Kolose 2:5 - Perjanjian Baru Bahasa Melayu Maluku Utara

⁵ Barang, biar lagi kita tara sama-sama deng ngoni di sana, tapi kita tetap inga pa ngoni, jadi anggap saja kita ada sama-sama deng ngoni. Kita sanang lagi, dapa dengar ngoni so satu hati kong ngoni pe percaya tetap kuat pa Yesus Kristus.

Kolose 2:5 ပူးပေါင်းရင်းမြစ်များ

Kisah Para Rasul 2:42

Orang-orang percaya itu jaga bakumpul sama-sama untuk baku kase kuat dorang pe percaya pa Yesus. Dorang rajin dengar ajaran tentang Yesus dari rasul-rasul. Dorang pela-pela roti kong makang sama-sama, supaya inga Tuhan Yesus pe sengsara deng kematian. Dorang me berdoa sama-sama.

Kisah Para Rasul 20:21

Kita salalu kase inga deng karas pa orang-orang Yahudi deng pa orang-orang bukang Yahudi, supaya dorang bertobat kong iko pa Tuhan Allah deng percaya pa Tuhan Yesus, torang pe Tuhan.

1 Korintus 11:34

Kalu ada yang lapar, lebe bae dia baalas dulu dari ruma. Deng bagitu, waktu ngoni bakumpul iko perjamuan, ngoni tara dapa hukuman dari Tuhan. Kong tentang hal-hal yang laeng lagi, nanti kita datang baru kita bilang.

1 Korintus 14:40

Tapi waktu ngoni baibada, ngoni musti biking itu bae-bae, supaya jang kaco.

1 Korintus 15:58

Jadi sudara-sudara yang kita sayang, ngoni pe percaya musti tetap kuat. Jang kase biar ada yang pengaru pa ngoni sampe ngoni ragu deng ngoni pe percaya itu. Ngoni karja turus untuk Tuhan butul-butul, karna ngoni tau, apa yang ngoni biking untuk Tuhan itu tara akan parcuma.

1 Korintus 16:13

Ngoni musti jaga diri bae-bae! Ngoni pe percaya musti kuat pa Tuhan! Jang ngoni tako, tapi ngoni musti barani!

Kolose 2:1

Sudara-sudara yang percaya di kota Kolose, biar ngoni bolong perna baku dapa deng kita, tapi kita mau ngoni tau, kita butul-butul berusaha untuk bantu pa ngoni, pa orang-orang di kota Laodikia deng pa samua orang di tampa laeng yang bolong kanal pa kita.

1 Tesalonika 2:17

Sudara-sudara, torang terpaksa baku pisa deng ngoni sementara waktu. Tapi biar torang jao dari ngoni, torang salalu inga pa ngoni. Torang rindu skali pa ngoni kong torang berusaha la mo baku dapa ulang deng ngoni.

1 Tesalonika 3:8

Jadi skarang, torang rasa torang pe hidup butul-butul ada dia pe guna, karna ngoni tetap percaya pa Tuhan.

Ibrani 3:14

Barang, kalu torang tetap pegang turus apa yang torang so percaya dari pertama sampe waktu dunia ini kiamat, torang akan dapa bagian dari samua yang ada pa Yesus Kristus.

Ibrani 6:19

Torang pe harapan itu biking torang pe hati kuat deng tenang, sama deng jangkar di laut yang tara tapinda-pinda. Kong karna itu, torang so bole langsung berdoa pa Dia, itu sama deng torang so bole maso pa Tuhan Allah pe Ruang Paling Suci yang dulu orang biasa tara bole maso karna ada pele deng kaeng pampele basar.

1 Petrus 5:9

Kase kuat ngoni pe percaya pa Tuhan deng lawan pa Iblis, barang ngoni tau, bukang cuma ngoni yang dapa siksa karna percaya, tapi ngoni pe sudara-sudara yang percaya di seluru dunia ini me, dapa siksa sama deng yang ngoni rasa.