Matius 16:16 - Perjanjian Baru Bahasa Melayu Maluku Utara

¹⁶ Kong Simon Petrus jawab, “Guru itu suda Mesias, Raja yang Tuhan Allah janji mo kase slamat pa manusia. Guru itu Anak Allah yang hidup!”

Matius 16:16 ပူးပေါင်းရင်းမြစ်များ

Matius 1:16

kong Yakub pe ana Yusuf. Yusuf ini yang kawing deng Maria, kong Maria ini yang kase lahir pa Yesus. Yesus ini suda yang orang jaga pangge pa Dia Kristus, Raja yang Tuhan Allah janji mo kase slamat pa manusia.

Matius 14:33

Pe lia samua itu, orang-orang yang ada di parau semba pa Yesus deng bilang, “Guru ini butul Anak Allah.”

Matius 16:15

Turus, Yesus bale tanya pa dorang, “Kong kalu menurut ngoni, Kita ini sapa?”

Matius 26:63

Tapi Yesus cuma badiam. Kong imam basar itu bilang lagi pa Dia, “Demi Tuhan Allah yang hidup, Ngana bilang kamari pa torang, apa butul Ngana itu Mesias, Raja yang Tuhan Allah janji dari dulu? Kong apa butul Ngana me Anak Allah ka bukang?”

Matius 27:54

Ada komandan kompi Roma deng dia pe ana-ana bua yang jaga pa Yesus waktu Yesus dapa salib. Dorang tako skali waktu tana goyang kuat itu deng waktu dong lia samua yang jadi itu. Kong dorang bilang, “Butul, Dia ini memang Anak Allah!”

Matius 4:3

Waktu itu, Iblis tukang goda itu datang pa Yesus kong bilang, “Ngana ini Anak Allah, to? Kalu bagitu, Ngana parenta suda supaya batu-batu ini jadi roti.”

Markus 14:61

Tapi Yesus cuma badiam, Dia tara bilang apa-apa. Kong imam basar itu tanya ulang pa Dia, “Apa butul Ngana ini Mesias, Raja yang Tuhan Allah janji dari dulu? Kong apa butul Ngana me Tuhan Allah yang torang puji pe Anak?”

Lukas 2:11

Kabar yang bae itu bagini: hari ini, Orang yang mo kase slamat pa manusia so lahir. Dia so lahir di Betlehem, raja Daud pe kota. Dia itu orang pangge Kristus, Raja yang Tuhan Allah janji mo kase slamat pa ngoni. Dia itu suda Tuhan.

Yohanes 1:49

Pe dengar itu, Natanael kage kong mangaku, “Guru, skarang kita percaya, Guru memang Anak Allah. Guru ini orang Israel pe Raja!”

Yohanes 11:27

Marta jawab pa Yesus, “Iyo Tuhan. Kita percaya Tuhan itu Anak Allah yang akan datang di dunia ini, deng Tuhan itu lagi Mesias, Raja yang Tuhan Allah janji mo kase slamat pa manusia.”

Yohanes 20:31

Tapi samua yang so tatulis di kitab ini, itu ada tulis supaya ngoni percaya Yesus itu Mesias, Raja yang Tuhan Allah janji mo kase slamat pa manusia, deng Dia itu Anak Allah. Kalu ngoni so percaya pa Dia, ngoni mo dapa hidup deng Dia slama-lamanya.

Yohanes 6:57

Kita pe Bapa yang utus pa Kita, Dia itu yang kase hidup pa samua yang hidup, deng Dia lagi yang kase hidup pa Kita. Jadi, sapa saja yang makang Kita pe badan, dia mo dapa hidup deng Tuhan Allah slama-lamanya karna dia percaya pa Kita.

Yohanes 6:68

Tapi Simon Petrus bilang pa Dia, “Guru, torang mo pigi pa sapa lagi? Cuma Guru pe ajaran yang kase tau bagimana torang bole dapa hidup deng Tuhan Allah slama-lamanya.

Yohanes 6:69

Torang ini so percaya deng tau, Guru suda Yang Kudus yang Tuhan Allah utus.”

Kisah Para Rasul 14:15

“Ee ngoni samua, bikiapa kong ngoni biking bagini? Torang ini cuma manusia, sama deng ngoni. Torang datang kamari mo kase tau pa ngoni Kabar Bae tentang Yesus Kristus supaya ngoni bisa kase tinggal ngoni pe puji-puji yang tarada dia pe guna itu, kong percaya pa Tuhan Allah yang hidup itu. Dia itu suda yang biking langit, bumi, laut deng samua dia pe isi.

Kisah Para Rasul 8:36

Waktu dorang di tenga jalang, dorang dapa tampa satu yang ada aer. Kong pejabat itu bilang pa Filipus, “Coba lia, di situ ada aer! Apa kita so bole dapa baptis?” [

Kisah Para Rasul 8:37

Kong Filipus bilang, “Bole, asal bapa butul-butul percaya pa Yesus Kristus.” Pejabat itu bilang, “Kita butul-butul percaya, Yesus Kristus itu Anak Allah.”]

Kisah Para Rasul 9:20

Waktu itu suda, Saulus maso di ruma-ruma ibada agama Yahudi kong mulai kase tau pa orang-orang, Yesus itu butul Anak Allah.

Roma 1:4

Dia itu suda Yesus Kristus torang pe Tuhan. Torang dapa tau Dia itu Anak Allah, barang waktu Dia mati, kuasa dari Tuhan Allah pe Roh kase hidup ulang pa Dia.

2 Korintus 1:19

Ngoni bole percaya kita pe bicara skarang ini, karna Yesus Kristus, Anak Allah yang kita, Silwanus deng Timotius ada kase tau pa ngoni, tetap biking apa yang Dia so bilang. Dia pantas torang percaya. Dia tara perna bilang “iyo” kong di Dia pe hati bilang “tarada”.

2 Korintus 3:3

Kong karna ngoni pe hidup yang bagus itu, jadi jelas pa samua orang, ngoni ini hasil dari torang pe pelayanan kase tau tentang Yesus Kristus. Jadi torang bisa bilang, ngoni pe diri itu sama deng surat yang Yesus Kristus tulis sandiri. Dia tara tulis pake tinta, deng Dia tara tulis di batu, sama deng waktu Tuhan Allah kase aturan-aturan pa nabi Musa. Tapi ngoni jadi sama deng Yesus Kristus pe surat waktu Dia biking ngoni pe hidup beruba karna Roh Kudus bakarja di ngoni pe hati.

2 Korintus 6:16

Apa ada hubungan antara Tuhan Allah pe Ruma deng manusia pe tampa semba puji-puji? Tara ada hubungan! Torang orang-orang percaya, tong ini sama deng Tuhan Allah pe Ruma, karna Tuhan Allah yang hidup tinggal di torang pe hati. Itu sama deng Tuhan Allah janji dulu, kong skarang so jadi, “Kita mo tinggal sama-sama deng dorang, deng hidup deng dorang, kong Kita mo jadi dorang pe Tuhan Allah, deng dorang mo jadi Kita pe umat.”

1 Tesalonika 1:9

Orang-orang itu sandiri bacarita, ngoni tarima bae-bae pa torang waktu torang bawa Kabar Bae pa ngoni. Dorang me carita bagimana sampe ngoni so kase tinggal ngoni pe puji-puji, kong so semba pa Tuhan Allah yang hidup deng yang butul,

1 Timotius 3:15

Jadi kalu kita ada alangan kong terlambat datang, kita pe surat so sampe pa ngana kamuka. Deng kita pe surat ini, ngana bole tau, bagimana orang percaya musti hidup sebagai Tuhan Allah pe keluarga. Kita pe maksut bilang Tuhan Allah pe keluarga, itu pe maksut, Tuhan Allah yang hidup pe jemaat. Dia pe jemaat itu yang musti pegang kuat ajaran yang butul, sama deng tiang raja deng fandasi yang biking ruma jadi kuat.

1 Timotius 4:10

Karna itu, torang berusaha karas layani pa Tuhan Allah. Torang biking bagitu karna torang baharap deng yakin pa Tuhan Allah yang hidup. Dia itu yang kase slamat pa samua orang, lebe kusus untuk orang yang percaya pa Dia.

Ibrani 10:31

Ii, pe dengar Tuhan Allah bilang itu, torang jadi tako skali kalu mo dapa hukum dari Tuhan Allah yang hidup!

Ibrani 12:22

Tapi sudara-sudara, ngoni ini so percaya pa Tuhan Yesus yang biking Tuhan Allah pe janji yang baru. Jadi ngoni macam deng so datang di gunung Sion, kota Yerusalem itu. Itu bukang Yerusalem yang ada di dunia, tapi di Tuhan Allah yang hidup pe tampa tinggal di sorga. Kong di situ ngoni baku dapa deng malaekat yang pe banya deng ribu yang bakumpul kong yang puji Tuhan pe nama deng hati sanang.

Ibrani 3:12

Jadi sudara-sudara, ngoni musti ati-ati. Jang sampe ada satu dari ngoni yang pe hati jahat sama deng itu, sampe so tara percaya deng tara iko lagi pa Tuhan Allah yang hidup.

Ibrani 9:14

Jadi kalu dara deng abu binatang saja bisa kase bersi orang pe dosa-dosa, apalagi deng Yesus Kristus pe dara! Yesus Kristus so kase Dia pe diri sandiri pa Tuhan Allah jadi korban persembahan yang sempurna. Yesus Kristus jadi korban yang sempurna, barang Roh Kudus yang ada turus sampe slama-lamanya itu yang biking Dia mampo kase Dia pe diri bagitu. Dia pe dara itu yang kase bersi torang pe hati dari hal-hal yang tarada dia pe guna, supaya torang bole semba pa Tuhan Allah yang hidup.

1 Yohanes 4:15

Sapa saja yang mangaku, Yesus itu Anak Allah, Tuhan Allah tetap ada di dia pe hati kong dia me tetap satu hati deng Tuhan Allah.

1 Yohanes 5:20

Torang me tau Anak Allah so datang kong so biking torang mangarti la torang kanal Tuhan Allah yang Butul. Torang so hidup satu hati deng Tuhan Allah, karna torang so hidup satu hati deng Dia pe Anak Yesus Kristus. Dia itu suda Tuhan Allah yang Butul deng Dia yang biking orang bole dapa hidup deng Tuhan Allah slama-lamanya.

1 Yohanes 5:5

Cuma orang-orang yang percaya Yesus itu Anak Allah saja, yang bisa kase kala yang jahat di dunia ini. Tarada yang laeng!

Wahyu 7:2

Malaekat ampa itu so dapa kuasa untuk kase rusak tana deng laut. Tapi kita lia lagi ada malaekat laeng muncul dari timur, tampa matahari nae. Malaekat itu ada bawa Tuhan Allah yang hidup pe cap, kong cap itu untuk orang yang jadi Tuhan Allah pe umat. Malaekat itu bicara kuat-kuat pa malaekat ampa yang laeng itu bagini,