Lukas 5:30 - Perjanjian Baru Bahasa Melayu Maluku Utara

³⁰ Di situ me ada orang Yahudi dari aliran fanatik yang pe nama Farisi, deng guru-guru agama Yahudi yang ahli lima kitab Musa. Waktu dorang lia Yesus makang sama-sama deng orang-orang yang dapa anggap berdosa itu, dorang mara-mara, kong bilang pa Yesus pe murit-murit itu, “Cis, bikiapa kong ngoni deng ngoni pe Guru makang minum sama-sama deng tukang-tukang tagi pajak deng orang-orang berdosa yang laeng?”

Lukas 5:30 ပူးပေါင်းရင်းမြစ်များ

Matius 5:46

Kalu ngoni cuma sayang pa orang yang sayang pa ngoni, apa yang ngoni mo dapa? Jang ngoni baharap Tuhan Allah mo kase apa-apa pa ngoni. Tukang tagi pajak yang paling berdosa me sayang pa orang yang sayang pa dorang.

Matius 9:11

Di situ me ada orang-orang agama Yahudi dari aliran fanatik yang pe nama Farisi. Waktu dorang lia Yesus makang sama-sama deng orang-orang yang orang anggap berdosa itu, dorang bilang pa Yesus pe murit-murit, “Cis, bikiapa kong ngoni pe Guru makang sama-sama deng tukang-tukang tagi pajak deng orang-orang berdosa yang laeng?”

Markus 2:16

Waktu itu me, ada guru-guru agama Yahudi yang ahli lima kitab Musa, kong dorang itu lagi dari aliran fanatik yang pe nama Farisi. Dorang dapa lia Yesus ada makang sama-sama deng tukang-tukang tagi pajak deng orang-orang laeng yang dorang anggap berdosa itu. Kong dorang bilang pa Yesus pe murit-murit, “Cis, bikiapa kong Dia makang sama-sama deng tukang-tukang tagi pajak deng orang-orang berdosa yang laeng?”

Markus 7:3

Barang, orang-orang dari aliran Farisi, sama deng orang-orang Yahudi yang laeng, dorang pegang aturan agama kuat skali. Kalu mo dudu makang, dorang kase bersi tangan iko dorang pe orang tua dulu-dulu pe ajaran supaya Tuhan lia halal. Kalu tara cuci tangan bagitu, dong tara bisa makang.

Markus 9:16

Yesus tanya pa dorang bagini, “Ngoni baku malawang apa deng guru-guru agama Yahudi yang ahli lima kitab Musa?”

Lukas 18:11

Orang dari aliran Farisi itu badiri basandiri kong dia berdoa bagini, ‘Ya Tuhan Allah, kita bilang tarimakasi, karna kita bukang orang berdosa sama deng orang laeng. Kita ini bukang orang yang suka rampas orang laeng pe barang, kita bukang orang yang tara butul, kita bukang orang yang jaga baku suka deng orang pe bini, deng kita bukang lagi sama deng tukang tagi pajak ini.

Lukas 19:7

Waktu samua orang lia itu, dorang mulai bafeto, dorang bilang, “Cis, Yesus itu pigi batamu di orang berdosa pe ruma tu!”

Lukas 5:17

Satu kali, Yesus mangajar di ruma satu. Waktu itu ada babarapa orang Yahudi dari aliran fanatik yang pe nama Farisi deng ada lagi guru agama Yahudi yang ahli lima kitab Musa. Dorang itu dudu dengar Dia mangajar. Dorang datang dari samua kampong di daera Galilea deng Yudea, deng dari kota Yerusalem lagi. Tuhan Allah pe kuasa ada pa Yesus sampe Dia bole kase sembu orang-orang saki.

Lukas 5:21

Pe dengar Yesus bilang bagitu, guru-guru agama Yahudi yang ahli lima kitab Musa deng orang-orang Yahudi dari aliran Farisi bicara dalam hati bagini, “Dia ini sapa kong, sampe Dia biking diri sama deng Tuhan Allah? Barang, tarada orang yang bisa kase ampun orang pe dosa, yang bisa cuma Tuhan Allah.”

Lukas 7:34

Skarang, Kita Anak Manusia so datang. Kita tara bapuasa deng Kita me jaga minum anggur. Kong ngoni bilang kata, ‘Coba lia! Orang ini golojo deng pangbaminum. Dia me jaga batamang deng tukang tagi pajak deng orang-orang berdosa laeng.’

Lukas 7:39

Waktu Simon yang undang pa Yesus lia apa yang parampuang itu biking, dia bapikir dalam hati bagini, “Kalu memang Yesus butul-butul nabi, pasti Dia tau sapa parampuang yang ada bapegang pa Dia deng bagimana parampuang itu pe kalakuang. Dia pasti tau, parampuang itu parampuang tara bae.”

Kisah Para Rasul 23:9

Orang dari aliran Farisi deng Saduki baku malawang turus, sampe di situ tatamba kaco. Di situ, babarapa guru agama Yahudi yang ahli lima kitab Musa dari aliran Farisi, dorang maju di muka, kong bela pa Paulus. Dorang bilang, “Menurut torang, orang ini tara sala sama skali! Sapa tau, memang ada roh atau malaekat yang so bicara pa dia.”