Kolose 1:12 - Perjanjian Baru Bahasa Melayu Maluku Utara

¹² Deng kita minta lagi supaya ngoni salalu bilang tarimakasi banya pa Dia, torang pe Bapa. Bapa itu suda yang biking ngoni jadi pantas mo dapa apa yang Dia so janji pa orang-orang yang so jadi Dia pe umat. Kong janji itu, Dia so sadia untuk Dia pe umat di tampa yang tarang, tampa yang Dia Berkuasa sebagai Raja.

Kolose 1:12 ပူးပေါင်းရင်းမြစ်များ

Matius 25:34

Waktu itu, Anak Manusia yang so jadi Raja itu mo bilang pa orang-orang yang ada pa Dia pe sabla kanan, ‘Datang kamari suda ngoni yang Kita pe Bapa berkati! Datang suda di tampa yang Kita Berkuasa sebagai Raja, Kita so kase sadia tampa untuk ngoni di situ dari pertama waktu dunia ini jadi.

Yohanes 14:6

Kong Yesus bilang pa dia, “Kita ini jalang yang mo pigi pa Tuhan Allah, deng Kita ini yang kase tau yang butul tentang Tuhan Allah, deng Kita lagi yang kase hidup deng Tuhan Allah slama-lamanya. Jadi, tara ada satu orang yang bole pigi pa Tuhan Allah kalu tara iko pa Kita.

Yohanes 20:17

Yesus bilang pa Maria, “Jang pegang pa Kita, karna Kita bolong bale pa Kita pe Bapa. Tapi ngana pigi suda pa Kita pe sudara-sudara yang jaga iko pa Kita kong bilang pa dorang, Kita skarang mo nae pigi pa Kita pe Bapa deng ngoni pe Bapa lagi. Dia itu lagi Kita pe Tuhan Allah deng ngoni lagi pe Tuhan Allah.”

Yohanes 4:23

Nanti ada dia pe waktu, mala skarang ini suda dia pe waktu, orang yang basambayang yang butul pa Tuhan Allah, dorang mo basambayang iko Tuhan Allah pe Roh yang pimpin pa dorang, deng iko ajaran yang butul dari Tuhan Allah, karna Tuhan Allah cari orang-orang yang basambayang pa Dia macam bagitu.

Kisah Para Rasul 20:32

Jadi skarang, kita minta Tuhan Allah jaga pa ngoni deng bantu ngoni inga turus Dia pe firman tentang Dia pe bae pa ngoni. Firman itu yang bisa kase kuat ngoni pe percaya, deng yang nanti mo kase pa ngoni samua yang Dia so janji mo kase pa orang-orang yang Dia so biking jadi Dia pe umat sandiri.

Kisah Para Rasul 26:18

Ngana ka sana untuk buka dorang pe pikiran supaya dorang tara hidup lagi di galap tapi hidup di tarang, supaya dorang talapas dari Iblis, setang-setang pe raja pe kuasa, kong Tuhan Allah pe kuasa mo ada sama-sama deng dorang. Kong karna dorang so percaya pa Kita, dorang pe dosa-dosa mo dapa ampun deng dorang mo dapa samua yang Tuhan Allah janji mo kase pa orang-orang yang Dia so biking jadi Dia pe umat.’

Roma 11:17

Tapi orang Yahudi yang tara percaya pa Yesus Kristus, dorang itu sama deng cabang-cabang yang dapa potong dari pohong zaitun yang ada tanam di kobong. Kong orang yang bukang Yahudi, kalu dorang percaya pa Yesus Kristus, dong itu sama deng cabang-cabang dari pohong zaitun yang batumbu sandiri kong tuang kobong datang potong cabang-cabang itu turus kase malakat di pohong zaitun yang ada tanam di kobong itu. Deng bagitu, cabang dari pohong yang batumbu sandiri dapa hidup dari pohong yang ada tanam di kobong itu. Cabang itu sama deng ngoni orang yang bukang Yahudi, ngoni ini yang so percaya, jadi ngoni so tarima Tuhan Allah pe janji yang dulu Dia so kase pa orang Yahudi.

Roma 15:27

Dorang ada sumbang itu deng hati sanang. Deng memang pantas dorang mo bantu pa dong pe sudara yang percaya, orang-orang Yahudi di Yerusalem. Barang, orang-orang bukang Yahudi, dorang dengar Kabar Bae tentang Yesus Kristus dari orang-orang Yahudi. Jadi pantas dorang balas orang Yahudi pe bae deng cara bantu dorang pe perlu.

Roma 8:17

Deng karna torang ini so jadi Tuhan Allah pe ana-ana, nanti tong mo dapa warisan dari Dia, itu berarti, torang ini me ada hak dari samua yang Dia so kase sadia untuk Dia pe ana-ana. Kong torang mo dapa samua itu sama-sama deng Yesus Kristus. Tapi kalu torang mau dapa itu, tong lagi musti menderita iko pa Tuhan Allah sama deng Yesus Kristus so menderita, supaya torang nanti dapa puji deng hormat sama-sama deng Dia.

Roma 9:23

Tuhan Allah sabar pa dorang supaya mo kase tunju Dia pe sayang yang luar biasa pa dorang yang Dia rasa kasiang. Dorang itu, Dia so pili dari dulu supaya dapa Dia pe sayang yang luar biasa itu.

1 Korintus 8:6

tapi untuk torang yang percaya, Tuhan Allah itu cuma satu saja. Dia itu torang pe Bapa, yang cipta samua-samua yang ada di dunia ini, deng Dia itu lagi yang kase torang hidup supaya tong hidup untuk biking Dia pe mau. Torang pe Tuhan me cuma satu, Yesus Kristus. Kong deng Dia itu suda, Tuhan Allah cipta dunia deng samua-samua yang ada. Deng karna Dia, torang bole hidup.

1 Korintus 9:23

Samua yang kita biking itu, kita biking la tamba hari tamba banya orang yang percaya Kabar Bae tentang Yesus Kristus, supaya kita deng dorang bole dapa samua yang bae yang Tuhan Allah so janji di Kabar Bae itu.

2 Korintus 11:14

Jang ngoni herang suda deng orang yang macam bagitu. Barang, Iblis, setang-setang pe raja saja biking diri sama deng malaekat yang hati bae deng bawa tarang.

2 Korintus 5:5

Tuhan Allah sandiri yang so kase siap tong pe badan yang baru itu untuk hidup di sorga. Kong Dia lagi yang so kase Roh Kudus pa torang di dunia ini, supaya jadi tanda, pasti torang mo dapa badan yang baru itu.

Efesus 1:11

Tuhan Allah ator samua yang ada itu, iko Dia pe mau yang Dia so tentukan. Dari dulu, Dia so pili pa torang supaya torang bole tarima apa yang Dia so janji mo kase pa torang karna torang percaya pa Yesus Kristus.

Efesus 1:18

Kong kita minta lagi supaya Dia buka ngoni pe hati, la ngoni bisa mangarti butul samua hal yang ngoni bole harap pa Dia karna ngoni yang Dia so pili jadi Dia pe umat. Deng kita minta lagi supaya ngoni mangarti pe hebat skali samua janji yang Dia mo kase pa ngoni itu.

Efesus 2:18

Barang, karna Yesus Kristus itu, torang samua dapa pintu maso untuk badekat pa Tuhan Allah torang pe Bapa. Kong Roh Kudus yang ada pa torang samua pe hati itu suda yang tolong pa torang untuk badekat deng Dia.

Efesus 3:6

Tuhan Allah pe rencana itu bagini: ngoni orang-orang yang bukang Yahudi akan percaya Kabar Bae tentang Yesus Kristus, jadi ngoni me bole sama-sama deng orang-orang Yahudi jadi Dia pe ana-ana yang tarima samua yang Tuhan Allah so janji. Ngoni orang bukang Yahudi deng torang orang Yahudi so jadi satu sama deng jadi satu badan. Kong torang samua itu mo dapa yang Tuhan Allah janji pa torang yang so percaya pa Kristus Yesus.

Efesus 4:6

Turus, torang pe Tuhan Allah lagi cuma satu, Dia itu torang samua pe Bapa. Dia yang berkuasa lebe dari samua yang ada, deng yang bakarja pa torang samua pe hidup, Dia itu yang ada pa torang samua pe hati.

Efesus 5:11

Jang ngoni iko orang yang hidup dalam galap pe kalakuang. Dorang pe kalakuang itu tara ada dia pe guna. Tapi lebe bae ngoni musti bilang suda yang dong biking itu sala.

Efesus 5:20

Kong dalam sagala hal, ngoni musti salalu bilang tarimakasi banya pa Tuhan Allah torang pe Bapa, karna samua yang torang pe Tuhan Yesus Kristus so biking.

Efesus 5:4

Bagitu lagi, ngoni tara bole bilang kata-kata yang kotor, deng kata-kata yang tarada dia pe guna. Ngoni me jang basangaja deng kata-kata yang kurang ajar. Barang, samua kata-kata itu tara pantas untuk ngoni yang so percaya pa Yesus Kristus mo bilang. Tapi yang paling bae yang ngoni musti biking itu, ngoni bilang tarimakasi suda pa Tuhan Allah.

Efesus 5:8

Memang dulu, ngoni pe kalakuang me tara bae, sama deng orang-orang yang hidup dalam galap. Tapi skarang, karna ngoni so percaya pa Tuhan, itu sama deng ngoni so hidup dalam tarang. Jadi ngoni pe hidup musti bae-bae sama deng ana-ana tarang.

Kolose 2:2

Kita berusaha karas la ngoni lebe tamba percaya pa Yesus deng lebe tamba baku sayang sampe ngoni jadi satu hati. Kita mau supaya ngoni butul-butul mangarti deng yakin, Tuhan Allah pe rahasia yang hebat. Rahasia itu tentang Yesus Kristus yang dari dulu Tuhan Allah tara kase tau pa orang-orang, tapi skarang ngoni so bole tau.

Kolose 3:15

Biar suda Yesus Kristus biking ngoni pe hati tetap tenang, karna Tuhan Allah so pangge pa ngoni untuk hidup baku bawa bae-bae satu deng yang laeng, sama deng ngoni jadi Yesus Kristus pe badan yang taika satu deng yang laeng. Kong ngoni lagi musti salalu bilang tarimakasi banya pa Tuhan Allah.

Kolose 3:17

Kong samua yang ngoni biking deng ngoni bilang, ngoni biking suda samua itu deng bae-bae, karna ngoni Tuhan Yesus pe wakil di dunia. Kong ngoni lagi musti salalu bilang tarimakasi banya pa Tuhan Allah, torang pe Bapa karna apa yang Tuhan Yesus so biking.

Titus 2:14

Dia yang so serakan Dia pe diri untuk mati la kase bebas pa torang dari torang pe dosa. Dia biking torang pe hati jadi bersi, sampe torang jadi Dia pe umat sandiri yang suka biking barang yang bae.

Ibrani 12:23

Di sana ngoni me baku dapa deng orang-orang yang percaya pa Tuhan Allah yang ada bakumpul, dorang itu Dia sebut Dia pe ana-ana yang tua, dorang itu pe nama-nama so tatulis di sorga. Di sana ngoni me baku dapa deng Tuhan Allah, Dia yang mo adili pa samua orang. Ngoni me baku dapa deng orang-orang yang so mati kamuka, yang waktu dong masi hidup, dong jaga biking yang butul pa Tuhan Allah pe muka, kong dorang itu Tuhan Allah so biking dorang jadi sempurna.

Ibrani 3:1

Sudara-sudara yang so jadi Tuhan Allah pe umat, yang so dapa pangge untuk hidup sama-sama deng Dia di sorga, coba ngoni pikir bae-bae tentang Yesus Kristus yang torang so percaya. Dia itu Tuhan Allah pe Utusan deng Dia lagi Imam Basar, karna Dia biking sampe torang manusia deng Tuhan Allah pe hubungan bisa jadi bae ulang.

Ibrani 3:14

Barang, kalu torang tetap pegang turus apa yang torang so percaya dari pertama sampe waktu dunia ini kiamat, torang akan dapa bagian dari samua yang ada pa Yesus Kristus.

Yakobus 3:9

Deng torang pe mulu, torang puji pa Tuhan, torang pe Bapa. Kong deng torang pe mulu lagi, torang kutuk pa manusia, padahal manusia itu Tuhan Allah cipta iko Dia pe rupa.

1 Petrus 5:1

Skarang kita mo kase nasehat pa ngoni yang jadi penatua di jemaat-jemaat karna kita me penatua. Kita ini perna lia deng mata kapala sandiri waktu Yesus Kristus dapa siksa. Kong nanti waktu Yesus Kristus datang ulang yang kedua kali kase tunju Dia pe kuasa yang luar biasa pa samua orang, kita me akan tarima bagian itu. Jadi ini kita pe nasehat:

1 Yohanes 1:3

Skarang torang kase tau pa ngoni apa yang torang so lia deng so dengar dari Dia, supaya ngoni deng torang bole hidup satu hati, deng bagitu torang samua bole hidup satu hati deng torang pe Bapa, Tuhan Allah deng Dia pe Anak Yesus Kristus.

Wahyu 21:23

Kota itu tara perlu sinar matahari deng bulan untuk kase tarang, karna Tuhan Allah pe cahaya yang luar biasa yang kase tarang kota itu, deng Anak Domba itu yang so jadi sama deng lampu yang manyala.

Wahyu 22:14

Orang-orang yang pe hati so bersi, dorang sama deng orang yang cuci dong pe pakeang sampe bersi. Dorang itu paling sanang suda, karna nanti dong bole maso di dalam kota itu iko pintu-pintu gerbang, deng dorang lagi ada hak untuk makang bua yang biking dorang hidup deng Tuhan Allah sampe slama-lamanya.

Wahyu 22:5

Di kota itu, tarada malam. Jadi Tuhan Allah pe umat, dong so tara perlu lagi cahaya lampu atau sinar matahari, karna Tuhan Allah pe diri sandiri yang jadi sinar untuk kase tarang pa dorang. Kong dorang mo berkuasa sebagai raja sampe slama-lamanya.