Kolose 3:11 - Perjanjian Baru Bahasa Melayu Maluku Utara

¹¹ Ngoni yang so percaya, ngoni pe hidup so beruba jadi baru, jadi tara penting kalu ngoni itu orang Yahudi ka, bukang Yahudi ka, ngoni so sunat ka, tarada ka, atau biar ngoni orang luar ka, orang yang cuma tinggal di utang ka, atau ngoni orang karja yang orang so bili ka, tarada ka, itu tara penting. Tapi yang paling penting itu percaya pa Yesus Kristus. Dia itu ada sama-sama deng torang samua yang percaya pa Dia.

Kolose 3:11 ပူးပေါင်းရင်းမြစ်များ

Yohanes 14:23

Yesus jawab pa dia, “Kalu orang sayang pa Kita, dia mo biking Kita pe ajaran, kong Kita pe Bapa akan sayang pa dia. Kong Kita deng Kita pe Bapa mo datang tinggal sama-sama deng dia.

Yohanes 15:5

Kita ini sama deng pohong anggur kong ngoni ini sama deng pohong anggur pe cabang-cabang. Jadi, sama deng pohong deng cabang yang jadi satu, bagitu lagi deng ngoni, kalu ngoni hidup satu hati deng Kita, Kita lagi hidup satu hati deng ngoni, turus ngoni bole biking yang bae yang kase sanang Tuhan Allah pe hati. Karna kalu ngoni tara satu hati deng Kita, ngoni ini tara mampo biking yang bae untuk kase sanang pa Tuhan Allah.

Yohanes 17:23

Kita suka dorang itu jadi satu hati deng Kita, kong Bapa jadi satu deng Kita, supaya dorang itu butul-butul jadi satu hati satu deng yang laeng. Deng bagitu, orang-orang yang tara percaya pa Bapa di dunia ini bole tau, Bapa yang utus pa Kita kong Bapa itu sayang pa dorang, sama deng Bapa sayang pa Kita.

Kisah Para Rasul 15:17

Kita biking bagitu supaya samua orang cari pa Kita, Tuhan, deng samua suku bangsa bukang Yahudi yang Kita pili bole jadi Kita pe umat sandiri.’ Itu suda yang Tuhan Allah bilang, kong Dia yang biking samua ini.

Kisah Para Rasul 28:2

Orang-orang di situ bae skali pa torang. Waktu itu, so mulai ujang deng dingin skali. Jadi, dorang biking api kong pangge pa torang ka sana barahu.

Kisah Para Rasul 28:4

Waktu orang-orang pulo itu lia ular masi tagantong di Paulus pe tangan, dorang baku bilang, “Orang ini pasti so perna bunu orang. Jadi biar dia slamat di laut tapi tetap dia dapa dia pe katula dari tong pe puji-puji sampe dia tara bisa hidup lagi.”

Roma 1:14

Kita ada beban supaya kase tau Kabar Bae itu pa samua orang: pa orang-orang yang tinggal di kota, deng pa orang-orang yang masi takablakang, pa orang-orang yang skola, deng pa orang-orang yang tara skola.

Roma 10:12

Samua orang bole dapa slamat, barang orang Yahudi deng orang yang bukang Yahudi tarada dia pe beda, karna Tuhan Allah itu samua orang pe Tuhan. Dia itu paling bae pa samua orang yang minta tolong pa Dia.

Roma 3:22

torang bole jadi orang yang tara sala pa Dia pe muka karna torang percaya pa Yesus Kristus. Itu mo jadi pa samua orang yang percaya, karna Tuhan Allah tara pili-pili orang.

Roma 3:29

Karna Tuhan Allah itu bukang cuma orang-orang Yahudi pe Tuhan saja, Dia itu me orang-orang yang bukang Yahudi pe Tuhan lagi.

1 Korintus 12:13

Barang torang ini, ada orang Yahudi, deng ada yang bukang Yahudi. Ada orang karja yang dia pe tuang so bili, deng ada orang yang bebas. Torang samua Roh Kudus biking torang jadi satu, karna torang samua dapa baptis dari Roh Kudus yang sama. Roh Kudus yang sama itu, yang so ada pa torang samua, itu sama deng torang ada minum dari mata aer yang sama.

1 Korintus 14:11

Tapi kalu kita tara mangarti bahasa yang orang laeng bilang pa kita, kita anggap dia orang luar. Deng kalu kita bicara pa dia, dia me anggap kita orang luar.

1 Korintus 7:19

Karna orang yang sunat deng tara sunat itu tara penting. Yang penting itu iko Tuhan Allah pe parenta-parenta.

Galatia 2:20

Jadi, skarang kita hidup tara iko kita pe kekuatan sandiri lagi, tapi Yesus Kristus yang hidup deng berkuasa pa kita pe diri. Kong selama kita hidup di dunia skarang ini, kita hidup cuma deng percaya saja pa Anak Allah. Dia yang so sayang pa kita deng yang so serakan Dia pe diri mati untuk kita.

Galatia 5:6

Karna untuk torang yang so sama-sama percaya pa Kristus Yesus, torang mo iko aturan sunat itu ka, tarada ka, itu tara penting, tapi yang paling penting torang pe percaya pa Yesus Kristus yang dapa lia dari torang pe sayang pa orang laeng.

Efesus 1:23

Kong orang-orang percaya itu bole kase sama deng Dia pe badan. Dia itu sama deng torang pe kapala yang biking torang ini jadi lengkap. Jadi, Yesus Kristus itu suda yang kase apa yang Dia punya pa Dia pe jemaat. Kong Dia me yang berkuasa pa samua-samua yang ada di mana saja.

Efesus 2:14

Barang, Yesus Kristus itu suda yang biking torang samua pe hubungan deng Tuhan Allah jadi bae-bae ulang, supaya torang orang Yahudi deng ngoni orang yang bukang Yahudi jadi baku bae-bae ulang kong jadi satu. Dulu, torang orang Yahudi deng ngoni orang yang bukang Yahudi baku musu sama deng ada pagar tembok basar yang kase pisa pa torang. Tapi waktu Yesus mati di kayu salib, itu sama saja deng Dia so kase ancor pagar itu.

Efesus 2:15

Skarang, karna deng Yesus Kristus mati di kayu salib, Dia biking supaya torang yang percaya pa Dia tara perlu lagi iko aturan-aturan di lima kitab Musa untuk dapa slamat dari dosa-dosa. Kong karna itu, torang orang Yahudi yang jaga iko aturan itu, deng ngoni orang yang bukang Yahudi yang tara iko aturan itu, bole jadi satu kelompok yang baru karna torang samua so satu hati deng Yesus Kristus, kong Dia biking torang bole hidup baku bawa bae-bae.

Efesus 3:17

supaya Yesus Kristus tetap tinggal di ngoni pe hati karna ngoni percaya pa Dia. Kita minta pa Tuhan Allah supaya ngoni pe sayang lebe tamba basar pa Tuhan Allah deng pa samua orang, itu sama deng pohong pe akar yang lebe tatanam kuat di tana.

Efesus 3:6

Tuhan Allah pe rencana itu bagini: ngoni orang-orang yang bukang Yahudi akan percaya Kabar Bae tentang Yesus Kristus, jadi ngoni me bole sama-sama deng orang-orang Yahudi jadi Dia pe ana-ana yang tarima samua yang Tuhan Allah so janji. Ngoni orang bukang Yahudi deng torang orang Yahudi so jadi satu sama deng jadi satu badan. Kong torang samua itu mo dapa yang Tuhan Allah janji pa torang yang so percaya pa Kristus Yesus.

Efesus 6:8

Inga, Tuhan nanti akan balas pa sapa saja yang biking apa saja yang bae. Biar lagi dia itu orang karja yang so dapa bili ka, tarada ka, Tuhan akan balas samua.

Kolose 2:10

Kong karna ngoni so satu hati deng Yesus Kristus, samua yang ngoni perlu, so ada pa Dia. Dia itu suda yang lebe berkuasa dari samua yang bapimpin deng dari samua kuasa yang ada di langit deng di bumi.

1 Yohanes 5:20

Torang me tau Anak Allah so datang kong so biking torang mangarti la torang kanal Tuhan Allah yang Butul. Torang so hidup satu hati deng Tuhan Allah, karna torang so hidup satu hati deng Dia pe Anak Yesus Kristus. Dia itu suda Tuhan Allah yang Butul deng Dia yang biking orang bole dapa hidup deng Tuhan Allah slama-lamanya.

2 Yohanes 1:9

Tiap orang yang so tara iko Yesus Kristus pe ajaran, kong iko ajaran laeng, dia itu so tara hidup satu hati deng Tuhan Allah. Tapi orang yang iko Yesus Kristus pe ajaran, dia itu so hidup satu hati deng Tuhan Allah, torang pe Bapa, deng Yesus Kristus, Anak Allah.