Kolose 3:13 - Perjanjian Baru Bahasa Melayu Maluku Utara

¹³ Kalu ada orang yang biking sala pa ngoni, ngoni musti tahang jang sampe mara, deng kalu ada yang taru dendam pa ngoni, jang ngoni simpang hati, tapi ngoni musti baku kase ampun. Inga! Tuhan Allah so kase ampun ngoni pe dosa, jadi ngoni lagi musti kase ampun orang yang biking sala pa ngoni.

Kolose 3:13 ပူးပေါင်းရင်းမြစ်များ

Matius 5:44

Tapi Kita mo bilang pa ngoni e, ngoni musti sayang pa ngoni pe musu-musu, deng ngoni musti kase berdoa pa orang-orang yang jaga siksa pa ngoni.

Matius 6:12

Deng kase ampun torang pe sala, sama deng torang me kase ampun orang yang sala pa torang.

Markus 11:25

Tapi kalu ngoni berdoa kong ngoni pe hati tara sanang pa orang yang biking sala pa ngoni, ngoni musti kase ampun pa orang itu dulu, supaya ngoni pe Bapa di sorga me akan kase ampun pa ngoni dari ngoni pe dosa-dosa.”

Lukas 11:4

Deng kase ampun torang pe dosa, karna torang me kase ampun tiap orang yang sala pa torang, kong jang kase biar torang tagoda biking barang yang jahat.’ ”

Lukas 23:34

[Yesus berdoa, “Bapa, kase ampun pa dorang karna dong tara tau apa yang dong biking.”] Kong tentara-tentara cabu undi untuk tentukan sapa-sapa yang mo dapa Yesus pe baju.

Roma 15:7

Karna itu, ngoni musti tarima satu deng yang laeng, sama deng Yesus Kristus me so tarima pa torang, supaya Tuhan Allah dapa puji deng hormat.

2 Korintus 2:10

jadi skarang, kita bilang pa ngoni, jang hukum lagi pa dia. Kalu ngoni kase ampun orang yang biking sala pa ngoni, kita me kase ampun pa dia. Kong kalu memang ada yang musti kita kase ampun, pasti kita kase ampun. Kita kase ampun orang itu untuk ngoni pe bae, kong Yesus Kristus yang jadi saksi kita kase ampun pa orang itu.

2 Korintus 6:6

Samua yang torang biking, tong biking deng hati bersi, torang lagi tau banya hal karna Tuhan Allah bantu pa torang, torang sabar, torang bae-bae deng orang, torang sayang orang butul-butul, deng Roh Kudus bakarja di torang pe hati.

Galatia 6:2

Ngoni baku-baku bantu suda satu deng yang laeng, karna itu sama deng ngoni ada bantu pikul orang laeng pe beban. Kalu ngoni biking bagitu, ngoni so biking parenta yang Yesus Kristus ada suru untuk ngoni mo biking.

Efesus 4:2

Ngoni pe hidup musti bagini: tara basombong, tara kasar pa orang, deng salalu sabar. Biar ada orang yang biking sala pa ngoni, jang capat mara, barang ngoni so baku sayang.

Efesus 4:32

Tapi lebe bae ngoni bae-bae pa orang laeng deng sayang pa dorang. Ngoni kase ampun suda pa orang yang biking sala pa ngoni, sama deng Tuhan Allah so kase ampun pa ngoni yang so percaya pa Yesus Kristus.

Efesus 5:2

Ngoni musti hidup baku-baku sayang, sama deng Kristus Yesus me sayang pa torang sampe Dia serakan Dia pe diri mati untuk torang. Kong apa yang Dia biking itu Tuhan Allah tarima, sama deng korban persembahan yang bobou sadap yang biking Tuhan Allah pe hati sanang.

Kolose 3:12

Tuhan Allah so pili pa ngoni, ngoni yang so jadi Dia pe umat, deng yang Dia sayang. Jadi ngoni pe hidup musti bagini: ada rasa kasiang, hati bae, tara sombong, tara kasar, deng salalu sabar.

Yakobus 2:13

Barang, waktu Tuhan Allah mo adili pa manusia nanti, Dia tara rasa kasiang pa orang-orang yang tara ada rasa kasiang pa orang laeng. Tapi orang-orang yang pe hidup ada rasa kasiang pa orang laeng, Tuhan Allah tara hukum pa dorang.

1 Petrus 2:21

Karna Tuhan Allah pangge pa ngoni untuk biking barang yang bae biar lagi menderita, barang Yesus Kristus me so menderita kong so kase conto tahang menderita, supaya ngoni pe hidup me iko conto yang Dia so kase tunju.