Kisah Para Rasul 18:5 - Perjanjian Baru Bahasa Melayu Maluku Utara

⁵ Waktu Silas deng Timotius so datang dari daera Makedonia, Paulus kase tau Tuhan Allah pe Kabar Bae siang deng malam. Dia bilang pa orang-orang Yahudi, Yesus itu Mesias suda, Raja yang Tuhan Allah janji, deng yang dorang ada tunggu-tunggu.

Kisah Para Rasul 18:5 ပူးပေါင်းရင်းမြစ်များ

Lukas 12:50

Tapi masi ada lagi sengsara yang akan Kita mo dapa, kong Kita pe hati tara tenang sebelum sengsara itu Kita dapa.

Lukas 16:28

Karna di sana masi ada lima kita pe sudara. Suru Lazarus ka sana bilang pa dorang la bertobat suda, supaya dorang me jang maso di tampa sengsara ini.’

Yohanes 1:41

Abis dari Yesus pe tampa tinggal, Andreas capat-capat pigi pa dia pe sudara Simon, kong dia bilang bagini pa dia, “Simon, torang so baku dapa deng Mesias, yang torang ada tunggu-tunggu itu, Dia itu Raja yang Tuhan Allah janji mo kase slamat pa manusia.”

Yohanes 10:24

Turus, pemimpin-pemimpin agama Yahudi, dong bakumpul pa Yesus, turus bilang, “Guru, so lama skali torang tunggu Guru mo kase tau pa torang, Guru ini sapa sebenarnya. Kalu memang Guru ini Mesias, Raja yang Tuhan Allah janji mo kase slamat pa manusia, bilang suda turus tarang pa torang.”

Yohanes 15:27

Kong ngoni ini lagi musti kase tau tentang Kita pa orang-orang, karna so dari dulu ngoni so sama-sama deng Kita.”

Yohanes 3:28

Ngoni sandiri so dengar apa yang kita bilang tuhari. Kita kase tau, kita ini bukang Mesias, Raja yang Tuhan Allah janji mo kase slamat pa manusia, tapi kita datang kamuka dari Dia untuk buka jalang supaya orang tarima pa Dia.

Kisah Para Rasul 10:42

Turus, Dia suru pa torang kase tau Kabar Bae tentang Dia pa orang-orang. Torang musti basaksi kase tau, Dia itu suda, Orang yang Tuhan Allah so pili untuk mo adili pa samua orang yang masi hidup deng pa orang yang so mati.

Kisah Para Rasul 15:22

Abis Yakobus bicara itu, Yesus pe utusan-utusan yang orang sebut rasul-rasul, deng penatua-penatua, sama-sama deng samua orang percaya di situ, ambe keputusan la mo utus babarapa orang dari dorang pigi di kota Antiokhia sama-sama deng Paulus deng Barnabas. Dorang pili pa Yudas yang orang jaga pangge Barsabas, deng pa Silas. Dorang dua itu, ada nama bae di orang-orang yang percaya.

Kisah Para Rasul 16:1

Paulus bajalang di kota Derbe, kong dia turus di kota Listra. Di situ, Paulus baku dapa deng satu orang yang pe nama Timotius, dia ini so percaya pa Yesus. Dia pe mama itu orang Yahudi yang so percaya pa Yesus Kristus, kong dia pe papa bukang orang Yahudi.

Kisah Para Rasul 16:12

Dari Neapolis torang tiga bajalang pigi di kota Filipi. Kota itu, satu kota yang penting di Makedonia, kong pemerinta Roma yang berkuasa di situ. Pe sampe di Filipi, torang tinggal babarapa hari.

Kisah Para Rasul 16:9

Dia pe malam itu, Paulus dapa penglihatan satu dari Tuhan Allah. Dia lia, ada satu orang dari daera Makedonia sementara badiri minta tolong pa dia. Orang itu bilang, “Datang kamari ka, la tolong pa torang orang Makedonia.”

Kisah Para Rasul 17:3

Paulus kase mangarti pa dorang Kitab Suci pe arti deng bilang, “Mesias, Raja yang Tuhan Allah janji itu, Kitab Suci bilang Dia musti dapa siksa, mati kong hidup ulang. Dia itu Yesus suda, yang kita jaga kase tau pa ngoni la ngoni percaya pa Dia.”

Kisah Para Rasul 18:28

Barang, di orang banya pe muka, Apolos barani baku ambe pendapat deng orang-orang Yahudi yang tara percaya pa Yesus. Dia kase tunju bukti dari Kitab Suci, Yesus itu Mesias suda, Raja yang Tuhan Allah janji mo kase slamat pa manusia.

Kisah Para Rasul 2:36

Tuhan Allah so bilang bagitu, jadi ngoni samua sudara-sudara orang Israel, ngoni musti tau butul-butul, Yesus yang ngoni perna salib itu, Dia itu suda Mesias, Raja yang Tuhan Allah janji mo kase slamat pa manusia, deng Dia itu me Tuhan.”

Kisah Para Rasul 20:21

Kita salalu kase inga deng karas pa orang-orang Yahudi deng pa orang-orang bukang Yahudi, supaya dorang bertobat kong iko pa Tuhan Allah deng percaya pa Tuhan Yesus, torang pe Tuhan.

Kisah Para Rasul 20:23

Tapi yang kita tau, di tiap-tiap kota yang kita so sampe, Roh Kudus salalu kase tau pa kita, kita mo dapa siksa deng mo dapa kase maso di penjara di Yerusalem.

Kisah Para Rasul 20:24

Biar bagitu, kita tara peduli deng kita pe hidup, tapi yang penting kita bisa kase selesai tugas yang Tuhan Yesus suru kita biking. Kita pe tugas itu, kita musti kase tau Kabar Bae tentang Tuhan Allah pe bae pa torang manusia.

Kisah Para Rasul 4:20

Barang, torang so lia deng dengar sandiri apa yang Yesus biking deng kase ajar, jadi mau tara mau torang musti kase tau samua itu pa orang-orang.”

Kisah Para Rasul 9:22

Tapi biar dorang bilang bagitu me, Saulus pe pengaru lebe tamba basar. Dia kase bukti pake Kitab Suci, Yesus itu butul-butul Mesias, Raja yang Tuhan Allah janji mo kase slamat pa manusia. Kong orang-orang Yahudi langsung tabadiam karna tara mampo malawang pa Saulus.

2 Korintus 1:19

Ngoni bole percaya kita pe bicara skarang ini, karna Yesus Kristus, Anak Allah yang kita, Silwanus deng Timotius ada kase tau pa ngoni, tetap biking apa yang Dia so bilang. Dia pantas torang percaya. Dia tara perna bilang “iyo” kong di Dia pe hati bilang “tarada”.

2 Korintus 11:9

Waktu kita ada sama-sama deng ngoni kong kita kekurangan, kita tara minta dari ngoni biar cuma dari satu orang saja. Karna untuk tutu kita pe kekurangan itu, sudara-sudara yang percaya yang datang dari daera Makedonia yang bantu pa kita. Jadi kita tara jadi beban pa ngoni, deng bagitu kita akan tetap kase tau Kabar Bae itu turus-turus deng cuma-cuma pa ngoni.

2 Korintus 5:14

Torang biking samua itu karna Yesus Kristus pe sayang ada pa torang samua. Barang torang tau, Yesus Kristus so mati karna torang samua pe dosa, kong karna itu, bole bilang torang ini sama deng orang yang so mati sama-sama deng Dia.

Filipi 1:23

Kita ini sama deng ada mangada dua pilihan. Kita suka mo kase tinggal dunia ini supaya bisa tinggal sama-sama deng Yesus Kristus di sorga, karna itu memang yang paling bae.

1 Tesalonika 3:2

turus Timotius torang pe sudara yang sama-sama percaya, torang utus pigi pa ngoni. Timotius itu torang pe tamang karja yang sama-sama kase tau Tuhan Allah pe Kabar Bae tentang Yesus Kristus. Torang utus pa Timotius la kase kuat ngoni pe hati deng kase smangat pa ngoni supaya ngoni lebe tamba percaya pa Yesus.

1 Tesalonika 3:6

Tapi skarang Timotius so bale dari ngoni di Tesalonika, kong dia kase tau kabar tentang ngoni yang biking torang sanang. Dia carita, ngoni tetap percaya pa Yesus deng baku sayang. Ngoni me inga pa torang deng rasa sanang. Kong ngoni suka mo baku dapa ulang deng torang, sama deng torang me suka baku dapa deng ngoni.

1 Petrus 5:12

Silwanus yang bantu pa kita tulis surat yang pende ini pa ngoni. Silwanus ini kita pe sudara yang percaya yang bisa kita percaya. Surat ini kita tulis untuk kase smangat pa ngoni supaya ngoni tetap percaya, deng untuk kase yakin pa ngoni tentang Tuhan Allah pe bae yang Dia salalu kase pa ngoni biar ngoni sementara dapa siksa. Ngoni musti tetap yakin Tuhan Allah pe bae itu, karna itu butul.