Matius 20:26 - Perjanjian Baru Bahasa Melayu Maluku Utara

²⁶ Tapi ngoni tara bole bagitu! Sapa dari ngoni samua yang suka mo jadi hebat pa Tuhan pe muka, dia musti jadi sama deng orang biasa-biasa saja yang layani pa ngoni.

Matius 20:26 ပူးပေါင်းရင်းမြစ်များ

Matius 20:27

Deng sapa dari ngoni yang suka mo jadi orang paling hebat pa Tuhan pe muka, dia musti biking dia pe diri sama deng orang karja untuk layani pa ngoni.

Matius 25:44

Kong nanti orang-orang itu me mo bilang bagini, ‘Tuhan, tempo apa torang lia Tuhan lapar, aus, jadi pendatang, tarada baju, saki, atau ada di penjara kong torang tara layani pa Tuhan?’

Matius 27:55

Di situ ada lagi banya parampuang yang lia-lia pa Yesus dari jao. Dorang ini yang jaga iko pa Yesus untuk layani pa Dia, mulai dari daera Galilea.

Markus 10:43

Tapi ngoni tara bole bagitu! Sapa dari ngoni samua yang suka mo jadi hebat pa Tuhan pe muka, dia musti jadi sama deng orang biasa-biasa saja yang layani pa ngoni.

Markus 10:45

Barang, Anak Manusia yang dari sorga me datang di dunia ini bukang untuk dapa layani, tapi untuk layani deng kase diri la tebus orang banya pe dosa.”

Markus 9:35

Yesus dudu kong pangge pa Dia pe dua blas murit itu, turus Dia bilang bagini, “Sapa yang suka mo jadi orang yang paling hebat pa Tuhan Allah pe muka, dia musti jadi sama deng orang yang paling tara penting di dunia ini, kong dia lagi musti jadi sama deng orang yang biasa-biasa saja yang layani pa samua orang.”

Lukas 18:14

Jadi ini yang Kita mo bilang pa ngoni: tukang tagi pajak itu pulang pa dia pe ruma, kong Tuhan Allah biking dia jadi orang yang tara sala pa Tuhan Allah pe muka, tapi orang dari aliran Farisi itu, tarada. Barang, sapa saja yang baangka diri, Tuhan Allah mo biking dia jadi orang yang tara arti apa-apa. Tapi sapa yang anggap dia pe diri tara arti apa-apa pa Tuhan Allah pe muka, Tuhan Allah mo angka pa dia jadi orang yang penting.”

Lukas 22:26

Tapi ngoni tara bole bagitu. Sapa dari ngoni samua yang mo jadi orang yang paling hebat pa Tuhan Allah pe muka, dia musti jadi sama deng orang tara penting. Kong sapa yang mo jadi pemimpin, dia itu musti jadi sama deng orang biasa-biasa saja yang jaga layani orang.

Yohanes 18:36

Kong Yesus bilang pa dia, “Kita pe kerajaan bukang dari dunia ini. Barang, kalu Kita jadi Raja di dunia ini, pasti orang-orang yang jaga biking apa yang Kita suru so datang baku prang untuk bela pa Kita, supaya Kita tara dapa serakan pa pemimpin-pemimpin agama Yahudi. Tapi Kita pe kerajaan memang bukang di dunia ini.”

Kisah Para Rasul 13:5

Pe sampe di kota Salamis di pulo Siprus, dorang dua kase tau Tuhan Allah pe Kabar Bae tentang Yesus Kristus di ruma-ruma ibada agama Yahudi. Waktu itu, Yohanes yang orang jaga pangge Markus iko supaya bantu-bantu pa dorang.

2 Korintus 1:24

Torang tara mo parenta pa ngoni tentang apa yang ngoni musti percaya, karna ngoni pe percaya pa Yesus Kristus so kuat. Tapi torang pe tujuan untuk bantu pa ngoni supaya deng ngoni iko pa Yesus Kristus, ngoni pe hati bole sanang.

2 Timotius 1:18

Ngana tau butul, tempo hari dia so banya kali bantu pa kita di kota Efesus. Jadi, nanti waktu hari Kiamat, hari yang Tuhan adili pa orang-orang, kita minta supaya Tuhan kase tunju Dia pe rasa kasiang pa Onesiforus.

Filemon 1:13

Sebenarnya kalu mo iko kita pe mau, kita mo tahang pa dia di sini supaya dia ganti pa ngana bantu pa kita, sementara kita ada di dalam penjara ini, karna kita kase tau Kabar Bae tentang Yesus Kristus.

Ibrani 1:14

Jadi, malaekat-malaekat tara lebe hebat dari Yesus to, karna dorang itu roh-roh yang biking apa yang Tuhan Allah suru. Tuhan Allah utus pa dorang untuk layani pa orang-orang yang mo dapa slamat dari dosa-dosa.

1 Petrus 4:11

Ambe conto bagini, kalu ada orang yang dapa karunia untuk kase tau Tuhan Allah pe firman pa orang-orang, dia musti pake karunia itu supaya orang mangarti Tuhan Allah pe firman. Kalu ada orang yang dapa karunia untuk bantu pa orang, dia pake karunia yang dia pe kekuatan dari Tuhan Allah itu untuk tolong pa orang. Jadi, pake karunia yang ada pa ngoni itu bae-bae la orang bole puji deng hormat pa Tuhan Allah. Tuhan Allah dapa puji karna ngoni itu Yesus Kristus pe umat. Tuhan Allah itu memang hebat deng Dia pe kuasa ada sampe slama-lamanya. Amin.

1 Petrus 5:3

Kong jang maeng parenta sabarang pa dorang yang Tuhan Allah so kase ngoni jaga, tapi lebe bae ngoni pe kalakuang musti bagus la jadi conto pa orang laeng.

Wahyu 17:6

Kita lia parampuang tara bae itu mabo karna dia minum dara dari orang-orang yang so jadi Tuhan Allah pe umat, deng dara dari orang-orang yang mati karna kase tau tentang Tuhan Yesus. Waktu kita lia itu, kita herang skali.