Kolose 2:19 - Perjanjian Baru Bahasa Melayu Maluku Utara

¹⁹ Orang-orang macam bagitu so tara butul-butul lagi iko pa Yesus Kristus. Padahal Yesus Kristus itu Kapala dari samua Dia pe umat. Dia yang biking pa torang jadi satu, deng supaya torang pe percaya pa Tuhan lebe tamba kuat. Ini bole kase sama deng kapala deng badan yang jadi satu karna ada sendi-sendi yang tara biking tapisa satu deng yang laeng.

Kolose 2:19 ပူးပေါင်းရင်းမြစ်များ

Lukas 5:38

Jadi, anggur baru musti simpang di tampa yang baru lagi.

Yohanes 17:21

Bapa, Kita minta supaya dorang itu jadi satu hati satu deng yang laeng, sama deng Kita lagi jadi satu deng Bapa kong Bapa jadi satu deng Kita. Kita minta dorang jadi satu hati satu deng yang laeng supaya dorang lagi jadi satu deng Torang. Kita minta bagitu supaya kalu torang samua jadi satu, samua orang di dunia ini jadi percaya, Bapa yang utus pa Kita.

Kisah Para Rasul 4:32

Samua orang yang percaya pa Yesus, dorang hidup satu hati deng satu pikiran. Tarada satu orang yang bilang dia pe harta cuma untuk dia pe diri sandiri saja, tapi jadi samua orang punya.

Roma 11:17

Tapi orang Yahudi yang tara percaya pa Yesus Kristus, dorang itu sama deng cabang-cabang yang dapa potong dari pohong zaitun yang ada tanam di kobong. Kong orang yang bukang Yahudi, kalu dorang percaya pa Yesus Kristus, dong itu sama deng cabang-cabang dari pohong zaitun yang batumbu sandiri kong tuang kobong datang potong cabang-cabang itu turus kase malakat di pohong zaitun yang ada tanam di kobong itu. Deng bagitu, cabang dari pohong yang batumbu sandiri dapa hidup dari pohong yang ada tanam di kobong itu. Cabang itu sama deng ngoni orang yang bukang Yahudi, ngoni ini yang so percaya, jadi ngoni so tarima Tuhan Allah pe janji yang dulu Dia so kase pa orang Yahudi.

1 Korintus 1:10

Sudara-sudara, karna kita ini torang pe Tuhan Yesus Kristus pe utusan, jadi kita minta pa ngoni samua supaya ngoni baku dengar satu deng yang laeng. Ngoni tara bole tapisa satu deng yang laeng, tapi ngoni musti tetap jadi satu, satu pikiran deng satu tujuan.

1 Korintus 11:3

Tapi ada yang kita masi mo kase inga pa ngoni lagi: yang jadi kapala pa samua laki-laki yang percaya, itu Yesus Kristus. Kong yang jadi kapala pa parampuang yang percaya, itu laki-laki. Baru, yang jadi kapala pa Yesus Kristus, itu Tuhan Allah.

1 Korintus 3:6

Kita yang pertama kase tau Kabar Bae itu pa ngoni, abis itu, Apolos datang ajar pa ngoni, kong Tuhan Allah suda yang biking ngoni pe percaya lebe tamba kuat. Itu sama deng kita yang tanam bibit, Apolos yang siram bibit yang kita so tanam itu, kong Tuhan Allah yang kase batumbu bibit itu.

Efesus 1:22

Tuhan Allah kase kala samua-samua yang ada, supaya samua-samua itu ada di bawa Yesus Kristus pe kuasa. Deng Tuhan Allah biking Yesus Kristus jadi kapala pa samua orang yang percaya pa Dia.

Efesus 1:23

Kong orang-orang percaya itu bole kase sama deng Dia pe badan. Dia itu sama deng torang pe kapala yang biking torang ini jadi lengkap. Jadi, Yesus Kristus itu suda yang kase apa yang Dia punya pa Dia pe jemaat. Kong Dia me yang berkuasa pa samua-samua yang ada di mana saja.

Efesus 2:21

Torang yang so satu hati deng Yesus Kristus, Dia so biking torang jadi Dia pe umat yang hidup cuma biking Dia pe mau, itu sama deng bahan-bahan ruma yang ada kase susun di atas batu fandasi yang kuat itu sampe jadi satu ruma yang ada kase kusus untuk Tuhan Allah tinggal.

Efesus 4:3

Ngoni musti berusaha sunggu-sunggu supaya hidup baku bawa bae-bae, karna Roh Kudus so biking torang jadi satu.

Efesus 5:29

Karna tarada orang yang binci dia pe diri sandiri, mala dia akan jaga deng sayang dia pe diri sandiri, sama deng Yesus Kristus yang jaga deng sayang Dia pe jemaat.

Filipi 1:27

Jadi yang penting skarang, ngoni musti hidup deng cara yang pantas untuk orang-orang yang so percaya Kabar Bae tentang Yesus Kristus, supaya nanti kalu kita pigi lia pa ngoni, atau kalu kita bolong sempat pigi pa ngoni, kita bole dengar, ngoni samua tetap kuat percaya deng satu hati, deng ngoni me sama-sama bakarja karas kase tau Kabar Bae itu pa orang-orang supaya dorang lagi bole jadi percaya.

Kolose 1:10

Barang, kalu ngoni so tau Tuhan Allah pe mau, ngoni akan hidup deng kalakuang yang pantas dapa sebut orang yang percaya pa Tuhan, kong ngoni akan biking Dia pe hati sanang. Ngoni me akan biking hal-hal yang bae turus-turus, deng ngoni me akan lebe tamba kanal pa Tuhan Allah.

Kolose 1:18

Yesus Kristus itu suda pemimpin yang ator Dia pe jemaat, sama deng kapala ator dia pe badan. Dia itu suda yang kamuka hidup ulang dari samua orang yang perna mati, jadi Dia yang paling penting dari samua yang ada.

Kolose 2:2

Kita berusaha karas la ngoni lebe tamba percaya pa Yesus deng lebe tamba baku sayang sampe ngoni jadi satu hati. Kita mau supaya ngoni butul-butul mangarti deng yakin, Tuhan Allah pe rahasia yang hebat. Rahasia itu tentang Yesus Kristus yang dari dulu Tuhan Allah tara kase tau pa orang-orang, tapi skarang ngoni so bole tau.

1 Tesalonika 3:12

Torang minta la Tuhan Allah biking ngoni lebe tamba baku sayang, deng ngoni pe sayang pa orang laeng lebe tatamba, sama deng torang pe sayang pa ngoni.

1 Tesalonika 4:10

Kong ngoni memang so sayang pa samua sudara yang percaya di seluru daera Makedonia. Tapi sudara-sudara, biar bagitu, kita minta pa ngoni supaya ngoni lebe tamba sayang pa orang-orang.

2 Tesalonika 1:3

Sudara-sudara, torang salalu bilang tarimakasi pa Tuhan Allah untuk ngoni. Torang memang musti biking bagitu karna ngoni pe percaya pa Yesus Kristus lebe tatamba, deng karna ngoni lebe tamba baku sayang.

1 Petrus 3:8

Jadi skarang, kita minta pa ngoni la ngoni samua hidup satu hati. Kalu ada dari ngoni yang rasa susa ka sanang, ngoni yang laeng me musti rasa sama deng yang dia rasa. Ngoni me musti sayang pa ngoni pe sudara-sudara yang percaya, kase tunju ngoni pe rasa kasiang pa samua orang, deng jang basombong.

2 Petrus 3:18

Lebe bae tiap hari ngoni tamba sadar Yesus Kristus pe bae deng lebe tamba kanal pa Dia. Dia itu torang pe Tuhan Yesus Kristus yang kase slamat pa torang dari dosa-dosa. Kong untuk Dia suda puji deng hormat dari skarang sampe slama-lamanya. Amin.