Kolose 1:18 - Perjanjian Baru Bahasa Melayu Maluku Utara

¹⁸ Yesus Kristus itu suda pemimpin yang ator Dia pe jemaat, sama deng kapala ator dia pe badan. Dia itu suda yang kamuka hidup ulang dari samua orang yang perna mati, jadi Dia yang paling penting dari samua yang ada.

Kolose 1:18 ပူးပေါင်းရင်းမြစ်များ

Matius 23:8

Tapi ngoni, jang ngoni ingin orang hormati pa ngoni deng orang pangge pa ngoni ‘bapa guru’! Barang, ngoni pe Guru itu cuma satu, kong ngoni samua itu basudara.

Matius 28:18

Yesus badekat pa dorang kong bilang, “Kita so tarima samua kuasa di sorga deng di bumi.

Yohanes 1:1

Dulu skali, waktu dunia ini bolong ada, Tuhan Allah pe Firman itu so ada. Firman itu Yesus suda. Dia itu ada sama-sama deng Tuhan Allah, kong Dia itu suda Tuhan Allah.

Yohanes 1:16

Dia pe sayang pa torang tara perna abis-abis. Kong karna Dia pe sayang itu, Dia tara berenti-berenti kase Dia pe bae pa torang samua.

Yohanes 1:27

Dia itu yang datang abis kita, deng Dia lagi lebe hebat dari kita, sampe mo jadi Dia pe tukang suru-suru yang buka Dia pe tali sandal saja me, kita tara pantas.”

Kisah Para Rasul 26:23

Dorang so kase tau tentang Mesias, Raja yang Tuhan Allah janji mo kase slamat pa manusia. Dorang bilang, Dia musti tanggung siksa banya kong mati, tapi Dia itu yang pertama akan hidup ulang supaya Dia bole kase tau Kabar Bae pa orang Yahudi deng pa orang yang bukang Yahudi la dorang bisa dapa slamat. Itu sama deng Dia kase tarang di dorang pe hati.”

Roma 8:29

Karna dari dulu, Tuhan Allah so pili pa sapa saja yang Tuhan Allah tau dorang itu nanti mo percaya pa Dia. Tuhan Allah so pili pa dorang itu supaya dorang pe sifat bole sama deng Yesus Kristus, Tuhan Allah pe Anak. Jadi, dorang itu so sama deng Yesus Kristus pe sudara, kong Tuhan Allah biking Yesus Kristus jadi Anak yang tua dari samua sudara yang percaya.

1 Korintus 11:3

Tapi ada yang kita masi mo kase inga pa ngoni lagi: yang jadi kapala pa samua laki-laki yang percaya, itu Yesus Kristus. Kong yang jadi kapala pa parampuang yang percaya, itu laki-laki. Baru, yang jadi kapala pa Yesus Kristus, itu Tuhan Allah.

1 Korintus 12:27

Bagitu lagi deng ngoni. Ngoni samua yang percaya jadi satu, sama deng Yesus Kristus pe kaki, tangan, mata deng bagian-bagian laeng lagi. Itu sama saja deng ngoni itu jadi Yesus Kristus pe satu badan anteru.

1 Korintus 15:25

Barang, Yesus Kristus musti tetap berkuasa sebagai Raja sampe Tuhan Allah kase kala samua Dia pe musu, itu sama deng Tuhan Allah taru samua Dia pe musu di Yesus Kristus pe di bawa kaki.

Efesus 1:10

Dia pe rencana itu bagini: kalu so sampe dia pe waktu yang Tuhan Allah so tentukan, Dia mo biking samua yang ada di sorga deng di bumi jadi satu, kong Yesus Kristus yang berkuasa pa samua itu.

Efesus 5:23

karna laki itu bini pe pemimpin, sama deng Yesus Kristus jadi kapala untuk pimpin jemaat. Kong jemaat itu bole kase sama deng Yesus Kristus pe badan, karna Yesus Kristus yang kase slamat pa jemaat dari dosa-dosa.

Kolose 1:24

Skarang ini kita pe hati sanang saja, karna siksa yang kita dapa waktu kase tau Kabar Bae tentang Yesus Kristus, itu untuk ngoni pe bae. Siksa itu memang musti kita rasa, karna kita karja untuk Yesus Kristus. Deng kalu kita dapa siksa, itu sama saja deng kita ambe bagian dalam siksa yang Yesus Kristus rasa untuk tolong Dia pe jemaat. Jemaat itu sama deng Dia pe badan sandiri.

Kolose 2:19

Orang-orang macam bagitu so tara butul-butul lagi iko pa Yesus Kristus. Padahal Yesus Kristus itu Kapala dari samua Dia pe umat. Dia yang biking pa torang jadi satu, deng supaya torang pe percaya pa Tuhan lebe tamba kuat. Ini bole kase sama deng kapala deng badan yang jadi satu karna ada sendi-sendi yang tara biking tapisa satu deng yang laeng.

1 Yohanes 1:1

Surat ini torang tulis tentang Yesus Kristus. Dia itu Firman yang biking orang bole dapa hidup deng Tuhan Allah slama-lamanya. Firman itu memang so ada dari pertama dunia bolong jadi. Torang so dengar deng so lia pa Dia deng torang pe mata kapala sandiri. Torang me so pegang pa Dia deng tong pe tangan sandiri.

Wahyu 1:18

Kita ini yang hidup! Memang Kita so perna mati, tapi lia skarang Kita so hidup ulang, kong Kita tetap hidup sampe slama-lamanya. Kita yang pegang samua kunci maut, itu berarti, Kita ada kuasa untuk kase hidup ulang orang yang so mati. Pa Kita me ada kunci kerajaan maut, itu berarti, Kita ada kuasa di tampa orang-orang yang mati.

Wahyu 1:5

deng pa Yesus Kristus. Yesus Kristus itu yang setia kase tau Tuhan Allah pe pasáng. Dia itu yang kamuka hidup ulang dari antara orang mati. Kong Dia itu Yang Paling Berkuasa dari samua raja di bumi ini. Yesus Kristus itu sayang pa torang. Dia pe dara yang tatumpa waktu Dia mati di kayu salib, kase bebas pa torang dari torang pe dosa-dosa.

Wahyu 1:8

Tuhan Allah bilang bagini, “Kita ini, Alfa deng Omega, yang pe arti, mulai dari pertama dunia ini bolong ada, Kita so ada, kong Kita so ada skarang, deng sampe dunia abis, Kita tetap ada. Kita Yang Paling Berkuasa.”

Wahyu 11:15

Malaekat yang ketuju tiop dia pe trompet, turus kita dengar banya suara yang kuat skali dari sorga bilang bagini, “Skarang yang berkuasa di dunia cuma torang pe Tuhan Allah deng Yesus Kristus, Raja yang Tuhan Allah pili untuk kase slamat pa manusia. Dia itu akan Berkuasa sebagai Raja sampe slama-lamanya.”

Wahyu 21:6

Dia bilang lagi pa kita, “Samua itu so selesai. Kita ini Alfa deng Omega, yang pe arti, mulai dari pertama dunia ini bolong ada, Kita so ada, deng sampe dunia abis, Kita tetap ada. Sapa yang aus, Kita mo kase aer minum deng cuma-cuma pa dia. Aer itu dari mata aer yang biking orang hidup deng Tuhan Allah slama-lamanya.

Wahyu 22:13

Kita ini Alfa deng Omega, yang pe arti, mulai dari pertama dunia ini bolong ada, Kita so ada, deng sampe dunia abis, Kita tetap ada.”

Wahyu 3:14

Anak Manusia yang dari sorga bilang lagi pa kita, “Yohanes, tulis suda untuk malaekat yang jaga pa jemaat di kota Laodikia. Ngana tulis bagini: Ini pasáng dari yang pe nama Amin, yang pe arti, Yang Butul, deng yang setia kase tau samua tentang Tuhan Allah, deng samua yang Dia bilang itu butul. Kong Tuhan Allah pake pa Dia untuk biking samua-samua yang ada di dunia ini: