasai pa dia. Kong dia mo datang kamuka sebelum Tuhan datang. Dia mo biking orang tua laki-laki pe hati baku bae deng dong pe ana-ana. Dia me akan biking orang yang malawang Tuhan Allah pe parenta jadi orang yang jaga biking barang yang butul. Deng bagitu, dia mo kase siap orang-orang supaya jadi pantas untuk jadi Tuhan Allah pe umat.”

Lukas 3:16

Tapi Yohanes bilang pa dorang samua, “Kita baptis pa ngoni deng aer, tanda ngoni so bertobat kong iko pa Tuhan Allah. Tapi nanti, ada satu Orang yang mo datang, Dia pe kuasa lebe basar dari kita. Kong mo jadi Dia pe tukang suru-suru, yang buka Dia pe tali sandal saja me, kita tara pantas. Dia itu nanti yang mo baptis pa ngoni pake Roh Kudus deng api.

Lukas 3:3

Karna itu, Yohanes pigi di samua daera dekat kali Yordan, kong kase tau pa orang-orang bagini, “Bertobat suda kong iko pa Tuhan Allah, deng bagitu Tuhan Allah mo kase ampun pa ngoni. Kong kase suda ngoni pe diri la dapa baptis, itu tanda ngoni so bertobat.”

Yohanes 1:15

Satu kali bagini, Yohanes Pembaptis kase tau pa orang-orang tentang Yesus, Firman itu. Yohanes kase tau pa dorang deng suara yang kuat, bagini, “Dia itu suda yang kita pe maksut waktu kita bilang, ‘Nanti ada yang mo datang abis kita, Dia lebe hebat dari kita. Barang sebelum kita ada di dunia ini, Dia so kamuka ada.’ ”

Yohanes 1:30

Dia itu suda yang kita pe maksut waktu kita bilang, ‘Nanti ada yang mo datang abis kita. Dia lebe hebat dari kita karna Dia memang so kamuka ada sebelum kita lahir.’

Kisah Para Rasul 1:5

Barang, dulu Yohanes baptis pa orang deng aer, tapi tara lama lagi Tuhan Allah mo baptis pa ngoni deng Roh Kudus.”

Kisah Para Rasul 19:4

Kong Paulus bilang pa dorang, “Waktu Yohanes baptis orang, itu tanda dorang so bertobat. Tapi Yohanes me kase tau lagi pa orang-orang, nanti abis dia, ada satu Orang lagi mo datang, kong dorang musti percaya pa Dia. Dia itu pe nama Yesus.”

Kisah Para Rasul 8:36

Waktu dorang di tenga jalang, dorang dapa tampa satu yang ada aer. Kong pejabat itu bilang pa Filipus, “Coba lia, di situ ada aer! Apa kita so bole dapa baptis?” [

Kisah Para Rasul 8:38

Abis bilang bagitu, pejabat itu suru kase berenti dia pe kereta. Turus, dia deng Filipus turung di aer kong Filipus baptis pa dia.

1 Korintus 12:13

Barang torang ini, ada orang Yahudi, deng ada yang bukang Yahudi. Ada orang karja yang dia pe tuang so bili, deng ada orang yang bebas. Torang samua Roh Kudus biking torang jadi satu, karna torang samua dapa baptis dari Roh Kudus yang sama. Roh Kudus yang sama itu, yang so ada pa torang samua, itu sama deng torang ada minum dari mata aer yang sama.

Efesus 3:8

Dari samua yang so jadi Tuhan Allah pe umat, kita ini suda yang paling tarada arti apa-apa. Tapi biar bagitu, Tuhan Allah kase Dia pe bae pa kita untuk kita kase tau Kabar Bae tentang Yesus Kristus pa orang-orang bukang Yahudi. Kita kase tau pa dorang tentang sagala hal yang talebe-lebe, yang Dia so rencana mo kase pa orang yang percaya pa Dia.

Titus 3:5

Tuhan Allah kase slamat pa torang, bukang karna torang so biking barang yang butul, tapi itu karna Dia sayang pa torang. Deng Roh Kudus pe kuasa, Dia biking torang jadi bersi dari torang pe dosa-dosa, la torang pe hubungan deng Tuhan Allah jadi baru, sama deng torang lahir ulang.

1 Petrus 5:5

Bagitu lagi deng ngoni yang masi muda, ngoni musti dengar-dengaran pa orang-orang yang lebe tua. Ngoni samua musti baku bantu deng jang basombong satu deng yang laeng, karna ada tatulis di Kitab Suci bagini, “Tuhan Allah tara suka deng orang yang sombong, tapi Dia kase Dia pe bae pa orang yang tara sombong.”