Kolose 3:15 - Perjanjian Baru Bahasa Melayu Maluku Utara

¹⁵ Biar suda Yesus Kristus biking ngoni pe hati tetap tenang, karna Tuhan Allah so pangge pa ngoni untuk hidup baku bawa bae-bae satu deng yang laeng, sama deng ngoni jadi Yesus Kristus pe badan yang taika satu deng yang laeng. Kong ngoni lagi musti salalu bilang tarimakasi banya pa Tuhan Allah.

Kolose 3:15 ပူးပေါင်းရင်းမြစ်များ

Yohanes 14:27

Skarang Kita mo pigi, tapi hati tenang yang ada pa Kita, Kita mo kase itu pa ngoni. Hati tenang yang Kita kase itu, dunia tara bisa mo kase pa ngoni. Jang ngoni hawater deng tako.

Yohanes 16:33

Kita kase tau samua yang mo jadi itu, supaya ngoni bole hidup deng hati tenang, karna ngoni so percaya pa Kita. Di dunia ini ngoni mo rasa menderita karna mo dapa siksa, tapi kase kuat suda ngoni pe hati! Barang, Kita so kase kala samua kuasa di dunia ini.”

Roma 1:21

Dorang so tau Tuhan Allah itu ada, tapi dorang tara puji deng hormat pa Dia. Dorang me tara bilang tarimakasi pa Dia. Dorang so tara pikir tentang Dia tapi dorang cuma pikir barang yang tarada dia pe guna, deng dong pe hati so tara mangarti apa yang butul.

Roma 14:17

Karna kalu Tuhan Allah Berkuasa sebagai Raja pa torang pe hidup, yang penting itu bukang apa yang torang makang deng minum. Tapi Tuhan Allah mau torang hidup butul, baku bawa bae-bae, deng torang pe hati sanang karna Roh Kudus ada di torang pe hati.

Roma 15:13

Tuhan Allah itu yang biking torang bole baharap deng yakin, apa yang Dia janji Dia akan biking. Karna itu, kita minta pa Tuhan Allah supaya Dia biking ngoni pe hati sanang deng hati tenang, karna ngoni so percaya pa Dia. Kita minta itu supaya Roh Kudus pe kuasa bakarja di ngoni pe hati untuk biking ngoni tatamba baharap deng yakin turus pa Tuhan Allah.

Roma 5:1

Tuhan Allah so biking torang jadi orang yang tara sala pa Dia pe muka karna torang percaya pa Yesus Kristus. Jadi torang deng Tuhan Allah pe hubungan so bae-bae ulang karna apa yang torang pe Tuhan Yesus Kristus so biking.

1 Korintus 10:17

Roti itu cuma satu kong ada pela-pela, baru torang makang sama-sama dari roti itu. Jadi, biar torang banya orang tapi torang samua sama deng so jadi satu badan karna torang pe hubungan deng Yesus Kristus itu.

1 Korintus 7:15

Tapi kalu laki atau bini yang tara percaya Tuhan Yesus itu mau baku pisa saja, kase biar suda. Itu berarti, ngoni yang percaya itu so tara taika lagi deng ngoni pe laki atau bini. Barang, Tuhan Allah mau ngoni hidup baku bawa bae-bae.

2 Korintus 4:15

Torang dapa samua siksa itu waktu tong kase tau Kabar Bae tentang Yesus Kristus, tapi samua itu untuk ngoni pe bae. Karna kalu lebe banya orang yang dengar tentang Tuhan Allah pe bae pa manusia, nanti tamba banya orang yang bilang tarimakasi pa Tuhan Allah. Deng bagitu, Tuhan Allah lebe dapa puji deng hormat.

2 Korintus 9:11

Tuhan Allah akan kase sagala macam berkat pa ngoni supaya ngoni me suka bakase talebe-lebe pa orang laeng. Kong nanti waktu torang antar ngoni pe doi sumbangan pa orang-orang percaya di Yerusalem, banya orang akan bilang tarimakasi banya pa Tuhan Allah.

Efesus 4:16

Kong Dia yang biking torang yang percaya jadi satu, sama deng torang ini satu badan: torang ini sama deng Dia pe kaki, tangan, deng samua-samua yang ada pa Dia pe badan. Dia pe kuasa ada pa torang samua, jadi kalu torang masing-masing biking tong pe tugas yang Dia so kase, kuasa itu biking torang lebe hari lebe tamba baku sayang deng lebe tamba baku kase kuat torang pe percaya.

Efesus 4:4

Torang yang percaya pa Yesus so jadi satu, sama deng torang so jadi satu badan, deng Roh Kudus yang ada pa torang me cuma satu. Kong cuma pa Tuhan Allah saja torang baharap karna Dia yang pangge pa torang untuk iko pa Dia.

Efesus 5:1

Sudara-sudara, ngoni itu Tuhan Allah pe ana-ana yang Dia sayang. Jadi, ngoni musti berusaha iko Tuhan Allah pe sifat.

Efesus 5:20

Kong dalam sagala hal, ngoni musti salalu bilang tarimakasi banya pa Tuhan Allah torang pe Bapa, karna samua yang torang pe Tuhan Yesus Kristus so biking.

Kolose 1:12

Deng kita minta lagi supaya ngoni salalu bilang tarimakasi banya pa Dia, torang pe Bapa. Bapa itu suda yang biking ngoni jadi pantas mo dapa apa yang Dia so janji pa orang-orang yang so jadi Dia pe umat. Kong janji itu, Dia so sadia untuk Dia pe umat di tampa yang tarang, tampa yang Dia Berkuasa sebagai Raja.

Kolose 2:7

Ngoni pe percaya pa Dia musti kuat, sama deng pohong pe akar yang tatanam kuat di tana. Deng ngoni pe hidup musti bagantong kuat pa Dia, sama deng ruma yang ada bangun di atas fandasi yang kuat. Kong ngoni pe percaya pa Dia me musti lebe tamba kuat, iko sama deng ajaran yang ngoni so tarima. Kong ngoni musti salalu bilang tarimakasi banya pa Tuhan Allah.

Kolose 3:17

Kong samua yang ngoni biking deng ngoni bilang, ngoni biking suda samua itu deng bae-bae, karna ngoni Tuhan Yesus pe wakil di dunia. Kong ngoni lagi musti salalu bilang tarimakasi banya pa Tuhan Allah, torang pe Bapa karna apa yang Tuhan Yesus so biking.

1 Tesalonika 5:18

Ada apa saja, mo susa ka sanang ka, ngoni musti bilang tarimakasi turus pa Tuhan Allah. Barang, itu Tuhan Allah pe mau untuk samua orang yang percaya pa Kristus Yesus.

1 Timotius 2:1

Timotius, kita bilang pa ngana, yang paling penting, torang berdoa pa Tuhan Allah. Torang minta apa yang torang perlu, torang minta untuk orang laeng lagi, deng torang bilang tarimakasi pa Dia untuk samua yang Dia so biking.

1 Timotius 6:12

Ngana musti berusaha turus percaya pa Tuhan Allah, sama deng orang yang iko lomba yang berusaha mo dapa piala. Tuhan Allah so pangge pa ngana untuk hidup deng Dia slama-lamanya. Waktu Tuhan Allah pangge pa ngana, ngana mangaku sunggu-sunggu percaya pa Yesus Kristus di orang banya pe muka.

Ibrani 13:15

Kong karna Yesus Kristus so jadi korban di kayu salib untuk hapus torang pe dosa, torang so tara perlu lagi bawa binatang korban persembahan untuk hapus torang pe dosa. Jadi, mari suda torang puji-puji pa Tuhan Allah. Torang pe kata-kata itu, so sama deng torang so serakan torang pe korban persembahan pa Dia.

Wahyu 7:12

Dorang bilang bagini, “Amin! Mari torang puji pa Tuhan Allah. Dia pe kuasa yang luar biasa deng Dia yang paling tau samua. Torang me bilang tarimakasi, deng hormati pa Dia. Dia itu torang pe Tuhan Allah yang berkuasa deng kuat sampe slama-lamanya! Amin.”