Kolose 2:16 - Perjanjian Baru Bahasa Melayu Maluku Utara

¹⁶ Jadi sudara-sudara, dari apa yang kita baru bilang tadi, jang ada orang yang kase sala pa ngoni tentang apa yang ngoni makang deng minum. Deng jang kase biar dong kase sala pa ngoni karna ngoni tara iko agama Yahudi pe hari-hari raya, deng acara-acara di tiap bulan baru. Jang dong kase sala pa ngoni karna ngoni tara iko dong pe aturan hari Sabat, hari yang orang agama Yahudi tara bole bakarja. Dengar e, jang ngoni pusing deng dong pe bicara itu!

Kolose 2:16 ပူးပေါင်းရင်းမြစ်များ

Matius 15:11

“Dengar bae-bae yang Kita bilang ini supaya ngoni mangarti! Apa yang maso di orang pe mulu, itu tara akan biking orang jadi berdosa pa Tuhan. Tapi apa yang kaluar dari orang pe mulu, itu yang biking sampe orang itu jadi berdosa pa Tuhan.”

Markus 7:19

Barang, makanang itu tara maso di hati, tapi maso di dalam puru, turus buang kaluar di kakus.” Deng bilang bagitu, Yesus pe maksut samua makanang itu halal.

Kisah Para Rasul 15:20

Tapi lebe bae torang tulis surat pa dorang, supaya minta dong iko aturan-aturan ini saja: jang dorang makang makanang yang so kase pa orang pe puji-puji, jang makang daging dari binatang yang mati dapa ramas di leher, deng jang makang dara. Dorang me tara bole baseks sabarang.

Roma 14:10

Jadi, ngoni yang makang samua macam makanang, tara bole pandang enteng pa ngoni pe sudara yang percaya yang makang sayor saja. Bagitu lagi ngoni yang cuma makang sayor, ngoni tara bole kase sala ngoni pe sudara yang percaya yang makang samua macam makanang. Karna nanti satu waktu torang samua akan mangada pa Tuhan Allah di kursi raja untuk dapa adili.

Galatia 4:10

Ngoni paling rajin iko aturan-aturan, macam deng iko aturan di hari sabat yang orang tara bole bakarja, biking acara di hari, bulan-bulan, deng taong-taong yang agama Yahudi so tentukan.

Kolose 2:20

Sudara-sudara, ngoni so jadi satu hati deng Yesus Kristus jadi ngoni pe hidup yang lama sama deng so mati sama-sama deng Dia, sampe ngoni so bebas dari roh-roh yang berkuasa di dunia ini. Jadi bikiapa kong ngoni masi suka iko aturan-aturan di dunia yang macam bagini:

Ibrani 13:9

Jang ngoni iko ajaran-ajaran yang tara butul yang bole biking ngoni jadi sesat. Barang, kalu iko aturan tentang makanang yang halal deng haram, tarada dia pe guna untuk biking ngoni jadi sempurna pa Tuhan Allah pe muka. Cuma Tuhan Allah pe sayang deng pe bae yang bisa biking ngoni pe percaya pa Tuhan jadi kuat.

Ibrani 9:10

Barang, aturan-aturan di janji yang lama itu, cuma ator tentang apa yang orang musti makang deng minum, deng cara-cara untuk orang biking bersi diri saja. Kong samua aturan itu cuma ator di manusia pe bagian luar diri saja, bukang untuk manusia pe dalam hati, turus aturan itu cuma ada dia pe guna sampe di waktu Tuhan Allah ganti deng janji yang baru.

Yakobus 4:11

Sudara-sudara, jang ngoni baku biking busu ngoni pe sudara pe nama. Sapa yang biking busu dia pe sudara pe nama atau tudu dia pe sudara itu sala, itu sama deng dia so biking busu deng kase sala Tuhan Allah pe aturan. Kong kalu ngoni kase sala Tuhan Allah pe aturan, ngoni itu tara iko aturan itu, tapi ngoni biking ngoni pe diri jadi hakim untuk kase sala aturan itu.