Matius 23:23 - Perjanjian Baru Bahasa Melayu Maluku Utara

²³ Cilaka suda ngoni guru-guru agama Yahudi yang ahli lima kitab Musa deng orang-orang Yahudi dari aliran Farisi! Ngoni munafik samua. Barang, ngoni jaga kase perpuluhan, sampe dari ngoni pe rampa-rampa yang paling kacil macam deng selasi, adas manis, deng jintan me ngoni buka dia pe perpuluhan. Tapi aturan yang paling penting yang ada di lima kitab Musa ngoni tara peduli, macam deng biking yang adil pa orang, kase tunju rasa kasiang pa orang, deng jadi orang yang setia. Sebenarnya, ngoni musti biking aturan-aturan yang penting itu, deng ngoni lagi jang berenti kase perpuluhan.

Matius 23:23 ပူးပေါင်းရင်းမြစ်များ

Matius 12:7

Tuhan Allah bilang di Kitab Suci bagini, ‘Yang Kita mau itu, ngoni kase tunju ngoni pe rasa kasiang pa orang laeng, daripada ngoni bakase binatang korban persembahan kong tarada rasa kasiang.’ Kalu ngoni mangarti yang Tuhan Allah bilang itu, pasti ngoni tara kase sala pa Kita pe murit-murit yang tara biking sala apa-apa.

Matius 23:13

Yesus bilang lagi, “Cilaka suda ngoni guru-guru agama Yahudi yang ahli lima kitab Musa deng orang-orang Yahudi dari aliran Farisi! Ngoni munafik samua. Barang, ngoni sandiri tara kase ngoni pe diri jadi Tuhan Allah pe umat la Dia Berkuasa sebagai Raja pa ngoni pe hidup, deng ngoni sandiri me pele pa orang-orang yang berusaha mo jadi Dia pe umat. Itu sama deng ngoni so tutu pintu pa dorang. [

Matius 9:13

Dulu Tuhan Allah bilang di Kitab Suci bagini, ‘Yang Kita mau itu, ngoni kase tunju ngoni pe rasa kasiang pa orang laeng, daripada ngoni bakase binatang korban persembahan kong tarada rasa kasiang.’ Jadi skarang ngoni pigi suda cari tau butul-butul apa yang Tuhan Allah bilang itu pe arti. Karna Kita datang bukang untuk pangge pa orang yang anggap dong pe diri butul, tapi Kita datang untuk pangge pa orang berdosa supaya dorang bertobat.”

Lukas 11:42

Cilaka suda ngoni orang-orang dari aliran Farisi! Ngoni rajin skali kase perpuluhan sampe ngoni pe rampa-rampa makanang yang paling kacil me ngoni kase dia pe perpuluhan pa Tuhan Allah. Padahal ngoni tara adil pa orang deng tara sayang pa Tuhan Allah. Bagus kalu ngoni kase perpuluhan pa Tuhan Allah, deng ngoni me musti biking yang adil pa orang deng sayang pa Tuhan Allah lagi.

Lukas 18:12

Kita bapuasa satu minggu dua kali, deng kita salalu kase perpuluhan dari samua kita pe hasil karja.’