Matius 25:40 - Perjanjian Baru Bahasa Melayu Maluku Utara

⁴⁰ Kong nanti Raja itu akan bilang pa dorang bagini, ‘Inga bae-bae yang Kita bilang pa ngoni ini, samua yang ngoni biking untuk tolong pa satu orang dari Kita pe sudara-sudara yang orang anggap tara penting, itu sama deng ngoni so biking untuk Kita.’

Matius 25:40 ပူးပေါင်းရင်းမြစ်များ

Matius 10:40

Yesus bilang lagi, “Sapa yang tarima pa ngoni yang percaya pa Kita, itu berarti dia so tarima pa Kita. Kong sapa yang tarima pa Kita, dia me so tarima pa Tuhan Allah yang utus pa Kita.

Matius 10:42

Kong sapa yang bantu pa orang biasa-biasa saja karna orang itu so iko pa Kita, biar cuma kase aer satu galas saja, Kita bilang pa ngoni, orang yang bantu itu pasti dapa upah dari Tuhan.”

Matius 18:10

Yesus bilang lagi, “Inga bae-bae, jang ngoni pandang enteng pa orang biasa-biasa yang sama deng ana-ana kacil ini, karna orang-orang itu ada dong pe malaekat yang salalu ada deng Tuhan Allah di sorga. [

Matius 25:34

Waktu itu, Anak Manusia yang so jadi Raja itu mo bilang pa orang-orang yang ada pa Dia pe sabla kanan, ‘Datang kamari suda ngoni yang Kita pe Bapa berkati! Datang suda di tampa yang Kita Berkuasa sebagai Raja, Kita so kase sadia tampa untuk ngoni di situ dari pertama waktu dunia ini jadi.

Matius 25:39

Kong tempo apa torang lia Tuhan saki kong torang datang urus pa Tuhan? Atau tempo apa torang lia Tuhan ada di penjara kong torang datang lia pa Tuhan?’

Matius 25:45

Kong Dia akan jawab pa dorang bagini, ‘Inga bae-bae yang Kita bilang pa ngoni ini, tiap kali ngoni tara mau tolong pa satu dari Kita pe sudara yang orang anggap tara penting, itu sama lagi deng ngoni tara mau tolong pa Kita.’ ”

Matius 28:10

Kong Yesus bilang pa dorang, “Jang tako. Ka sana kase tau pa Kita pe sudara-sudara yang percaya, bilang Kita so hidup ulang. Kong Kita mo kamuka ka sana di Galilea, di sana baru dong mo lia pa Kita.”

Markus 9:41

Jadi ngoni inga bae-bae: sapa yang bantu pa ngoni karna ngoni iko pa Kristus, biar dia cuma kase ngoni aer satu galas saja, orang yang bantu itu pasti dapa upah dari Tuhan.”

Lukas 19:38

Dorang bilang, “Puji pa Dia yang Tuhan Allah so utus datang kamari sebagai Raja! Skarang Tuhan Allah di sorga deng manusia di dunia so baku dame. Mari torang puji deng hormat pa Tuhan Allah yang Paling Tinggi!”

Yohanes 20:17

Yesus bilang pa Maria, “Jang pegang pa Kita, karna Kita bolong bale pa Kita pe Bapa. Tapi ngana pigi suda pa Kita pe sudara-sudara yang jaga iko pa Kita kong bilang pa dorang, Kita skarang mo nae pigi pa Kita pe Bapa deng ngoni pe Bapa lagi. Dia itu lagi Kita pe Tuhan Allah deng ngoni lagi pe Tuhan Allah.”

Roma 8:29

Karna dari dulu, Tuhan Allah so pili pa sapa saja yang Tuhan Allah tau dorang itu nanti mo percaya pa Dia. Tuhan Allah so pili pa dorang itu supaya dorang pe sifat bole sama deng Yesus Kristus, Tuhan Allah pe Anak. Jadi, dorang itu so sama deng Yesus Kristus pe sudara, kong Tuhan Allah biking Yesus Kristus jadi Anak yang tua dari samua sudara yang percaya.

2 Korintus 4:5

Yang torang dua kase tau pa orang-orang, bukang tentang torang pe diri sandiri, tapi torang kase tau tentang Yesus Kristus, Dia itu suda Tuhan, yang pimpin pa torang! Deng torang bawa tong pe diri ini sama deng Tuhan pe orang karja untuk layani pa ngoni, iko Yesus Kristus pe mau.

Galatia 5:13

Sudara-sudara, Tuhan Allah so pangge pa ngoni iko pa Dia, deng bagitu ngoni bisa bebas dari aturan-aturan di lima kitab Musa untuk dapa slamat. Cuma jang ngoni pikir ngoni so bebas, turus ngoni bole biking kalakuang yang tara bagus iko apa saja yang ngoni suka. Bukang bagitu. Tapi yang butul yang musti biking itu, ngoni musti baku-baku layani karna ngoni baku sayang.

Galatia 5:22

Tapi orang yang Roh Kudus kuasai itu dapa lia dari dorang pe hidup macam bagini: pangsayang, hati sanang, hati tenang, pangsabar, pangbae, biking barang yang bae, setia,

Galatia 5:6

Karna untuk torang yang so sama-sama percaya pa Kristus Yesus, torang mo iko aturan sunat itu ka, tarada ka, itu tara penting, tapi yang paling penting torang pe percaya pa Yesus Kristus yang dapa lia dari torang pe sayang pa orang laeng.

Efesus 5:30

Dia jaga deng sayang pa Dia pe jemaat karna torang ini sama deng Dia pe kaki, tangan, deng samua-samua yang ada pa Dia pe badan.

Ibrani 6:10

Barang, Tuhan Allah itu adil, jadi Dia tetap inga ngoni pe bae yang ngoni so biking untuk Dia, deng ngoni pe sayang yang ngoni so kase tunju pa orang-orang yang so jadi Tuhan Allah pe umat, yang ngoni layani dari dulu sampe skarang.

1 Petrus 1:22

Jadi karna ngoni so iko ajaran yang butul tentang Yesus Kristus, ngoni pe hati so jadi bersi. Deng bagitu, ngoni bisa baku sayang deng hati yang tulus di antara ngoni sudara-sudara yang sama-sama percaya. Karna itu, ngoni musti sunggu-sunggu baku sayang satu deng yang laeng deng hati yang tulus,

1 Yohanes 4:20

Kalu ada orang bilang, “Kita sayang pa Tuhan Allah,” tapi dia binci dia pe sudara yang percaya, itu dia bafoya. Karna sapa saja yang tara sayang pa orang laeng yang dia lia, tara mungkin dia sayang pa Tuhan Allah yang dia tara dapa lia.

Wahyu 17:14

Dorang mo baku prang deng Anak Domba. Tapi Anak Domba itu sama-sama deng Dia pe umat mo kase kala pa dorang, karna Anak Domba itu, Tuhan dari samua tuhan, deng Raja dari samua raja. Kong orang-orang yang sama-sama deng Anak Domba, dorang itu yang Tuhan so pangge, so pili deng yang setia pa Dia.”

Wahyu 19:16

Di Dia pe juba deng Dia pe paha ada tatulis nama, ‘Raja dari samua raja, deng Tuhan dari samua tuhan’.