Kolose 1:5 - Perjanjian Baru Bahasa Melayu Maluku Utara

⁵ Ngoni percaya deng sayang macam bagitu, barang ngoni so yakin, ngoni akan tarima apa yang Tuhan Allah so kase sadia untuk ngoni di sorga. Ngoni jadi yakin itu, mulai dari pertama kali ngoni dengar ajaran yang butul, itu Kabar Bae tentang Yesus Kristus.

Kolose 1:5 ပူးပေါင်းရင်းမြစ်များ

Lukas 12:33

Jual suda ngoni pe harta kong kase dia pe doi untuk orang-orang miskin! Kalu ngoni biking bagitu, itu sama deng ngoni ada kumpul harta di sorga yang tara akan mo abis-abis. Karna di sorga tara ada papancuri yang mo ambe harta itu deng tarada gai yang mo kase rusak harta itu.

Kisah Para Rasul 10:36

Ngoni pasti so tau Kabar Bae yang Tuhan Allah bilang pa orang-orang Israel: Yesus Kristus itu Raja yang mo kase slamat pa manusia, Dia yang bole biking manusia pe hubungan deng Tuhan Allah jadi bae. Yesus Kristus itu yang jadi Tuhan untuk samua orang.

Kisah Para Rasul 13:26

Sudara-sudara orang Israel, Abraham pe turunan, deng ngoni yang bukang Yahudi tapi jaga semba pa Tuhan Allah, pa torang samua ini, Tuhan Allah so kase tau Dia mo kase slamat pa manusia dari dosa-dosa.

Kisah Para Rasul 23:6

Waktu itu Paulus tau, anggota-anggota Mahkama Agama itu dorang dari dua aliran agama Yahudi: satu aliran Farisi deng satu lagi aliran Saduki. Karna itu, Paulus bilang deng suara yang kuat, “Kita pe sudara-sudara orang Yahudi samua, kita dari aliran Farisi, barang kita pe orang tua me dari aliran Farisi. Kita dapa kase mangada di Mahkama Agama ini, barang kita percaya deng yakin Tuhan Allah mo kase hidup ulang pa orang-orang yang so mati.”

Kisah Para Rasul 24:15

Kong kita lagi sama deng dorang, kita percaya deng yakin pa Tuhan Allah, nanti samua orang yang so mati mo hidup ulang, biar dia itu orang yang hidup butul pa Tuhan Allah pe muka, deng yang tara hidup butul pa Tuhan Allah pe muka.

Roma 10:8

Ngoni tara usa cari pa Yesus Kristus macam bagitu, karna di Kitab Suci so tatulis bagini, “Tuhan Allah pe kata-kata yang bawa slamat itu tara jao dari ngoni. Ngoni bole mangaku itu deng ngoni pe mulu, kong bole percaya itu di ngoni pe hati.” Tuhan Allah pe kata-kata itu yang torang jaga kase tau pa orang-orang, kata-kata itu tentang percaya pa Yesus Kristus.

1 Korintus 13:13

Jadi, skarang tinggal tiga hal yang penting yang torang musti biking turus-turus: percaya pa Tuhan, baharap pa Dia, deng sayang pa orang laeng. Kong dari tiga ini, yang paling penting, itu sayang pa orang laeng.

1 Korintus 15:19

Deng torang yang masi hidup, kalu torang baharap pa Yesus Kristus la Dia mo tolong pa torang cuma sampe di dunia ini saja, torang ini suda orang-orang yang paling kasiang dari samua manusia.

2 Korintus 5:19

Kong Kabar Bae yang torang kase tau itu bagini: waktu Yesus Kristus mati di kayu salib, Tuhan Allah buka jalang la torang manusia pe hubungan bole bae-bae ulang deng Dia. Kong samua orang pe dosa-dosa, Dia so tara hitung lagi untuk Dia hukum. Deng Dia kase tugas pa torang la bantu orang jadi percaya pa Dia, supaya dorang pe hubungan jadi bae-bae ulang deng Tuhan Allah.

2 Korintus 6:7

Torang salalu kase tau ajaran yang butul pa orang-orang, deng Tuhan Allah pe kuasa ada pa torang. Torang jaga biking yang butul kong itu sama deng torang bawa senjata, karna kalu torang so biking yang butul, torang bisa lawan orang yang tara suka torang iko pa Tuhan Yesus.

Galatia 2:14

Yang dorang biking itu, kita lia tara baku cocok deng Kabar Bae tentang Yesus Kristus. Padahal, cuma Kabar Bae itu yang butul. Jadi kita bilang pa Petrus di samua orang pe muka, “Ngana orang Yahudi, tapi ngana so percaya pa Yesus Kristus, jadi ngana tara musti hidup iko aturan yang orang Yahudi jaga iko. Tapi bikiapa kong ngana paksa orang yang bukang Yahudi hidup iko agama Yahudi pe aturan-aturan untuk jadi percaya pa Yesus Kristus?”

Galatia 2:5

Tapi torang tara kase iko orang-orang itu pe mau, biar cuma sadiki lagi. Torang tara kase iko pa dorang supaya Kabar Bae yang butul yang ngoni jaga iko, tara baku campur deng dorang pe ajaran yang tara butul itu.

Galatia 5:5

Tapi sudara-sudara, Roh Kudus bakarja di torang pe hati jadi torang percaya Tuhan Allah mo biking torang jadi orang yang tara sala pa Dia pe muka. Itu suda yang torang tunggu-tunggu.

Efesus 1:13

Kong ngoni orang-orang yang bukang Yahudi, skarang ngoni me so dengar ajaran yang butul kong so jadi percaya pa Yesus Kristus. Ajaran yang butul itu, Kabar Bae tentang Yesus Kristus yang so kase slamat pa ngoni dari dosa-dosa. Kong waktu ngoni percaya pa Yesus Kristus, Tuhan Allah kase Roh Kudus pa ngoni supaya jadi tanda ngoni itu so jadi Tuhan Allah punya. Roh Kudus itu suda yang Tuhan Allah so janji dari dulu.

Efesus 4:21

Barang, ngoni so dengar deng so tarima ajaran yang butul, kong ajaran yang butul itu memang ada pa Tuhan Yesus.

Kolose 1:23

Yang penting, ngoni tetap percaya pa Yesus Kristus deng jang ragu. Percaya turus Kabar Bae tentang Yesus Kristus yang ngoni so dengar itu. Kabar Bae itu suda yang biking torang yakin, torang mo dapa apa yang Tuhan Allah so janji pa Dia pe umat. Kabar Bae itu so tasiar di seluru dunia, kong kita ini, Paulus yang Tuhan Allah so pili untuk kase tau Kabar Bae itu.

Kolose 1:27

Yang Tuhan Allah kase mangarti pa dorang itu, Dia pe rencana yang paling hebat deng luar biasa pa ngoni orang-orang bukang Yahudi. Dia pe rencana itu bagini: Yesus Kristus tinggal di ngoni pe hati, jadi ngoni bole baharap deng yakin, nanti ngoni me sama-sama deng Dia di Dia pe tampa yang luar biasa.

Kolose 3:16

Ngoni musti inga turus-turus Yesus Kristus pe ajaran, deng simpang itu bae-bae di ngoni pe hati, supaya ajaran itu bisa bawa hasil yang basar pa ngoni pe hidup. Pake suda hikmat yang Tuhan Allah kase pa ngoni untuk baku kase ajar deng baku kase inga Dia pe ajaran. Pake lagi lagu-lagu mazmur, lagu-lagu yang puji pa Tuhan, deng lagu-lagu laeng yang Roh Kudus kase pa ngoni. Ngoni manyanyi suda deng hati yang bilang tarimakasi banya pa Tuhan Allah.

1 Tesalonika 2:13

Torang lagi salalu bilang tarimakasi pa Tuhan Allah karna waktu torang kase tau pa ngoni Kabar Bae dari Tuhan Allah, ngoni tarima itu deng sanang hati. Ngoni tarima Kabar Bae itu karna ngoni tau, kata-kata itu bukang dari manusia, tapi dari Tuhan Allah. Deng memang itu butul dari Tuhan Allah. Kong Kabar Bae itu bakarja di ngoni pe hati yang percaya pa Yesus Kristus.

2 Tesalonika 2:16

Yesus Kristus, torang pe Tuhan, deng Tuhan Allah, torang pe Bapa, sayang skali pa torang deng salalu kase kuat torang pe hati sampe torang bole baharap deng yakin torang dapa hidup deng Dia slama-lamanya. Torang bole yakin bagitu, karna torang tau, Yesus Kristus pe bae pa torang.

1 Timotius 1:15

Kata-kata yang kita mo bilang ini, butul skali. Ngana musti tarima deng percaya deng hati yang sunggu-sunggu bagini, “Kristus Yesus datang di dunia untuk kase slamat orang berdosa.” Kong dari samua orang yang perna biking dosa, kita ini suda yang paling banya biking dosa.

2 Timotius 4:8

Satu conto lagi, kalu orang iko lomba kong juara, dia dapa hadia. Bagitu lagi deng kita, Tuhan so kase sadia kita pe hadia karna Dia lia kita hidup butul pa Dia pe muka. Hadia itu Dia simpang kong nanti Dia mo kase pa kita di hari yang Dia mo adili pa samua orang deng adil. Hadia itu bukang cuma kita yang mo dapa, tapi samua orang yang percaya yang tunggu-tunggu Dia datang lagi, dorang me mo dapa.

Titus 1:2

Kita ajar pa orang-orang yang percaya itu, supaya dorang bole baharap deng yakin, dorang bole dapa hidup deng Tuhan Allah slama-lamanya, sama deng Tuhan Allah so janji. Karna waktu Tuhan Allah bolong biking dunia ini, Dia so janji kamuka, Dia mo kase hidup slama-lamanya pa orang-orang yang percaya pa Dia. Dia pe janji itu pasti jadi, karna Tuhan Allah tara perna bafoya.

Ibrani 7:19

Aturan-aturan di lima kitab Musa itu tara berhasil biking manusia pe hubungan deng Tuhan Allah jadi sempurna. Tapi skarang, torang so ada tampa baharap yang lebe bae. Itu Yesus suda, Dia yang biking torang bole badekat deng Allah.

1 Petrus 2:2

Ngoni musti suka skali Tuhan pe Firman, sama deng bayi yang baru lahir yang suka skali minum dia pe mama pe aer susu. Deng bagitu, ngoni pe percaya pa Tuhan mo lebe tatamba kuat kong ngoni akan dapa slamat dari dosa-dosa.

1 Petrus 3:15

Tapi ngoni musti hormati pa Kristus kong biking Dia jadi Raja di ngoni pe hati. Kalu ada orang yang batanya tentang ngoni pe harapan pa Tuhan Yesus, ngoni musti salalu siap bajawab pa dorang. Kong waktu ngoni bajawab, ngoni musti bajawab pa dorang itu deng bae-bae deng kase tunju ngoni pe rasa hormat,

2 Petrus 1:12

Kong biar ngoni so tau samua itu, deng ngoni so kuat iko Tuhan pe ajaran yang ngoni so dengar, kita tetap mo kase inga turus pa ngoni.

1 Yohanes 3:3

Samua orang yang baharap pa Tuhan sama deng itu, orang itu musti salalu hidup deng hati bersi sama deng Yesus Kristus yang suci itu.