Matius 13:39 - Perjanjian Baru Bahasa Melayu Maluku Utara

³⁹ Kong musu yang ambur bibit kusu-kusu itu, Iblis. Turus, waktu bapete itu, hari kiamat, hari yang Tuhan mo adili pa samua orang. Kong orang-orang yang bapete itu, itu malaekat-malaekat yang turung dari sorga.

Matius 13:39 ပူးပေါင်းရင်းမြစ်များ

Matius 12:32

Kalu ada orang yang bilang apa-apa yang malawang pa Anak Manusia yang dari sorga, dia masi bole mo dapa ampun. Tapi kalu orang bilang apa-apa yang malawang pa Roh Kudus, dia tara mo dapa ampun, skarang atau sampe slama-lamanya.”

Matius 13:22

Bibit yang jatu di tana yang ada rumpu baduri, itu sama deng orang-orang yang so dengar firman, tapi dong pe hati tara tenang tentang dong pe hidup, deng dong cuma cari harta. Jadi firman yang dorang dengar itu dorang tara biking, sampe firman itu tara bawa hasil apa-apa.

Matius 13:25

Waktu so malam kong samua orang so tasono, tuang kobong itu pe musu datang. Kong musu itu ambur bibit kusu-kusu di antara bibit gandum yang bagus. Abis itu musu itu pigi.

Matius 13:28

Tuang kobong itu bilang pa dorang, ‘Itu pasti kita pe musu yang biking.’ Kong dia pe orang-orang karja tanya lagi pa dia, ‘Tuang mau torang pigi di kobong la cabu kusu-kusu itu?’

Matius 13:40

Jadi, sama deng kusu-kusu yang orang cabu kong buang di api, bagitu lagi yang mo jadi nanti di hari kiamat.

Matius 13:49

Bagitu lagi yang mo jadi nanti di hari kiamat. Waktu itu, malaekat-malaekat mo datang kong kase pisa orang-orang jahat dari orang-orang yang jaga biking yang butul pa Tuhan Allah pe muka.

Matius 24:3

Abis itu, Yesus pigi di Bukit Zaitun, kong dudu di situ. Dia pe murit-murit badekat pa Dia la cuma dorang deng Dia saja yang bacarita. Dorang bilang, “Guru, kase tau pa torang ka, tempo apa yang Guru bilang tadi itu mo jadi? Turus, dia pe tanda-tanda apa kalu Guru mo datang ulang, deng tanda-tanda hari kiamat itu bagimana e?”

Matius 25:31

Yesus bilang lagi, “Anak Manusia yang dari sorga mo datang ulang deng Dia pe kuasa yang luar biasa deng samua malaekat sama-sama deng Dia, kong Dia mo dudu di kursi raja yang luar biasa.

Matius 28:20

Kong ngoni ajar pa dorang supaya dorang biking samua parenta yang Kita so perna ajar pa ngoni. Ngoni inga bae-bae e, Kita salalu sama-sama deng ngoni turus sampe ahir jaman.”

1 Korintus 10:11

Samua cilaka yang dorang dapa itu ada, supaya torang jang iko dorang pe conto, kong itu ada tulis di Kitab Suci untuk kase inga pa torang yang hidup di jaman skarang ini yang so dekat deng hari kiamat.

2 Korintus 11:3

Tapi kita tako jang sampe ada yang pengaru pa ngoni deng dong pe ajaran yang sala sampe ngoni so tara percaya lagi pa Yesus Kristus deng hati yang sunggu-sunggu. Itu sama deng Hawa dulu yang dapa tipu dari ular sampe malawang Tuhan Allah pe parenta karna ular pe putar bale itu.

2 Korintus 2:17

Torang tara mampo biking tugas ini deng tong pe kekuatan sandiri. Barang torang tara sama deng banya orang laeng, yang kalu kase tau Tuhan Allah pe firman, cuma mo cari doi. Tapi torang, kalu torang kase tau Tuhan Allah pe firman, torang biking deng hati bersi. Tuhan Allah sandiri yang kase tugas ini pa torang deng Dia yang lia torang kase tau Tuhan Allah pe firman pa orang-orang, karna torang percaya pa Yesus Kristus.

Efesus 2:2

Waktu itu, ngoni hidup masi suka biking dosa sama deng orang yang bolong kanal pa Tuhan Allah, baru ngoni lagi iko Iblis pe mau. Iblis itu setang-setang pe raja yang berkuasa di udara, deng dia itu suda yang skarang ini ada pengaru pa orang-orang yang tara dengar-dengaran pa Tuhan Allah.

Ibrani 1:2

Tapi skarang, di waktu yang so dekat hari kiamat ini, Tuhan Allah so utus Dia pe Anak sandiri yang bicara langsung pa torang. Dia pe Anak itu yang dulu Tuhan Allah pake untuk biking dunia ini deng samua-samua dunia pe isi. Kong Dia pe Anak itu suda yang Tuhan Allah so tentukan supaya jadi ahli waris dari samua-samua yang ada.

Ibrani 9:26

Barang, kalu ulang-ulang kali Dia kase korban Dia pe diri, itu berarti, mulai dari dunia ini jadi, Dia musti ulang-ulang menderita turus. Tapi skarang ini, yang orang bilang dunia so mo kiamat, Dia datang di dunia cuma satu kali saja untuk hapus manusia pe dosa-dosa deng cara Dia kase Dia pe diri sandiri mati untuk jadi korban persembahan.

1 Petrus 5:8

Ngoni musti kuasai ngoni pe diri deng bajaga-jaga! Barang Iblis, yang jadi ngoni pe musu itu, dia sama deng singa yang bajalang kasana-kamari bacari makanang la mo talang manta-manta.

Yudas 1:14

Dulu, Henokh, Adam pe turunan yang ketuju, ada bilang apa yang Tuhan Allah pasáng pa dia bagini, “Perhatikan e, Tuhan mo datang deng Dia pe malaekat-malaekat kudus deng ribu.

Wahyu 12:9

Naga basar itu, setang-setang pe raja yang dong jaga bilang ‘Iblis’. Naga itu yang dari dulu salalu kase sesat orang-orang di seluru dunia ini. Dia deng malaekat-malaekat yang iko pa dia, samua dapa buang dari sorga di bumi.

Wahyu 13:14

Dia biking tanda-tanda itu di binatang pertama pe muka, sampe dia kase sesat orang-orang di bumi. Dia me suru dorang biking patong satu sama deng binatang yang pertama, binatang yang ada luka barát tapi so sembu itu.

Wahyu 19:20

Tapi, Dia deng Dia pe tentara-tentara langsung tangka pa binatang jahat itu deng tangka pa binatang jahat itu pe nabi palsu. Nabi palsu itu yang perna biking tanda-tanda yang biking orang herang, pake binatang itu pe kuasa. Dia biking tanda-tanda itu la biking sesat pa orang-orang yang so tarima cap dari binatang jahat itu, deng yang so semba pa binatang jahat itu pe patong. Binatang jahat deng nabi palsu itu dapa buang hidup-hidup di api belerang yang luas skali.