Kolose 3:12 - Perjanjian Baru Bahasa Melayu Maluku Utara

¹² Tuhan Allah so pili pa ngoni, ngoni yang so jadi Dia pe umat, deng yang Dia sayang. Jadi ngoni pe hidup musti bagini: ada rasa kasiang, hati bae, tara sombong, tara kasar, deng salalu sabar.

Kolose 3:12 ပူးပေါင်းရင်းမြစ်များ

Matius 24:22

Kong, kalu Tuhan Allah tara kase pende hari-hari sengsara itu, samua orang pasti akan mati. Tapi karna Dia sayang pa orang-orang yang Dia so pili, Dia kase pende hari-hari sengsara itu.

Matius 24:24

Karna nanti ada banya orang datang bilang kata, dorang Mesias, atau bilang kata, dorang nabi yang kase turus Tuhan Allah pe pasáng. Deng dorang me biking mujizat-mujizat deng tanda-tanda yang kase tunju dong pe kuasa yang hebat, supaya orang percaya pa dorang kong jang percaya pa Tuhan yang butul lagi. Deng kalu bisa, dorang me mo biking sesat pa orang-orang yang Tuhan Allah so pili.

Matius 24:31

Turus, trompet akan babunyi kuat skali, kong Anak Manusia mo suru pa Dia pe malaekat-malaekat kaluar untuk kumpul pa samua Dia pe umat yang Dia so pili dari samua tampa di dunia ini, dari ujung ka ujung.”

Markus 13:20

Kong, kalu Tuhan tara kase pende hari-hari sengsara itu, samua orang pasti akan mati. Tapi karna Dia sayang pa orang-orang yang Dia so pili, Dia kase pende hari-hari sengsara itu.

Markus 13:22

Karna nanti ada banya orang datang bilang kata, dorang Mesias, atau bilang kata, dorang nabi yang kase turus Tuhan Allah pe pasáng. Deng dorang me biking mujizat-mujizat deng tanda-tanda yang kase tunju dong pe kuasa supaya orang percaya pa dorang kong jang percaya pa Tuhan yang butul lagi. Deng kalu bisa, dorang me mo biking sesat pa orang-orang yang Tuhan Allah so pili.

Markus 13:27

Kong, Anak Manusia akan suru pa malaekat-malaekat untuk kumpul pa samua Dia pe umat yang Dia so pili dari samua tampa di dunia ini, dari ujung ka ujung.”

Lukas 1:78

Torang pe Tuhan Allah rasa kasiang pa torang. Karna itu, Dia datang dari sorga kase slamat pa torang. Dia pe datang itu, akan jadi sama deng matahari pagi kaluar

Lukas 18:7

Kalu orang tara adil macam itu mo tolong janda itu, lebe-lebe lagi Tuhan Allah pasti mo tolong pa Dia pe umat yang Dia pili, yang siang malam minta tolong turus-turus pa Dia. Tara mungkin Dia mo tunda-tunda turus untuk tolong pa dorang.

Roma 1:7

Kita tulis surat ini pa ngoni samua yang percaya yang tinggal di kota Roma. Ngoni Tuhan Allah sayang, deng Dia so pili pa ngoni la jadi Dia pe umat. Kita minta pa Tuhan Allah torang pe Bapa, deng pa Tuhan Yesus Kristus, supaya kase yang bae pa ngoni, deng salalu biking ngoni pe hati tetap tenang.

Roma 13:14

Tapi lebe bae tiap hari torang iko cara hidup yang Yesus Kristus torang pe Tuhan so kase conto. Deng jang sama skali torang iko manusia pe mau yang suka biking dosa untuk kase puas torang pe keinginan.

Roma 9:11

Waktu ana dua itu bolong lahir, kong dorang bolong tau biking barang yang bae deng yang jahat, Tuhan Allah so bilang bagini pa Ribka, “Ngana pe ana yang bongso nanti mo jadi tuang pa dia pe kaka.” Tuhan Allah pe maksut supaya torang bole lia, Dia pili bukang iko apa yang dorang dua ada biking, tapi iko Tuhan Allah pe mau.

1 Korintus 13:4

Orang yang sayang pa orang laeng, dia itu sabar, hati bae, tara mangiri, tara angka-angka diri, deng tara sombong.

2 Korintus 6:6

Samua yang torang biking, tong biking deng hati bersi, torang lagi tau banya hal karna Tuhan Allah bantu pa torang, torang sabar, torang bae-bae deng orang, torang sayang orang butul-butul, deng Roh Kudus bakarja di torang pe hati.

Galatia 5:6

Karna untuk torang yang so sama-sama percaya pa Kristus Yesus, torang mo iko aturan sunat itu ka, tarada ka, itu tara penting, tapi yang paling penting torang pe percaya pa Yesus Kristus yang dapa lia dari torang pe sayang pa orang laeng.

Efesus 1:4

Barang, dulu waktu Tuhan Allah bolong biking dunia ini, Dia so pili pa torang untuk percaya pa Yesus Kristus supaya torang bole jadi Tuhan Allah pe umat yang pe hati bersi, deng tarada sala pa Dia pe muka.

Efesus 4:2

Ngoni pe hidup musti bagini: tara basombong, tara kasar pa orang, deng salalu sabar. Biar ada orang yang biking sala pa ngoni, jang capat mara, barang ngoni so baku sayang.

Efesus 4:24

supaya ngoni pe hidup beruba jadi baru, karna memang Tuhan Allah so cipta pa ngoni untuk iko Dia pe sifat. Deng bagitu, ngoni jadi orang yang bole biking barang yang butul deng hidup deng hati yang bersi.

Efesus 4:32

Tapi lebe bae ngoni bae-bae pa orang laeng deng sayang pa dorang. Ngoni kase ampun suda pa orang yang biking sala pa ngoni, sama deng Tuhan Allah so kase ampun pa ngoni yang so percaya pa Yesus Kristus.

Filipi 1:8

Tuhan Allah suda yang jadi kita pe saksi, kita ini paling rindu skali mo baku dapa deng ngoni, karna kita sayang pa ngoni sama deng Kristus Yesus sayang pa ngoni.

Kolose 3:10

Kong skarang ngoni yang so jadi percaya, ngoni pe hidup so beruba jadi baru, kong lebe hari Tuhan Allah lebe tamba ruba turus-turus ngoni pe sifat la jadi sama deng Dia pe sifat. Dia biking bagitu la ngoni bisa lebe tamba kanal pa Dia.

1 Tesalonika 5:15

Perhatikan bae-bae, jang sampe ada orang yang balas orang pe jahat deng yang jahat. Tapi ngoni musti salalu berusaha biking yang bae di antara ngoni sandiri deng samua orang.

2 Timotius 1:9

Tuhan Allah yang so kase slamat pa torang dari dosa-dosa deng Dia pangge pa torang untuk jadi Dia pe umat sandiri la hidup deng hati bersi. Dia biking samua itu bukang karna torang ada biking yang bae, tapi karna Tuhan Allah pe mau deng karna Dia pe hati bae pa manusia. Memang, dari dulu waktu Tuhan Allah bolong biking dunia ini, Dia so sayang pa torang, jadi Tuhan Allah biking rencana Kristus Yesus datang di dunia.

2 Timotius 2:10

Karna itu, kita sabar tanggung siksa itu samua deng tetap kase tau Kabar Bae tentang Yesus Kristus, supaya orang yang Tuhan Allah so pili mo jadi Dia pe umat bole percaya pa Kristus Yesus. Deng bagitu, dong bole dapa slamat deng dapa puji deng hormat sama-sama deng Tuhan Allah slama-lamanya.

Titus 1:1

Titus, salam dari kita Paulus. Kita ini jaga biking apa yang Tuhan Allah suru deng kita ini Yesus Kristus pe utusan yang orang sebut rasul. Kita jadi Dia pe rasul itu supaya kita kase tau Tuhan pe Kabar Bae pa orang-orang yang Dia so pili la dorang dapa slamat. Kita dapa tugas kase kuat dorang pe percaya deng kase tau pa dorang ajaran yang butul. Ajaran itu yang mo tolong pa dorang supaya dorang bisa hidup iko Tuhan Allah pe mau.

1 Petrus 1:2

Tuhan Allah, torang pe Bapa so pili pa ngoni iko Dia pe rencana yang dari dulu. Kong Dia pe Roh yang biking ngoni jadi Dia pe umat supaya ngoni dengar-dengaran pa Yesus Kristus, deng supaya Dia pe dara yang so tatumpa biking ngoni jadi bersi dari dosa-dosa. Kita minta pa Tuhan Allah, supaya Dia kase Dia pe bae pa ngoni, deng Dia biking ngoni pe hati tetap tenang, kong Dia kase samua itu talebe-lebe.

2 Petrus 1:10

Jadi sudara-sudara, karna Tuhan Allah so pili deng pangge pa ngoni jadi Dia pe umat, ngoni musti berusaha karas untuk iko pa Dia supaya ngoni tau deng yakin Dia so pili deng pangge pa ngoni. Karna kalu ngoni biking samua yang bae yang kita bilang itu, ngoni tara akan kase tinggal ngoni pe percaya pa Dia, itu sama deng ngoni ada bajalang turus-turus kong ngoni pe kaki tara tagate di batu sampe jatu.

1 Yohanes 4:19

Torang baku sayang, karna Tuhan Allah yang kamuka sayang pa torang.

2 Yohanes 1:13

Ibu pe sudara yang Tuhan pili, dia pe ana-ana me ada kirim salam pa ibu.

Wahyu 17:14

Dorang mo baku prang deng Anak Domba. Tapi Anak Domba itu sama-sama deng Dia pe umat mo kase kala pa dorang, karna Anak Domba itu, Tuhan dari samua tuhan, deng Raja dari samua raja. Kong orang-orang yang sama-sama deng Anak Domba, dorang itu yang Tuhan so pangge, so pili deng yang setia pa Dia.”