Kolose 2:13 - Perjanjian Baru Bahasa Melayu Maluku Utara

¹³ Dulu waktu ngoni bolong percaya pa Tuhan, ngoni jaga langgar Tuhan Allah pe parenta, jadi Tuhan Allah lia pa ngoni sama deng orang yang so mati. Ngoni me tara dapa sunat karna ngoni bukang orang Yahudi, jadi ngoni bukang Tuhan Allah pe umat. Tapi skarang, karna Yesus Kristus so mati deng so hidup ulang, Dia so kase ampun ngoni pe dosa-dosa deng so kase pa ngoni hidup yang baru.

Kolose 2:13 ပူးပေါင်းရင်းမြစ်များ

Lukas 15:24

Barang kita pe ana ini sama deng so mati tapi skarang so hidup ulang. Dia so ilang, tapi kita so dapa ulang.’ Kong dorang mulai bapesta.

Lukas 15:32

Ngana pe ade sama deng orang yang so mati tapi so hidup ulang. Dia so ilang, tapi skarang torang so dapa ulang. Jadi skarang, pantas torang biking acara deng hati sanang.’ ”

Lukas 9:60

Tapi Yesus bilang pa dia, “Orang yang tara percaya pa Kita, sama deng orang yang so mati. Kase biar suda orang yang tara percaya itu urus dorang pe penguburan sandiri. Tapi ngana, ngana pigi kong kase tau kabar tentang Tuhan Allah Berkuasa sebagai Raja pa orang-orang yang percaya pe hidup.”

Yohanes 5:21

Bapa itu yang kase hidup ulang pa orang-orang yang mati. Bagitu lagi deng Dia pe Anak mo kase hidup pa sapa saja yang Dia pe Anak mau. Hidup itu, hidup deng Tuhan Allah slama-lamanya.

Yohanes 6:63

Manusia tara mungkin mo dapa hidup deng Tuhan Allah slama-lamanya pake dia pe usaha sandiri, cuma Roh Kudus yang bole biking manusia hidup deng Tuhan Allah slama-lamanya. Samua kata-kata yang Kita bilang pa ngoni, pe asal dari Roh Kudus, kong kata-kata itu lagi yang kase hidup deng Tuhan Allah slama-lamanya.

Roma 4:17

Itu sama deng yang Tuhan Allah ada bilang tentang dia di Kitab Suci bagini, “Kita so pili pa ngana jadi papa untuk banya suku bangsa di dunia.” Kong Abraham percaya apa yang Tuhan Allah bilang itu. Tuhan Allah itu yang kase hidup orang yang so mati, deng Dia me yang biking dunia ini dari yang bolong ada, jadi ada, cuma deng Dia pe kata-kata saja.

Roma 6:13

Deng tara bole ngoni kase biar ngoni pe tangan, kaki deng samua-samua yang ada pa ngoni pe badan untuk dosa kuasai supaya biking barang yang jahat. Tapi ngoni kase ngoni pe diri pa Tuhan Allah supaya biking barang yang butul, karna ngoni sama deng orang yang so mati, kong skarang Dia so kase pa ngoni hidup yang baru. Ngoni kase biar suda ngoni pe tangan, kaki, deng samua-samua yang ada di ngoni pe badan untuk Tuhan Allah pake supaya mo biking barang yang butul.

Roma 8:11

Tuhan Allah pe Roh so kase hidup ulang pa Kristus Yesus, kong Roh itu suda yang ada di ngoni pe hati. Jadi biar ngoni pe badan mo mati, tapi Tuhan Allah nanti mo kase hidup ulang pa ngoni pake kuasa dari Dia pe Roh yang ada pa ngoni itu.

1 Korintus 15:36

Pe bodo skali orang yang batanya bagitu! Ambe conto bagini: kalu torang tanam bibit, bibit itu tara akan batumbu kalu bolong isi dalam tana. Itu sama deng dia mati dulu baru batumbu.

1 Korintus 15:45

Itu sama deng yang so tatulis di Kitab Suci bagini, “Tuhan Allah biking manusia pertama yang pe nama Adam, jadi hidup.” Kong Yesus Kristus yang dapa sebut, Adam terahir itu, Dia yang kase hidup pa manusia.

2 Korintus 3:6

Dia itu yang so biking torang mampo biking apa yang Dia suru, untuk kase tau Tuhan Allah pe janji yang baru pa orang-orang, janji antara Tuhan Allah deng manusia. Janji yang baru itu bukang bagantong dari apa yang so tatulis dalam aturan-aturan di lima kitab Musa, karna aturan-aturan itu kalu torang tara bisa iko samua, nanti waktu torang mati, torang tapisa deng Tuhan Allah slama-lamanya. Tapi janji yang baru itu bagantong dari Roh Kudus. Tuhan Allah kase Dia pe Roh pa torang, la torang ada kuasa iko Tuhan Allah pe mau, deng torang bole hidup deng Tuhan Allah slama-lamanya.

2 Korintus 5:19

Kong Kabar Bae yang torang kase tau itu bagini: waktu Yesus Kristus mati di kayu salib, Tuhan Allah buka jalang la torang manusia pe hubungan bole bae-bae ulang deng Dia. Kong samua orang pe dosa-dosa, Dia so tara hitung lagi untuk Dia hukum. Deng Dia kase tugas pa torang la bantu orang jadi percaya pa Dia, supaya dorang pe hubungan jadi bae-bae ulang deng Tuhan Allah.

Efesus 2:1

Sudara-sudara, dulu waktu ngoni bolong percaya pa Yesus Kristus, ngoni jaga biking dosa deng jaga langgar Tuhan Allah pe parenta, ngoni itu sama deng orang yang so mati.

Efesus 2:11

Sudara-sudara, coba ngoni inga ngoni pe hidup yang dulu. Mulai dari lahir, ngoni bukang orang Yahudi, jadi orang-orang Yahudi hina pa ngoni, bilang ngoni itu bukang Tuhan Allah pe umat, barang ngoni tara dapa sunat sama deng dorang. Padahal sunat itu cuma manusia sandiri yang biking di badan.

Efesus 5:14

Itu dia pe sebab sampe ada orang yang bilang bagini, “Ee ngoni yang masi tidor, bangun suda, ngoni ini sama deng orang yang so mati, ngoni musti hidup ulang. Barang, Yesus Kristus mo kase tarang ngoni pe hati.”

Kolose 2:12

Waktu ngoni dapa baptis, itu sama deng ngoni so mati kong dapa kubur sama-sama deng Yesus Kristus, itu berarti, ngoni so kase tinggal ngoni pe hidup yang cuma iko manusia pe mau. Kong deng ngoni dapa baptis itu suda, itu sama deng ngoni so hidup ulang sama-sama deng Yesus Kristus, jadi ngoni pe hidup me so beruba jadi baru, karna ngoni percaya pa Tuhan Allah yang Dia pe kuasa hebat, yang so kase hidup ulang pa Yesus Kristus.

1 Timotius 5:6

Tapi janda yang cuma suka hidup basanang-sanang, biar dia masi hidup, dia sama deng so mati.

1 Timotius 6:13

Timotius, kita suru pa ngana skarang pa Tuhan Allah pe muka, Dia itu yang biking samua jadi hidup, deng pa Kristus Yesus pe muka, Dia itu yang barani basaksi barang yang butul pa gubernur Pontius Pilatus pe muka. Kita suru pa ngana,

Ibrani 6:1

Jadi, jang torang cuma ulang-ulang balajar ajaran-ajaran dasar yang tong tarima waktu tong baru jadi percaya pa Yesus Kristus. Tapi, torang yang so lama percaya musti balajar ajaran yang biking torang pe percaya pa Yesus Kristus lebe tamba kuat. Torang tara usa ulang-ulang balajar ajaran dasar macam ini: ajaran tentang bertobat dari torang pe kalakuang yang tarada dia pe guna, ajaran tentang musti percaya pa Tuhan Allah,

Ibrani 9:14

Jadi kalu dara deng abu binatang saja bisa kase bersi orang pe dosa-dosa, apalagi deng Yesus Kristus pe dara! Yesus Kristus so kase Dia pe diri sandiri pa Tuhan Allah jadi korban persembahan yang sempurna. Yesus Kristus jadi korban yang sempurna, barang Roh Kudus yang ada turus sampe slama-lamanya itu yang biking Dia mampo kase Dia pe diri bagitu. Dia pe dara itu yang kase bersi torang pe hati dari hal-hal yang tarada dia pe guna, supaya torang bole semba pa Tuhan Allah yang hidup.

Yakobus 2:17

Bagitu lagi deng torang pe percaya pa Tuhan. Kalu torang percaya pa Tuhan tapi tara biking apa yang Tuhan mau, torang pe percaya itu tarada dia pe guna.

Yakobus 2:20

Ee ngoni orang-orang yang tara tau apa-apa! Kalu orang percaya pa Tuhan tapi tara biking apa yang Tuhan mau dalam dia pe hidup, dia pe percaya itu tarada guna.

Yakobus 2:26

Jadi orang yang bilang dia percaya pa Tuhan Allah, tapi dia tara biking apa yang Tuhan Allah mau dalam dia pe hidup, dia pe percaya itu tarada guna. Dia itu sama deng orang yang so mati, ada badan tapi tarada nyawa.

1 Yohanes 2:12

Ngoni yang kita sayang sama deng kita pe ana-ana, kita tulis surat ini pa ngoni, barang ngoni so dapa ampun dari ngoni pe dosa karna apa yang Yesus Kristus so biking.