Kisah Para Rasul 3:26 - Perjanjian Baru Bahasa Melayu Maluku Utara

²⁶ Kong skarang, Tuhan Allah so utus Yesus kamuka pa ngoni orang-orang Yahudi. Dia itu Tuhan Allah pe Orang yang jaga biking apa yang Dia suru, kong Dia itu yang jadi berkat supaya ngoni masing-masing bole kase tinggal ngoni pe kalakuang yang jahat.”

Kisah Para Rasul 3:26 ပူးပေါင်းရင်းမြစ်များ

Matius 1:21

Maria mo melahirkan ana laki-laki satu. Kong ngana musti kase nama pa ana itu Yesus, barang Dia itu nanti yang mo kase slamat pa Dia pe umat dari dorang pe dosa-dosa.”

Matius 15:24

Kong Yesus bilang, “Tuhan Allah cuma utus pa Kita untuk tolong pa torang pe bangsa Israel yang so sala jalang, sama deng domba-domba yang so ilang jalang.”

Lukas 24:47

Deng nanti Kita pe umat mo bawa Kabar Bae pake Kita pe nama pa samua suku bangsa di dunia supaya dorang bertobat dari dorang pe dosa kong Tuhan Allah mo kase ampun pa dorang. Kong dorang mo kase tau Kabar Bae itu pa orang-orang, mulai dari kota Yerusalem.

Yohanes 4:22

Memang ngoni orang Samaria, ngoni basambayang pa Tuhan Allah, tapi ngoni tara tau sapa Dia sebenarnya. Torang orang Yahudi basambayang pa Tuhan Allah, kong torang tau sapa Dia sebenarnya. Barang, Dia yang Tuhan Allah janji mo kase slamat pa manusia itu yang datang dari torang orang Yahudi pe turunan.

Kisah Para Rasul 1:8

Tapi nanti Roh Kudus mo turung pa ngoni, baru ngoni mo dapa kuasa. Kong deng kuasa itu, ngoni mo jadi Kita pe saksi la pigi kase tau tentang Kita pa orang-orang di kota Yerusalem, di daera Yudea, daera Samaria, sampe di tampa-tampa yang jao skali di dunia ini.”

Kisah Para Rasul 13:26

Sudara-sudara orang Israel, Abraham pe turunan, deng ngoni yang bukang Yahudi tapi jaga semba pa Tuhan Allah, pa torang samua ini, Tuhan Allah so kase tau Dia mo kase slamat pa manusia dari dosa-dosa.

Kisah Para Rasul 2:24

Yesus mati, Dia dapa siksa yang paling barát tapi Tuhan Allah kase hidup ulang pa Dia. Barang, tara mungkin Yesus mati turus-turus.

Kisah Para Rasul 2:32

Orang yang Daud carita, Dia itu Yesus suda. Yesus itu yang Tuhan Allah so kase hidup ulang kong torang samua so lia deng torang pe mata kapala sandiri, Dia so hidup ulang.

Kisah Para Rasul 26:20

Kita pi kase tau kamuka pa orang-orang Yahudi di Damsyik supaya dorang bertobat kong bale pa Tuhan Allah. Deng dorang musti biking hal-hal yang bae untuk kase tunju dorang butul-butul so bertobat. Abis itu, kita pi kase tau di kota Yerusalem sampe deng di samua tampa laeng di daera Yudea. Kita me ada kase tau samua itu pa orang-orang yang bukang Yahudi.

Kisah Para Rasul 3:13

Ngoni tau, Tuhan Allah yang torang pe orang tua dulu-dulu Abraham, Ishak deng Yakub jaga semba, Dia so biking Yesus dapa puji deng hormat. Yesus itu yang jaga biking apa yang Tuhan Allah suru. Tempo hari ngoni tara tarima pa Yesus, kong ngoni serakan Dia pa gubernur Pilatus supaya Dia dapa hukum. Padahal, waktu itu gubernur mo kase bebas pa Dia.

Kisah Para Rasul 3:15

Ngoni so bunu pa Yesus. Padahal Dia itu yang biking torang samua bisa hidup. Tapi Tuhan Allah so kase hidup ulang pa Dia. Torang ini so lia deng torang pe mata kapala sandiri, Dia so hidup ulang.

Kisah Para Rasul 3:20

Deng kalu ngoni so bertobat, Tuhan Allah mo biking ngoni pe hati jadi tenang deng Dia me mo utus Yesus Kristus lagi pa ngoni. Barang, Yesus itu Mesias, Raja yang Tuhan Allah janji mo kase slamat pa manusia.

Kisah Para Rasul 3:22

Dulu, nabi Musa so perna kase tau tentang Yesus mo datang, dia bilang bagini, ‘Tuhan Allah mo utus Nabi satu pa ngoni, yang mo kase turus Dia pe pasáng pa ngoni, sama deng kita jaga biking. Orang itu satu dari torang orang Israel pe turunan. Jadi ngoni musti dengar samua yang Dia bilang pa ngoni.’

Kisah Para Rasul 3:25

Dorang so bilang kamuka Tuhan Allah pe janji tentang Yesus pa torang pe orang tua dulu-dulu, kong ngoni ini suda so dapa bagian dari janji itu. Janji itu, dulu Tuhan Allah bilang pa Abraham bagini, ‘Dari ngana pe turunan, samua bangsa di dunia ini mo dapa berkat.’

Roma 1:16

Kita tara tako kase tau Kabar Bae tentang Yesus Kristus pa orang-orang, karna Kabar Bae itu ada kuasa dari Tuhan Allah yang bisa kase slamat pa samua orang yang percaya dari dosa-dosa. Kong bukang cuma orang Yahudi saja yang mo dapa slamat, tapi orang-orang yang bukang Yahudi lagi mo dapa slamat.

Roma 15:29

Deng kita tau skali, waktu kita singga kong baku dapa deng ngoni di situ, nanti kita bawa banya berkat dari Yesus Kristus pa ngoni.

Roma 15:8

Kita kase inga pa ngoni bagini: Yesus Kristus datang di dunia untuk tolong pa torang orang Yahudi la iko apa yang Tuhan Allah janji pa torang pe orang tua dulu-dulu. Deng bagitu, Tuhan Allah kase tunju butul-butul Dia tara lupa biking Dia pe janji.

Efesus 1:3

Mari suda torang puji pa Tuhan Allah, torang pe Tuhan Yesus Kristus pe Bapa! Dia so kase sagala berkat rohani dari sorga pa torang, karna torang so percaya pa Yesus Kristus.

1 Petrus 1:3

Puji suda pa Tuhan Allah, Dia itu torang pe Tuhan Yesus Kristus pe Bapa. Dia pe rasa kasiang pa torang basar skali, sampe Dia kase pa torang hidup yang baru waktu Dia so kase hidup ulang pa Yesus Kristus. Kong karna itu, torang bole baharap deng percaya sunggu-sunggu pa Dia.

1 Petrus 3:9

Jang balas yang jahat deng yang jahat, deng jang balas momake deng momake. Tapi ngoni musti minta pa Tuhan supaya berkati pa dorang, karna Tuhan pangge pa ngoni untuk berkati pa orang laeng. Deng bagitu ngoni me akan dapa berkat.

Yudas 1:24

Tuhan Allah ada kuasa untuk jaga pa ngoni supaya ngoni tara taiko biking dosa. Dia me biking ngoni jadi orang yang tara sala apa-apa, kong bawa pa ngoni badiri deng hati yang paling sanang di Dia pe muka yang hebat itu.