Matius 22:16 - Perjanjian Baru Bahasa Melayu Maluku Utara

¹⁶ Jadi dorang suru pa dong pe murit-murit deng babarapa orang yang jaga iko pa raja Herodes pigi ka sana supaya bilang bagini, “Guru, torang tau, Guru ini jujur. Guru jaga kase ajar pa orang-orang yang butul tentang bagimana hidup iko Tuhan Allah pe mau. Kong Guru tara tako pa sapa-sapa, karna Guru tara cari muka.

Matius 22:16 ပူးပေါင်းရင်းမြစ်များ

Matius 22:24

“Guru, dulu nabi Musa kase tau, laki-laki sapa saja yang so kawing kong mati tarada ana, dia pe sudara laki-laki musti kawing deng dia pe janda itu supaya sudara yang mati itu ada turunan.

Matius 22:26

Tapi yang kedua itu lagi mati tarada ana. Bagitu me deng yang ketiga sampe yang ketuju, dorang me mati tarada ana.

Matius 26:18

Kong Yesus bilang pa dorang, “Ngoni ka sana di kota Yerusalem, di sana ngoni akan baku dapa deng satu orang. Bilang pa orang itu bagini, ‘Guru bilang, Dia pe waktu so tara lama lagi. Jadi di torang pe hari raya Paska ini, Dia mo makang sama-sama deng Dia pe murit-murit pa bapa pe ruma.’ ”

Matius 26:49

Jadi bagitu rombongan itu sampe di situ, Yudas langsung badekat pa Yesus kong bilang, “Slamat malam Guru,” turus dia ciom pa Yesus.

Markus 10:17

Waktu Yesus so mo bajalang lagi, ada satu orang lari-lari datang pa Yesus. Orang itu berlutut pa Yesus pe muka kong dia tanya, “Guru yang bae, kita musti biking apa supaya kita bole dapa hidup deng Tuhan Allah slama-lamanya?”

Markus 12:13

Abis itu, pemimpin-pemimpin agama Yahudi suru babarapa orang dari aliran Farisi deng orang-orang yang jaga iko pa raja Herodes, pigi batanya pa Yesus la cari Yesus pe sala.

Markus 12:14

Dorang datang pa Yesus kong bilang bagini, “Guru, torang tau guru orang jujur, deng guru tara cari muka. Guru mangajar yang butul tentang bagimana hidup iko Tuhan Allah pe mau, barang guru tara tako pa sapa-sapa. Jadi skarang torang mo tanya, kalu mo iko tong pe aturan agama, bole ka tarada torang bayar pajak pa raja basar Roma? Torang musti bayar pajak itu ka tarada?”

Markus 3:6

Waktu itu suda, orang-orang Yahudi dari aliran Farisi kaluar dari ruma ibada itu kong dorang langsung baku ator deng raja Herodes pe orang-orang la mo bunu pa Yesus.

Markus 8:15

Kong Yesus bilang pa dorang, “Ngoni musti ati-ati deng orang Yahudi dari aliran Farisi pe ragi deng raja Herodes pe ragi.”

Lukas 20:21

Jadi dorang mulai tanya pa Yesus bagini, “Guru, torang tau samua yang Guru bilang deng kase ajar itu butul. Guru me tara suka cari muka pa orang-orang. Mala Guru kase ajar yang butul tentang bagimana hidup iko Tuhan Allah pe mau.

Lukas 7:40

Tapi Yesus bilang pa Simon bagini, “Simon, ada yang Kita mo bilang pa ngana.” Simon bilang, “Bilang suda, Guru.”

Yohanes 14:6

Kong Yesus bilang pa dia, “Kita ini jalang yang mo pigi pa Tuhan Allah, deng Kita ini yang kase tau yang butul tentang Tuhan Allah, deng Kita lagi yang kase hidup deng Tuhan Allah slama-lamanya. Jadi, tara ada satu orang yang bole pigi pa Tuhan Allah kalu tara iko pa Kita.

Yohanes 18:37

Turus gubernur Pilatus batanya lagi pa Yesus, “Jadi Bapa ini Raja?” Yesus jawab pa dia, “Bapa yang bilang Kita ini Raja, deng memang itu butul suda dia pe tujuan Kita lahir deng Kita datang di dunia ini, supaya Kita bole kase tau yang butul. Kong sapa yang suka yang butul, dia pasti dengar pa Kita.”

Yohanes 7:18

Sapa saja yang mangajar pake dia pe pikiran sandiri, dia itu cuma mo cari puji deng hormat untuk dia pe diri sandiri. Tapi sapa saja yang mau supaya orang-orang puji deng hormat pa Tuhan Allah yang utus pa dia, dia itu pasti bicara yang butul deng tara bafoya.

2 Korintus 2:17

Torang tara mampo biking tugas ini deng tong pe kekuatan sandiri. Barang torang tara sama deng banya orang laeng, yang kalu kase tau Tuhan Allah pe firman, cuma mo cari doi. Tapi torang, kalu torang kase tau Tuhan Allah pe firman, torang biking deng hati bersi. Tuhan Allah sandiri yang kase tugas ini pa torang deng Dia yang lia torang kase tau Tuhan Allah pe firman pa orang-orang, karna torang percaya pa Yesus Kristus.

2 Korintus 4:2

Torang so ambe keputusan, torang tara akan perna pake cara-cara tara bae waktu kase tau Kabar Bae itu, karna cara itu cuma mo biking torang jadi malu. Deng torang tara akan kase bodo pa orang, deng tara akan bicara putar bale tentang Tuhan Allah pe firman. Tapi torang akan kase mangarti butul-butul ajaran itu pa orang, iko Tuhan pe mau. Deng biking bagitu, di dorang pe hati, dorang akan tau sandiri, apa yang torang kase tau itu butul ka tarada.

2 Korintus 5:16

Jadi karna torang tau Yesus Kristus pe sayang pa samua orang itu, torang tara nilai orang pake manusia pe pikiran lagi. Memang dulu waktu torang bolong percaya Tuhan itu, torang nilai pa Yesus Kristus pake manusia pe pikiran, tapi skarang tara bagitu lagi.

Galatia 1:10

Kita bilang bagitu, kita tara maksut supaya dapa puji dari manusia. Tapi kita cuma suka cari dapa puji dari Tuhan Allah. Mangkali ada dari ngoni yang pikir, kita cuma mo biking sanang manusia pe hati? Tarada kasiang. Kalu saja kita cuma suka mo biking sanang manusia pe hati, itu berarti, kita ini bukang orang yang jaga biking apa yang Yesus Kristus suru.

Galatia 2:6

Kong tentang pemimpin-pemimpin jemaat di Yerusalem yang kita baku dapa itu, waktu dorang dengar Kabar Bae yang kita biasa kase tau pa orang-orang, dorang tara suru kita tamba apa-apa. (Biar lagi pemimpin-pemimpin itu orang anggap orang basar, kita tara pusing, karna Tuhan Allah tara pili-pili orang).

1 Tesalonika 2:4

Mala, torang kase tau pa ngoni Kabar Bae itu karna Tuhan Allah lia torang pantas kase tau itu, jadi Dia kase percaya itu pa torang. Biar ada orang yang tara sanang deng Kabar Bae itu, torang tetap kase tau saja, karna yang penting Tuhan Allah yang rasa sanang! Barang, Dia yang uji torang pe hati.

Yakobus 3:17

Tapi orang yang dapa pande dari Tuhan, torang tau persis bagini: pertama, dia pe hati bersi, turus dia suka dame, suka baku bawa bae deng orang, dengar-dengaran, ada rasa kasiang, deng jaga biking hal-hal bae. Dia me tara barát sabla deng tara munafik.

1 Yohanes 5:20

Torang me tau Anak Allah so datang kong so biking torang mangarti la torang kanal Tuhan Allah yang Butul. Torang so hidup satu hati deng Tuhan Allah, karna torang so hidup satu hati deng Dia pe Anak Yesus Kristus. Dia itu suda Tuhan Allah yang Butul deng Dia yang biking orang bole dapa hidup deng Tuhan Allah slama-lamanya.