Kolose 3:5 - Perjanjian Baru Bahasa Melayu Maluku Utara

⁵ Jadi, karna Yesus Kristus so ruba ngoni pe hidup jadi baru, ngoni berenti suda iko dunia pe mau, macam deng: baseks sabarang, biking hal-hal yang cafarune, iko napsu yang tara bae, ingin biking barang yang jahat, deng golojo orang pe barang. Karna kalu torang golojo orang pe barang, itu berarti, torang so kase lebe penting barang itu daripada Tuhan.

Kolose 3:5 ပူးပေါင်းရင်းမြစ်များ

Matius 15:19

Barang, dari manusia pe dalam hati, timbul samua yang jahat: pikiran yang jahat, bunu orang, baku suka deng orang yang bukang dia pe laki atau dia pe bini, baseks sabarang, bapancuri, jadi saksi yang tara butul, deng kase tara bae orang pe nama.

Roma 1:26

Jadi karna dorang so tara semba lagi pa Tuhan Allah, Dia kase biar pa dorang iko dorang pe napsu tara bae yang biking malu dong pe diri sandiri. Parampuang-parampuang so tara suka pa laki-laki, mala dorang cuma baku suka deng parampuang saja.

Roma 1:29

Dorang pe hati ponong deng barang yang tara butul deng barang yang jahat. Dorang golojo samua-samua, cuma pikir yang jahat, mangiri, deng jadi tukang bunu. Kong dorang me jaga baku mara, deng tukang bafoya. Dorang suka orang laeng dapa cilaka deng suka bacarita tara bae tentang orang laeng.

Roma 6:13

Deng tara bole ngoni kase biar ngoni pe tangan, kaki deng samua-samua yang ada pa ngoni pe badan untuk dosa kuasai supaya biking barang yang jahat. Tapi ngoni kase ngoni pe diri pa Tuhan Allah supaya biking barang yang butul, karna ngoni sama deng orang yang so mati, kong skarang Dia so kase pa ngoni hidup yang baru. Ngoni kase biar suda ngoni pe tangan, kaki, deng samua-samua yang ada di ngoni pe badan untuk Tuhan Allah pake supaya mo biking barang yang butul.

Roma 6:6

Torang tau to, torang pe hidup lama yang suka biking dosa itu so mati sama-sama deng Yesus Kristus di kayu salib, supaya torang so tara iko lagi torang pe mau yang basar untuk mo biking dosa, itu sama deng torang so tara jadi dosa pe suru-suru lagi.

Roma 7:23

Tapi kita tara iko Tuhan Allah pe aturan itu, karna di kita pe hati ada dosa yang baku malawang deng kita pe mau untuk iko Tuhan Allah pe aturan. Itu yang biking kita pe diri susa mo bebas dari dosa pe kuasa itu.

Roma 7:5

Karna waktu torang bolong percaya pa Yesus, torang pe hidup itu cuma iko manusia pe mau sandiri yang suka biking dosa. Waktu torang tau aturan di lima kitab Musa yang kase tau apa itu dosa yang torang tara bole biking, itu yang biking torang lebe tamba ingin biking dosa. Kong karna torang biking dosa itu, torang so mo dapa hukum tapisa deng Tuhan Allah slama-lamanya.

Roma 8:13

Karna kalu ngoni hidup iko manusia pe mau, ngoni mo dapa hukum tapisa deng Tuhan Allah slama-lamanya. Tapi kalu ngoni hidup iko Tuhan Allah pe Roh, Tuhan Allah pe Roh akan tolong pa ngoni supaya ngoni berenti biking ngoni pe mau yang jahat, ngoni itu mo hidup deng Tuhan Allah slama-lamanya.

1 Korintus 5:1

Sudara-sudara, kita dengar ada dari ngoni jemaat yang jaga baku suka deng orang yang bukang dia pe bini. Kong yang dia baku suka itu, dia pe mama tiri sandiri! Yang dia biking itu jahat skali, padahal orang yang tara percaya pa Tuhan Allah me tara biking bagitu.

1 Korintus 6:11

Deng ada babarapa dari ngoni yang dulu pe kalakuang tara bae bagitu. Tapi skarang so tarada, karna Tuhan Allah so kase bersi pa ngoni dari dosa. Tuhan Allah so biking ngoni jadi Dia pe umat sandiri deng biking ngoni jadi orang yang tara sala pa Dia pe muka. Tuhan Allah biking samua itu karna Tuhan Yesus Kristus so mati untuk kase slamat pa torang, deng karna Roh dari torang pe Tuhan Allah bakarja di ngoni pe hati.

1 Korintus 6:13

Ada lagi yang bilang bagini, “Makanang ada dia pe guna untuk tong pe puru, kong tong pe puru Tuhan Allah biking untuk perlu makanang.” Tapi nanti waktu kiamat, dua-dua itu Tuhan Allah akan kase ancor. Tapi biar Tuhan Allah mo kase ancor, torang tara bole pake tong pe badan untuk baseks sabarang. Torang musti pake tong pe badan ini untuk biking Tuhan pe mau, kong Tuhan lagi yang akan jaga tong pe badan.

1 Korintus 6:18

Jadi, ngoni inga e, jang coba-coba ngoni baseks sabarang! Barang, dosa laeng yang orang jaga biking, itu tara ada dia pe akibat pa dia pe badan. Tapi kalu baseks sabarang, dosa itu biking rusak dia pe diri sandiri.

2 Korintus 12:21

Kita hawater, kalu kita datang itu, kita dapa ngoni masi biking dosa sama deng dulu, kong ngoni bolong bertobat. Kalu bagitu, kita jadi malu pa Tuhan Allah pe muka, kong kita mo manangis karna banya dari ngoni yang pe kalakuang masi cafarune, yang baseks sabarang, deng yang masi biking hal-hal yang tara pantas untuk mo biking.

Galatia 5:24

Sapa saja yang so jadi Kristus Yesus pe umat, dia itu so tara iko manusia pe mau yang suka biking dosa deng napsu yang tara bae. Itu bole mo kase sama deng dia so kase mati sifat itu di atas kayu salib.

Efesus 4:19

Dorang pe urat malu so putus, dorang kase dong pe diri untuk hidup iko dong pe napsu yang tara bae, deng dorang paling suka biking hal-hal yang cafarune.

Kolose 2:11

Kita pe maksut, karna ngoni so satu hati deng Yesus Kristus, ngoni so jadi Dia pe umat. Ngoni jadi Dia pe umat bukang karna ngoni dapa sunat iko agama Yahudi pe aturan, tapi karna Yesus Kristus so kase bebas pa ngoni dari manusia pe mau yang jaga biking dosa.

1 Tesalonika 4:3

Ini Tuhan Allah pe mau: serakan ngoni pe hidup pa Dia la ngoni hidup deng hati bersi. Jang ngoni baseks sabarang.

1 Tesalonika 4:5

Jang ngoni hidup iko ngoni pe napsu yang tara bae. Cuma orang-orang yang tara kanal pa Tuhan Allah yang jaga biking bagitu.

1 Timotius 6:10

Karna orang yang gila doi, dorang itu mo biking macam-macam kajahatan. Dorang itu so tara percaya lagi Yesus pe ajaran karna dorang berusaha mo jadi kaya. Jadi dia pe ahir kabawa, dorang dapa sengsara skali yang biking sampe dong pe hati saki.

Ibrani 12:16

Ngoni jaga supaya jang ada dari ngoni yang baseks sabarang. Jang lagi ada yang tara hormati pa Tuhan Allah sama deng dulu Esau. Esau itu ada hak untuk dapa janji berkat dari Tuhan Allah, tapi dia pandang enteng janji berkat itu kong jual dia pe hak sebagai ana yang tua, cuma untuk makanang satu piring.

Ibrani 13:4

Samua orang musti hargai dong pe perkawinan. Laki bini musti setia, tara bole baku suka deng orang laeng. Barang, Tuhan Allah akan hukum pa orang-orang yang baseks sabarang deng pa orang yang baku suka deng orang pe laki atau orang pe bini.

Ibrani 13:5

Jang ngoni gila doi, tapi lebe bae ngoni puas suda deng apa yang ada pa ngoni. Barang, Tuhan Allah so perna bilang bagini, “Kita tara akan perna kase biar pa ngana, deng Kita tara akan perna kase tinggal pa ngana sandiri.”

Yakobus 4:1

Bikiapa kong ngoni baku malawang deng bakalae? Itu karna di ngoni pe hati ada keinginan-keinginan yang tara bae. Keinginan-keinginan yang tara bae itu baku malawang di ngoni pe hati untuk kontrol ngoni pe diri sampe ngoni biking barang yang jahat.

1 Petrus 2:11

Sudara-sudara yang kita sayang, ngoni orang-orang percaya ini sama deng orang-orang pendatang deng orang-orang yang cuma hidup sementara saja di dunia ini. Jadi kita kase nasehat pa ngoni, jang ngoni hidup iko ngoni pe keinginan yang tara bae yang salalu baku lawan deng ngoni pe mau untuk biking barang yang bae.

Wahyu 21:8

Tapi ada orang-orang yang dapa hukum, dorang itu: orang yang stenga-stenga hati iko pa Tuhan, yang tara percaya, yang jaga biking hal-hal tara bae, yang jaga bunu orang, yang baseks sabarang, yang pake tiop-tiop, yang jaga semba pa dong pe puji-puji, deng samua orang yang pangbafoya. Dorang samua akan dapa hukum, dapa buang di api belerang yang luas deng mamanyala. Itu dia pe nama kematian yang kedua.”

Wahyu 22:15

Tapi ada orang-orang yang tara bole maso di kota itu. Dorang itu: orang yang tara percaya pa Tuhan, orang yang jaga pake tiop-tiop, orang yang baseks sabarang, orang yang jaga bunu orang, orang yang semba dong pe puji-puji, deng tiap orang yang suka bafoya kong biking itu turus-turus.