Kolose 2:8 - Perjanjian Baru Bahasa Melayu Maluku Utara

⁸ Sudara-sudara, ngoni musti ati-ati, jang sampe ada orang yang pengaru pa ngoni untuk iko deng dong pe ajaran-ajaran agama yang tara butul. Dorang pe ajaran itu tara ada dia pe guna, karna bukang ajaran tentang Yesus Kristus. Tapi dorang pe ajaran itu dari dong pe orang tua dulu-dulu deng dari roh-roh yang berkuasa di dunia ini.

Kolose 2:8 ပူးပေါင်းရင်းမြစ်များ

Matius 10:17

Ngoni musti ati-ati pa samua orang! Barang, ada orang-orang yang mo serakan pa ngoni la dapa adili di pemimpin-pemimpin agama Yahudi. Ngoni me mo dapa pukul di ruma-ruma ibada agama Yahudi, pake tali yang ada barang tajam di dia pe ujung.

Matius 16:6

Kong Yesus bilang pa dorang, “Ngoni musti ati-ati deng orang dari aliran Farisi pe ragi deng yang dari aliran Saduki pe ragi.”

Matius 7:15

Yesus bilang lagi, “Ngoni musti ati-ati deng nabi-nabi palsu yang datang pa ngoni! Barang, dorang bilang kata, dorang itu orang yang jaga kase turus Tuhan Allah pe pasáng, padahal bukang. Dorang pura-pura bae sama deng domba, padahal dorang jahat sama deng anjing utang.

Kisah Para Rasul 17:18

Di kota Atena ada dua kelompok jago bapikir yang tara percaya Tuhan Allah, satu kelompok iko Epikuros pe ajaran deng satu kelompok lagi iko Stoa pe ajaran. Paulus kase tau pa dorang Kabar Bae tentang Yesus Kristus, lebe kusus lagi tentang Yesus Kristus mati tapi hidup ulang. Karna dorang dengar Paulus bilang Yesus hidup ulang, babarapa dari dorang itu bilang bagini, “Orang ini banya bicara, tapi apa yang dia bilang itu paling tara maso akal.” Tapi yang laeng lagi bilang, “Orang ini so kase tau pa torang tentang dia pe puji-puji yang torang tara kanal.”

Kisah Para Rasul 17:32

Waktu orang-orang Atena itu dengar orang mati bole hidup ulang, babarapa dari dorang cuma kase tatawa pa Paulus. Tapi yang laeng bilang pa Paulus, “Torang masi suka mo dengar lagi yang ngana bilang tadi.”

Roma 16:17

Sudara-sudara, kita minta deng butul-butul pa ngoni, ati-ati pa orang yang jaga kase ajaran yang baku beda deng yang torang so ajar pa ngoni. Ati-ati karna dorang suka biking ngoni jadi tapisa-pisa deng biking ngoni jadi ragu-ragu deng ajaran yang torang so kase ajar pa ngoni. Jadi jang badekat pa dorang itu!

1 Korintus 10:12

Karna itu, sapa yang pikir dia pe percaya pa Tuhan so kuat, dia musti bae-bae la jang dia tagoda biking dosa.

1 Korintus 8:9

Tapi, biar ngoni bisa makang makanang apa saja, ngoni musti tetap ati-ati, jang sampe deng ngoni makang itu, itu biking ngoni pe sudara laeng yang bolong kuat percaya pa Tuhan, jadi berdosa. Itu sama deng ngoni biking dorang pe kaki tagate di batu kong jatu.

2 Korintus 10:5

Kong deng kuasa dari Tuhan Allah itu, torang mampo lawan samua pikiran yang tara butul dari orang yang malawang Tuhan Yesus pe ajaran. Biar dorang itu pake alasan iko manusia pe pande, torang mampo kase kala samua dorang pe pikiran yang sombong yang biking orang tara percaya, sampe orang bisa butul-butul dengar-dengaran pa Yesus Kristus.

Galatia 1:14

Kita banya skali balajar tentang aturan-aturan agama Yahudi deng kita jaga biking aturan itu. Jadi kalu mo kase banding deng orang Yahudi yang satu umur deng kita, kita yang paling jago. Kita memang butul-butul iko samua aturan yang kita pe orang tua dulu-dulu jaga iko.

Galatia 4:3

Bagitu lagi deng torang manusia. Waktu Tuhan Yesus bolong datang kase slamat pa torang, torang itu masi jaga iko aturan-aturan di dunia ini, macam deng ana kacil iko-iko dia pe orang tua pe parenta.

Galatia 4:9

Tapi skarang ngoni so kanal pa Tuhan Allah, atau lebe bae kita bilang, Tuhan Allah yang so kanal pa ngoni ini. Jadi bikiapa kong ngoni bale lagi untuk jadi aturan-aturan di dunia ini pe suru-suru? Aturan-aturan itu tarada dia pe guna deng tara bisa kase slamat pa ngoni.

Galatia 5:15

Tapi kalu ngoni cuma bakalae deng baku malawang, ngoni musti ati-ati, jang sampe ngoni sama deng binatang yang baku-baku gigi sampe baku abis.

Efesus 2:2

Waktu itu, ngoni hidup masi suka biking dosa sama deng orang yang bolong kanal pa Tuhan Allah, baru ngoni lagi iko Iblis pe mau. Iblis itu setang-setang pe raja yang berkuasa di udara, deng dia itu suda yang skarang ini ada pengaru pa orang-orang yang tara dengar-dengaran pa Tuhan Allah.

Efesus 4:20

Tapi ajaran yang ngoni so dengar tentang Yesus Kristus itu, bukang kase ajar untuk hidup tara bae macam bagitu!

Efesus 5:6

Jang ngoni dapa kase bodo dari orang-orang yang bilang kata, hal-hal itu bukang dosa. Barang, Tuhan Allah pasti mo hukum pa orang-orang yang biking hal-hal itu, karna dorang tara dengar-dengaran pa Tuhan Allah.

Filipi 3:2

Ngoni musti ati-ati deng orang-orang yang bawa ajaran yang tara butul, dorang yang bilang kata, kalu ngoni mo jadi Tuhan Allah pe umat, ngoni musti dapa sunat dulu. Padahal, deng dorang paksa pa ngoni bagitu, dorang jahat sama deng anjing-anjing. Dorang itu sama saja deng orang yang tara percaya.

Kolose 2:18

Jadi jang ngoni dengar pa orang-orang yang bilang kata, Tuhan Allah mo hukum pa ngoni karna ngoni tara iko dorang pe aturan agama. Dorang bapuasa banya-banya supaya orang lia kata, dorang hebat kong suru ngoni iko. Deng dorang suru pa ngoni semba pa malaekat-malaekat. Dorang suka bicara sombong tentang dong pe penglihatan-penglihatan yang dong dapa dari Tuhan. Dorang jaga kase sombong deng dong pe diri, itu karna yang dorang biking itu cuma iko manusia pe pikiran.

Kolose 2:20

Sudara-sudara, ngoni so jadi satu hati deng Yesus Kristus jadi ngoni pe hidup yang lama sama deng so mati sama-sama deng Dia, sampe ngoni so bebas dari roh-roh yang berkuasa di dunia ini. Jadi bikiapa kong ngoni masi suka iko aturan-aturan di dunia yang macam bagini:

Kolose 2:22

Tara usa iko suda! Aturan-aturan itu manusia anggap penting jadi suru orang iko, padahal aturan-aturan itu cuma tentang makang deng minum yang tara tahang lama, abis makang deng minum, so abis suda.

Kolose 2:23

Memang aturan-aturan itu dapa lia bae karna orang yang iko aturan itu dapa lia hebat kata. Dorang iko aturan-aturan yang biking orang bilang dong tara sombong, kong biking siksa diri sandiri supaya dapa puji. Padahal sebenarnya aturan-aturan itu tarada dia pe guna, karna tara biking orang beruba jadi bae. Dorang masi suka kase puas dorang pe diri iko manusia pe mau yang suka biking dosa.

1 Timotius 6:20

Timotius, ngana musti jaga bae-bae samua yang Tuhan so kase percaya pa ngana. Jang ngana badekat deng orang yang bacarita hal yang tarada dia pe guna deng yang tara hormati pa Tuhan Allah. Deng jang ngana badekat pa orang yang bawa ajaran sesat, yang orang jaga bilang ‘pengetahuan’, padahal itu sala.

2 Timotius 3:13

Tapi orang yang jahat deng yang tukang tipu, dorang itu lebe hari lebe tamba jahat. Dorang tipu pa orang-orang kong orang laeng me tipu pa dorang.

Ibrani 13:9

Jang ngoni iko ajaran-ajaran yang tara butul yang bole biking ngoni jadi sesat. Barang, kalu iko aturan tentang makanang yang halal deng haram, tarada dia pe guna untuk biking ngoni jadi sempurna pa Tuhan Allah pe muka. Cuma Tuhan Allah pe sayang deng pe bae yang bisa biking ngoni pe percaya pa Tuhan jadi kuat.

Ibrani 3:12

Jadi sudara-sudara, ngoni musti ati-ati. Jang sampe ada satu dari ngoni yang pe hati jahat sama deng itu, sampe so tara percaya deng tara iko lagi pa Tuhan Allah yang hidup.

1 Petrus 1:18

Barang ngoni tau, Tuhan Allah bayar mahal supaya ngoni dapa bebas dari ngoni pe cara hidup yang lama yang tara ada dia pe guna. Cara hidup yang lama itu yang ngoni tarima dari ngoni pe orang tua dulu-dulu. Tuhan Allah bayar mahal supaya ngoni bole bebas, itu Dia tara bayar deng barang yang nanti mo rusak macam deng mas atau perak,

2 Petrus 3:17

Jadi sudara-sudara yang kita sayang, ngoni so kamuka tau samua itu. Karna itu ngoni musti ati-ati deng guru-guru palsu yang jaga malawang Tuhan Yesus pe ajaran, supaya ngoni tara iko dong pe sala itu, tapi ngoni tetap percaya.

2 Yohanes 1:8

Jadi ngoni musti jaga bae-bae ngoni pe percaya pa Yesus Kristus, supaya torang pe karja kase tau Kabar Bae pa ngoni itu tetap ada dia pe guna, deng supaya ngoni tetap dapa ngoni pe upah yang Tuhan Allah so janji.