Kolose 3:8 - Perjanjian Baru Bahasa Melayu Maluku Utara

⁸ Tapi skarang, ngoni buang suda samua yang tara bae, macam ini: pangmara, mara-mara sampe marontak, binci sampe biking barang jahat, kase tara bae orang pe nama, deng kase kaluar kata-kata kotor.

Kolose 3:8 ပူးပေါင်းရင်းမြစ်များ

Matius 5:22

Tapi Kita mo bilang pa ngoni e, sapa yang mara saja pa dia pe sudara, dia musti dapa hukum. Kong sapa yang momake pa dia pe sudara, musti dapa urus di agama Yahudi pe kumpulan yang paling tinggi yang pe nama Mahkama Agama. Deng sapa yang bilang dia pe sudara bodo, dia musti dapa hukum di api neraka yang mamanyala.

Markus 7:22

baku suka deng orang yang bukang dia pe laki atau dia pe bini, golojo orang pe barang, kalakuang jahat, putar bale, napsu tara bae, mangiri, kase tara bae orang pe nama, sombong deng suka malawang.

Roma 13:13

Torang musti hidup deng kalakuang yang bae, kalakuang yang orang-orang jaga biking siang-siang. Jang babapesta kong mabo-mabo sampe biking hal sabarang, jang baseks sabarang, jang iko napsu sama deng binatang, jang suka bakalae deng jang suka mangiri.

1 Korintus 3:3

Barang sampe skarang, ngoni pe kalakuang masi iko manusia pe mau. Kita bilang bagitu, barang ada dari ngoni yang jaga baku mangiri, deng baku-baku ambe. Itu dia pe tanda ngoni masi iko manusia pe mau.

2 Korintus 12:20

Kita hawater, kalu kita so datang pa ngoni nanti, ngoni bolong biking sama deng yang kita mau. Bagitu lagi deng ngoni, ngoni lia kita biking tara sama deng yang ngoni mau. Kita hawater, jang sampe kita dapa ada dari ngoni yang baku-baku malawang, baku mangiri, mara-mara, cuma pikir diri sandiri, carita busu orang pe nama, bamulu, basombong deng biking kaco.

Galatia 5:15

Tapi kalu ngoni cuma bakalae deng baku malawang, ngoni musti ati-ati, jang sampe ngoni sama deng binatang yang baku-baku gigi sampe baku abis.

Galatia 5:20

jaga semba pa dong pe puji-puji, pake tiop-tiop, binci pa orang laeng, bakalae, mangiri pa orang-orang laeng, capat skali mara, cuma pikir diri sandiri, suka biking orang tapisa-pisa, suka baku beda pendapat sampe biking kelompok-kelompok,

Galatia 5:26

Deng tara usa suda torang jadi pangbasombong, tara usa suda torang baku pancing mara, kong tara usa suda torang baku mangiri.

Efesus 4:22

Jadi, buang suda ngoni pe kalakuang tara bae yang ngoni biking waktu ngoni bolong percaya pa Yesus Kristus, karna ngoni pe keinginan yang tara bae itu yang biking ngoni dapa tipu sampe ngoni pe hidup jadi rusak.

Efesus 4:25

Jadi, berenti suda bicara yang foya-foya, tapi bicara suda yang butul-butul satu deng yang laeng, karna torang orang percaya ini so taika jadi satu sama deng kaki, tangan, deng samua-samua yang ada pa torang pe badan.

Efesus 4:26

Kalu ngoni mara pa orang, jang sampe mara itu biking ngoni jadi berdosa. Deng jang ngoni simpang ngoni pe mara itu sampe matahari maso,

Efesus 4:29

Kalu ngoni bicara, jang ada kata-kata tara bae kaluar dari ngoni pe mulu. Lebe bae, yang musti ngoni pake waktu bicara itu, kata-kata yang bisa kase kuat orang laeng pe hati, deng kata-kata yang perlu dorang dengar untuk dong pe bae.

Efesus 5:4

Bagitu lagi, ngoni tara bole bilang kata-kata yang kotor, deng kata-kata yang tarada dia pe guna. Ngoni me jang basangaja deng kata-kata yang kurang ajar. Barang, samua kata-kata itu tara pantas untuk ngoni yang so percaya pa Yesus Kristus mo bilang. Tapi yang paling bae yang ngoni musti biking itu, ngoni bilang tarimakasi suda pa Tuhan Allah.

Kolose 3:5

Jadi, karna Yesus Kristus so ruba ngoni pe hidup jadi baru, ngoni berenti suda iko dunia pe mau, macam deng: baseks sabarang, biking hal-hal yang cafarune, iko napsu yang tara bae, ingin biking barang yang jahat, deng golojo orang pe barang. Karna kalu torang golojo orang pe barang, itu berarti, torang so kase lebe penting barang itu daripada Tuhan.

Kolose 3:9

Jang ngoni baku kase foya satu deng yang laeng, karna ngoni so buang ngoni pe hidup yang lama deng dia pe kalakuang yang tara bae itu.

1 Timotius 1:13

Dulu kita yang kase tara bae Dia pe nama. Waktu itu, kita siksa deng hina pa orang-orang yang percaya pa Dia. Tapi biar bagitu me, Dia kase tunju Dia pe rasa kasiang pa kita, karna kita bolong percaya pa Dia, deng tara mangarti apa yang kita biking itu sala.

1 Timotius 1:20

Dari dorang itu, ada Himeneus deng Aleksander. Kita so serakan dorang dua pa Iblis, setang-setang pe raja. Kita biking bagitu supaya dorang sadar kong berenti kase tara bae Tuhan Allah pe nama.

Ibrani 12:1

Sudara-sudara, biar orang-orang percaya dulu-dulu yang kita so bilang tadi itu so mati, dorang pe percaya waktu dong hidup di dunia itu jadi conto la torang iko, sama deng dorang masi hidup kong ada kuliling pa torang. Jadi, mari suda torang berusaha untuk buang samua beban deng lapas suda dosa-dosa yang masi malakat pa tong pe diri, supaya torang tara ada alangan apa-apa, la torang bole percaya butul-butul pa Tuhan Allah. Mari torang berusaha iko pa Dia sama deng torang ada iko lomba lari, torang tara berenti tapi lari turus sampe di garis finis.

Yakobus 2:7

Orang kaya itu yang jaga kase tara bae Yesus Kristus pe nama. Yesus Kristus itu yang torang puji, kong yang biking torang jadi Tuhan Allah punya.

1 Petrus 2:1

Karna ngoni so dapa hidup yang baru itu, berenti suda biking samua yang jahat. Jang bicara foya, jang pura-pura bae, jang mangiri, deng jang biking busu orang laeng pe nama.

2 Petrus 2:18

Barang, dorang kalu bicara, makang puji skali, padahal yang dong bicara itu tara ada guna. Dorang buju orang-orang yang baru percaya pa Tuhan supaya dorang biking barang yang tara bae iko manusia pe napsu saja. Padahal orang-orang yang dapa buju itu bolong lama talapas dari dong pe percaya yang sala.

2 Petrus 2:7

Tapi Lot, Tuhan Allah kase slamat pa dia dari kota itu. Lot itu orang yang jaga biking apa yang butul pa Tuhan Allah pe muka. Dia turus-turus sedi skali karna orang-orang yang ada di sekitar dia pe cara hidup tara bae, karna dorang cuma iko dong pe napsu.

Yudas 1:13

Dorang tara tau malu kase lia dong pe kalakuang yang tara bae, sama deng omba basar yang kase tinggal kotor-kotor di pante. Dorang me sama deng bintang-bintang yang bapinda kasana-kamari. Jadi untuk dorang itu, so tasadia tampa yang paling galap untuk slama-lamanya.

Yudas 1:8

Bagitu lagi yang akan jadi pa orang-orang yang bawa ajaran yang tara butul skarang ini. Dorang bilang kata, dong dapa mimpi-mimpi dari Tuhan Allah yang kase bae dorang biking hal-hal kotor deng dorang pe badan, iko dong pe napsu tara bae sandiri. Dorang ini pandang enteng Tuhan Allah pe kuasa, deng dong so bicara tara bae tentang samua yang luar biasa yang ada di sorga.

Wahyu 16:9

Sinar matahari yang panas skali itu biking sampe manusia pe kuli angus. Tapi, biar bagitu, dorang tetap tara mau bertobat deng dorang tara mau puji deng hormat pa Tuhan Allah. Kong lebe soe lagi, dorang kase tara bae Tuhan Allah pe nama yang ada kuasa biking cilaka-cilaka itu.