Kisah Para Rasul 19:9 - Perjanjian Baru Bahasa Melayu Maluku Utara

⁹ Tapi ada babarapa orang yang tetap tara tarima yang Paulus ajar pa dorang, barang dorang pe hati karas. Karna itu, dorang mulai bicara tara bae tentang Yesus pe ajaran di orang banya pe muka. Jadi Paulus kase tinggal pa dorang, kong dia deng orang-orang yang percaya itu kaluar dari ruma ibada agama Yahudi, kong pigi di satu gedung yang biasa orang-orang pande pake untuk mangajar. Gedung itu, dia pe nama Tiranus. Di situ, Paulus mangajar kong badiskusi deng orang-orang yang datang di situ.

Kisah Para Rasul 19:9 ပူးပေါင်းရင်းမြစ်များ

Matius 15:14

Jadi ngoni kase biar saja pa orang Farisi itu. Karna dorang itu sama deng orang buta tunda orang buta. Kalu orang buta kase tunju jalang pa orang buta laeng, dua-dua pasti jatu di lobang.”

Matius 16:4

Ngoni orang-orang yang hidup skarang ini, ngoni jahat deng tara setia pa Tuhan! Ngoni minta Kita kase tunju mujizat satu la jadi bukti, Kita dari Tuhan Allah. Tapi Kita tara akan kase tunju mujizat apa-apa pa ngoni, kacuali Kita cuma kase inga pa ngoni mujizat yang perna jadi pa nabi Yunus dulu.” Abis bicara bagitu, Yesus deng Dia pe murit-murit kase tinggal pa dorang kong pigi dari situ.

Matius 26:55

Kong Yesus bilang pa orang banya yang datang mo tangka pa Dia, “Ngoni sangka Kita ini orang jahat, sampe ngoni datang bawa parang deng kayu panggal la mo tangka pa Kita? Padahal tiap hari Kita kase tau Tuhan Allah pe Kabar Bae di Ruma Ibada Pusat, tapi ngoni tara tangka pa Kita di situ.

Yohanes 12:40

“Tuhan so biking dorang pe mata buta, jadi dorang tara mo lia apa yang butul. Tuhan lagi so biking dorang pe hati karas, jadi dorang tara mo mangarti apa yang butul. Karna dorang memang so tara mau bertobat, jadi Kita tara mo kase slamat pa dorang.”

Kisah Para Rasul 11:26

Barnabas deng Saulus tinggal sama-sama deng jemaat di situ, dia pe lama satu taong. Di situ dorang mangajar tentang Yesus pa orang banya. Di Antiokhia itu suda, orang-orang yang jaga iko Yesus pe ajaran yang kakamuka dapa sebut, Kristen.

Kisah Para Rasul 14:4

Tapi orang banya di kota itu so tabage dua. Ada yang iko pa orang-orang Yahudi yang tara percaya, deng ada yang iko pa dorang dua itu.

Kisah Para Rasul 17:4

Pe dengar Paulus pe bicara, babarapa orang Yahudi itu jadi percaya pa Yesus. Bagitu lagi deng banya orang bukang Yahudi yang jaga baibada pa Tuhan Allah, termasuk parampuang-parampuang penting di kota itu, dorang samua percaya, kong langsung iko pa Paulus deng Silas.

Kisah Para Rasul 19:23

Waktu itu, ada kaco basar di kota Efesus, barang ada orang-orang yang tara suka deng ajaran tentang Yesus.

Kisah Para Rasul 19:30

Bagitu Paulus dapa dengar dia pe tamang dua orang dapa tangka, dia mau pigi di orang banya itu pe tenga-tenga la mo bicara bae-bae deng dorang, tapi orang-orang yang percaya pa Yesus di kota itu tara kase bae.

Kisah Para Rasul 20:31

Jadi, ngoni musti jaga bae-bae, deng jang lupa, selama tiga taong, siang deng malam kita tara berenti-berenti kase nasehat pa ngoni, sampe kita pe aer mata me malele.

Kisah Para Rasul 22:4

Kong dulu itu, waktu kita dapa tau ada orang-orang yang iko ajaran tentang Yesus, kita siksa pa dorang sampe ada yang mati. Laki-laki deng parampuang kita tangka kong kase maso di penjara.

Kisah Para Rasul 24:21

Atau mangkali dorang anggap kita sala, barang waktu kita ada di dorang pe muka, kita bilang deng suara yang kuat bagini, ‘Kita dapa urus skarang, barang kita yakin, Tuhan Allah mo kase hidup ulang pa orang-orang yang so mati.’ ”

Kisah Para Rasul 28:22

Jadi skarang, torang mo dengar sandiri dari ngana tentang aliran Nasrani, yang torang tau di mana-mana orang-orang tara suka.”

Kisah Para Rasul 7:51

Kong Stefanus bilang lagi pa pemimpin-pemimpin Yahudi itu bagini, “Ngoni ini memang kapala batu! Ngoni pe hati so sama deng orang yang tara kanal pa Tuhan Allah, kong ngoni tara mau dengar-dengaran pa Dia. Ngoni salalu malawang pa Roh Kudus, sama deng ngoni pe orang tua dulu-dulu.

Kisah Para Rasul 9:2

kong minta surat kuasa supaya dia bawa di ruma-ruma ibada agama Yahudi di kota Damsyik. Surat itu dia pake la mo tangka pa sapa saja yang iko Yesus pe ajaran, biar itu laki-laki atau parampuang. Dia pe maksut mo bawa pa dorang la dapa urus di Yerusalem.

Roma 11:7

Jadi bagini, orang-orang Israel, dorang cari jalang supaya dong jadi orang yang butul pa Tuhan Allah pe muka, tapi amper samua tara dapa. Ada yang dapa, tapi tara banya orang. Dorang itu yang Tuhan Allah so pili dari dulu. Tapi orang Israel yang laeng jadi kapala batu, dong tara mau dengar-dengaran pa Tuhan Allah.

Roma 9:18

Jadi sudara-sudara, kalu Tuhan Allah mo kase tunju Dia pe rasa sayang pa satu orang, itu tersera Dia. Deng kalu Dia mo biking orang jadi karas kapala, itu me tersera pa Dia.

1 Korintus 16:9

Barang di sini, Tuhan buka jalang pa kita untuk kase tau Kabar Bae. Itu kita pe karja yang basar deng penting, biar lagi di sini ada banya orang yang tantang pa kita.

1 Timotius 6:5

Orang yang jaga kase ajar ajaran sesat itu, dong pe hidup suka baku malawang, deng dorang itu tara tau apa yang butul, kong dong kira deng hidup iko Tuhan Allah pe mau, dong mo jadi kaya.

2 Timotius 1:15

Timotius, ngana tau, samua orang di daera Asia Kecil so kase tinggal pa kita, termasuk Figelus deng Hermogenes.

2 Timotius 3:5

Kalu mo lia, dorang itu hidup iko Tuhan Allah pe mau, padahal sebenarnya dorang tara mau Tuhan Allah pe kuasa tinggal di dong pe hati. Jadi dorang itu tara iko Tuhan Allah pe mau. Orang yang bagitu, jang badekat pa dorang!

2 Timotius 4:2

kase tau Tuhan Allah pe firman pa orang-orang. Ngana musti salalu siap kase tau firman itu di tiap waktu, biar orang mau dengar atau tarada. Kalu dorang biking sala, ngana togor pa dorang la dorang berenti. Turus ngana kase kuat dong pe hati la dong iko ajaran yang butul. Deng sementara ngana biking samua itu, ngana musti kase ajar bae-bae pa dorang deng sabar.

Ibrani 3:13

Tapi ngoni, tiap hari, selama masi ada kesempatan yang torang bilang “hari ini”, ngoni musti baku kase kuat ngoni pe hati untuk tamba percaya pa Yesus, supaya tara ada satu dari ngoni yang dapa tipu kong biking dosa sampe jadi tara dengar-dengaran lagi pa Tuhan Allah.

2 Petrus 2:12

Tapi guru-guru palsu itu bahina hal-hal yang dorang sandiri tara mangarti, dorang asal bicara saja, sama deng binatang yang tara akal, atau sama deng binatang yang lahir cuma untuk dapa tangka deng dapa bunu. Jadi, sama deng binatang liar dapa bunu dari manusia, bagitu lagi guru-guru palsu akan dapa hukum dari Tuhan Allah karna dong pe kalakuang yang jahat.

2 Petrus 2:2

Biar bagitu me, banya orang akan iko guru-guru palsu itu deng dong pe napsu yang tara bae. Jadi, karna guru-guru palsu itu, banya orang akan hina-hina Tuhan pe ajaran yang butul.

Yudas 1:10

Tapi orang-orang yang bawa ajaran tara butul itu, dorang bicara tara bae tentang samua ajaran yang dong tara mangarti. Dorang itu pe kalakuang sama deng binatang. Dorang itu tara bapikir, tapi iko saja apa yang dong pe badan pe mau. Itu yang nanti biking dong dapa hukuman tapisa deng Tuhan Allah slama-lamanya.