Matius 26:29 - Perjanjian Baru Bahasa Melayu Maluku Utara

²⁹ Dengar bae-bae yang Kita bilang pa ngoni e, dari sini ka sana, Kita so tara akan minum anggur lagi. Tapi nanti waktu Tuhan Allah so Berkuasa sebagai Raja pa Dia pe umat, baru Kita minum lagi anggur yang baru sama-sama deng ngoni.”

Matius 26:29 ပူးပေါင်းရင်းမြစ်များ

Matius 13:43

Tapi orang-orang yang jaga biking yang butul pa Tuhan Allah pe muka, dorang akan maso di tampa yang dorang pe Bapa Berkuasa sebagai Raja kong dorang basinar sama deng matahari. Jadi, dengar itu bae-bae kong simpang di hati!”

Matius 16:28

Dengar bae-bae yang Kita bilang pa ngoni. Dari antara ngoni yang ada di sini, ada yang tara akan mati sebelum dorang lia Anak Manusia datang Berkuasa sebagai Raja.”

Matius 18:20

Barang, kalu ada dua atau tiga orang bakumpul karna percaya pa Kita, di situ suda Kita ada sama-sama deng dorang.”

Matius 25:34

Waktu itu, Anak Manusia yang so jadi Raja itu mo bilang pa orang-orang yang ada pa Dia pe sabla kanan, ‘Datang kamari suda ngoni yang Kita pe Bapa berkati! Datang suda di tampa yang Kita Berkuasa sebagai Raja, Kita so kase sadia tampa untuk ngoni di situ dari pertama waktu dunia ini jadi.

Matius 26:28

Barang, ini Kita pe dara. Waktu Kita mati, Kita pe dara akan tatumpa untuk kase sah Tuhan Allah pe janji pa manusia. Kong Kita pe dara yang tatumpa itu untuk tebus banya orang pe dosa.

Matius 26:30

Abis itu, Yesus deng Dia pe murit-murit manyanyi lagu pujian untuk Tuhan Allah, kong dorang pigi di Bukit Zaitun.

Matius 28:20

Kong ngoni ajar pa dorang supaya dorang biking samua parenta yang Kita so perna ajar pa ngoni. Ngoni inga bae-bae e, Kita salalu sama-sama deng ngoni turus sampe ahir jaman.”

Markus 14:25

Dengar bae-bae yang Kita bilang ini, dari sini kasana, Kita so tara akan minum anggur lagi. Tapi nanti waktu Tuhan Allah Berkuasa sebagai Raja pa Dia pe umat, baru Kita minum lagi anggur yang baru.”

Lukas 12:32

Yesus bilang lagi, “Ngoni yang iko pa Kita cuma sadiki, sama deng domba-domba satu kelompok kacil. Tapi biar bagitu me jang ngoni tako! Karna ngoni pe Bapa sanang skali ngoni mo sama-sama deng Dia Berkuasa sebagai Raja.

Lukas 15:32

Ngana pe ade sama deng orang yang so mati tapi so hidup ulang. Dia so ilang, tapi skarang torang so dapa ulang. Jadi skarang, pantas torang biking acara deng hati sanang.’ ”

Yohanes 15:11

Kita bilang samua itu pa ngoni, supaya sanang yang ada pa Kita, ngoni lagi bole rasa, deng bagitu ngoni pe hati mo sanang luar biasa.

Yohanes 16:22

Bagitu lagi deng ngoni. Skarang ini ngoni pe hati sedi, tapi nanti torang mo baku dapa ulang. Di situ, ngoni pe hati mo sanang skali kong tara ada orang biar cuma satu yang bole rampas ngoni pe sanang itu.

Yohanes 17:13

Bapa, skarang Kita mo pigi pa Bapa. Kita berdoa samua ini untuk orang-orang yang iko pa Kita waktu Kita masi ada di dunia ini, supaya sanang yang Kita rasa, dorang lagi bole rasa.

Kisah Para Rasul 10:41

Tapi tara samua orang Yahudi yang bole dapa lia pa Dia. Cuma torang yang Tuhan Allah so pili kamuka yang bole dapa lia kong jadi Dia pe saksi-saksi itu. Torang ini yang so makang deng minum sama-sama deng Dia, waktu Dia so hidup ulang.

Ibrani 12:2

Mari suda torang biking turus sama deng orang yang iko lomba itu, jang lia kiri-kanan tapi lia pa Yesus turus. Barang, Dia yang pimpin pa torang, supaya torang bole percaya pa Tuhan Allah, deng Dia yang biking torang pe percaya jadi sempurna. Waktu dapa salib, Dia tetap batahang. Deng biar Dia dapa hina, Dia tara peduli, karna Dia tau, abis itu, Dia akan sanang. Skarang, Dia so ada di tampa yang terhormat, pa Tuhan Allah pe sabla kanan di sorga.

Wahyu 14:3

Kong kita dengar saratus ampa pulu ampa ribu orang itu manyanyi lagu baru pa Tuhan Allah pe muka, yang ada dudu di kursi raja, deng di muka ampa binatang yang luar biasa itu, deng di muka pemimpin dua pulu ampa orang itu. Tarada satu orang laeng di luar dorang yang bisa balajar lagu baru itu. Saratus ampa pulu ampa ribu orang itu yang Tuhan Allah so kase slamat dari dunia.

Wahyu 7:17

Karna Anak Domba yang ada di tenga-tenga kursi raja pe muka itu, Dia mo jadi dorang pe Gembala. Dia mo bawa pa dorang minum di mata aer yang biking dorang hidup, kong Tuhan Allah mo hapus dorang samua pe aer mata.”