Matius 13:23 - Perjanjian Baru Bahasa Melayu Maluku Utara

²³ Kong bibit yang jatu di tana yang subur itu, sama deng orang yang dengar Tuhan pe firman kong mangarti firman itu. Jadi, dorang hidup iko Tuhan pe mau, sama deng bibit yang batumbu sampe babua. Ada yang babua saratus kali lipa, ada yang anam pulu kali lipa deng ada lagi yang tiga pulu kali lipa.”

Matius 13:23 ပူးပေါင်းရင်းမြစ်များ

Matius 12:33

Yesus bilang, “Kalu pohong bagus, pasti dia pe bua me bagus. Kalu pohong yang tara bagus, pasti dia pe bua me tara bagus. Torang bole mo dapa tau kalu pohong itu bagus atau tarada, torang lia cuma dari dia pe bua.

Matius 13:8

Tapi ada bibit laeng yang jatu di tana yang subur. Bibit itu batumbu, turus babua. Kong dia pe hasil ada yang saratus kali lipa, ada yang anam pulu kali lipa, deng ada lagi yang tiga pulu kali lipa.

Matius 3:10

Tuhan Allah so siap mo hukum pa samua orang yang tara iko Dia pe mau. Itu sama deng satu orang yang so siap-siap deng tamako mo potong pohong yang tara babua bagus, turus buang pohong itu di api.

Matius 3:8

Kalu ngoni butul so bertobat, ngoni musti biking hal yang bae turus, supaya ada bukti ngoni itu so bertobat. Itu sama deng pohong yang subur, dia pe bua me bagus-bagus.

Markus 10:15

Inga bae-bae yang Kita mo bilang pa ngoni ini: sapa yang tara tarima pa Tuhan Allah sama deng ana kacil yang tara sombong, dia tara akan jadi Tuhan Allah pe umat yang Dia Berkuasa sebagai Raja pa dia pe hidup.”

Markus 4:20

Kong bibit yang jatu di tana yang subur, itu sama deng orang-orang yang dengar firman kong tarima deng percaya. Dorang ini orang yang hidup iko Tuhan pe mau, sama deng bibit yang batumbu sampe babua. Ada yang babua tiga pulu kali lipa, ada yang anam pulu kali lipa, deng ada lagi yang saratus kali lipa.”

Lukas 13:9

Sapa tau taong muka dia babua. Kalu tarada, torang potong suda.’ ”

Lukas 8:15

Kong bibit yang jatu di tana yang subur, itu sama deng orang-orang yang so dengar firman, dorang simpang firman itu di dong pe hati yang bae, kong dorang biking firman itu turus-turus di dong pe hidup hari-hari.”

Lukas 8:8

Tapi ada bibit laeng yang jatu di tana yang subur. Bibit itu batumbu deng babua banya skali sampe saratus kali lipa.” Abis bilang umpama itu, Yesus bilang lagi, “Dengar itu bae-bae kong simpang di hati!”

Yohanes 15:16

Bukang ngoni yang pili pa Kita, tapi Kita yang pili pa ngoni jadi Kita pe murit. Kita so kase tugas pa ngoni, supaya ngoni pigi untuk biking hal-hal bae yang dia pe hasil mo ada turus. Deng bagitu, apa saja yang ngoni minta pa Kita pe Bapa pake Kita pe nama, Dia mo kase itu pa ngoni.

Yohanes 8:47

Sapa saja yang pe asal dari Tuhan Allah, dia dengar kong tarima Tuhan Allah pe ajaran. Tapi ngoni ini tara mau dengar Tuhan Allah pe ajaran, karna ngoni pe asal bukang dari Tuhan Allah.”

Kisah Para Rasul 16:14

Di antara dorang itu, ada parampuang satu dia pe nama Lidia. Dia dari kota Tiatira, dia jaga bajual kaeng mahal warna ungu. Lidia ini bukang orang Yahudi tapi dia jaga baibada pa Tuhan Allah. Kong waktu Paulus carita tentang Tuhan Yesus, Tuhan Allah buka Lidia pe hati sampe dia jadi percaya apa yang Paulus bilang itu.

Kisah Para Rasul 17:11

Orang-orang Yahudi di kota Berea tara sama deng orang-orang Yahudi di kota Tesalonika. Dorang lebe siap tarima ajaran dari Paulus. Karna itu, dorang suka skali badengar deng tarima Kabar Bae tentang Yesus. Tiap hari dorang cari tau dari Kitab Suci, yang Paulus kase ajar itu butul ka tarada.

2 Korintus 9:10

Tuhan Allah yang kase sadia bibit untuk orang yang baambur bibit di kobong. Deng Dia yang kase makanang pa torang manusia la torang bisa makang. Jadi bagitu lagi, Tuhan Allah mo tamba apa yang ada pa ngoni la ngoni bisa biking banya skali barang yang bae pa orang laeng. Itu sama deng orang bapanen, kong dia pe hasil banya.

Filipi 1:11

Kita minta lagi supaya Yesus Kristus bakarja di ngoni pe hati la ngoni bole biking barang yang butul pa Tuhan Allah pe muka. Turus orang-orang mo puji deng hormat pa Tuhan Allah karna dorang lia yang ngoni so biking itu.

Filipi 4:17

Kita bicara tentang doi ini, bukang karna kita ingin ngoni kase lagi pa kita, tapi kita mau, biar suda Tuhan Allah yang balas ngoni pe bae karna ngoni so bantu pa kita.

Kolose 1:10

Barang, kalu ngoni so tau Tuhan Allah pe mau, ngoni akan hidup deng kalakuang yang pantas dapa sebut orang yang percaya pa Tuhan, kong ngoni akan biking Dia pe hati sanang. Ngoni me akan biking hal-hal yang bae turus-turus, deng ngoni me akan lebe tamba kanal pa Tuhan Allah.

Kolose 1:6

Kong Kabar Bae yang datang pa ngoni itu so tasiar di seluru dunia, sampe banya orang so percaya pa Tuhan kong dong pe hidup beruba. Bagitu lagi yang jadi pa ngoni waktu ngoni mulai dengar Kabar Bae itu kong mangarti butul Tuhan Allah pe bae pa manusia.

1 Tesalonika 4:1

Sudara-sudara, torang so kase ajar pa ngoni cara hidup untuk biking sanang Tuhan Allah pe hati, kong ngoni so hidup sama deng itu. Tapi skarang karna torang samua so satu hati deng Tuhan Yesus, torang minta supaya ngoni lebe tamba berusaha biking sanang Tuhan Allah pe hati.

2 Tesalonika 2:10

Orang jahat itu mo pake banya cara yang tara bae, la mo tipu pa orang-orang yang akan tapisa deng Tuhan Allah slama-lamanya. Dorang itu mo tapisa deng Tuhan Allah karna dorang tara mau dengar ajaran yang butul tentang Tuhan Yesus yang mo kase slamat pa dorang.

Ibrani 4:2

Barang, torang me so dengar kabar yang bae tentang bisa baistrahat sama-sama deng Tuhan Allah, sama deng torang pe orang tua dulu-dulu so dengar. Tapi kabar yang torang pe orang tua dulu-dulu dengar itu tara ada guna, barang dorang tara percaya butul-butul.

Ibrani 6:7

Ambe conto bagini, torang pe hidup ini macam deng tana yang dapa ujang dari Tuhan Allah. Kalu tana itu salalu isap aer ujang, tana itu akan jadi subur kong kase kaluar hasil banya untuk orang kobong. Tana itu tetap dapa berkat dari Tuhan Allah.

Ibrani 8:10

Jadi ini suda janji yang baru yang Kita akan biking deng orang-orang bangsa Israel nanti: Kita mo taru Kita pe aturan-aturan pa dorang pe pikiran, deng Kita mo tulis itu di dorang pe hati. Kita akan jadi dorang pe Tuhan Allah, deng dorang akan jadi Kita pe umat.

2 Petrus 3:18

Lebe bae tiap hari ngoni tamba sadar Yesus Kristus pe bae deng lebe tamba kanal pa Dia. Dia itu torang pe Tuhan Yesus Kristus yang kase slamat pa torang dari dosa-dosa. Kong untuk Dia suda puji deng hormat dari skarang sampe slama-lamanya. Amin.

1 Yohanes 5:20

Torang me tau Anak Allah so datang kong so biking torang mangarti la torang kanal Tuhan Allah yang Butul. Torang so hidup satu hati deng Tuhan Allah, karna torang so hidup satu hati deng Dia pe Anak Yesus Kristus. Dia itu suda Tuhan Allah yang Butul deng Dia yang biking orang bole dapa hidup deng Tuhan Allah slama-lamanya.