Kisah Para Rasul 16:1 - Perjanjian Baru Bahasa Melayu Maluku Utara

¹ Paulus bajalang di kota Derbe, kong dia turus di kota Listra. Di situ, Paulus baku dapa deng satu orang yang pe nama Timotius, dia ini so percaya pa Yesus. Dia pe mama itu orang Yahudi yang so percaya pa Yesus Kristus, kong dia pe papa bukang orang Yahudi.

Kisah Para Rasul 16:1 ပူးပေါင်းရင်းမြစ်များ

Kisah Para Rasul 14:1

Waktu Paulus deng Barnabas di kota Ikonium, dorang maso di ruma ibada agama Yahudi sama deng dorang jaga biking di daera laeng. Di situ dorang deng barani kase tau tentang Tuhan Allah pe Kabar Bae sampe banya orang Yahudi deng orang-orang yang bukang Yahudi jadi percaya pa Yesus.

Kisah Para Rasul 14:21

Di Derbe, Paulus deng Barnabas kase tau Kabar Bae tentang Yesus Kristus sampe banya orang jadi percaya. Abis itu, dorang dua bale di kota Listra, turus di kota Ikonium deng di kota Antiokhia di daera Pisidia.

Kisah Para Rasul 14:6

Tapi Paulus deng Barnabas dapa tau rencana jahat itu. Karna itu, dorang dua pigi manyingkir di daera Likaonia. Di situ dorang pigi di kota Listra deng di kota Derbe, deng di tampa-tampa laeng di daera itu.

Kisah Para Rasul 17:14

Karna itu, orang-orang percaya di Berea capat-capat antar pa Paulus di pante. Tapi Silas deng Timotius masi tinggal di Berea.

Kisah Para Rasul 18:5

Waktu Silas deng Timotius so datang dari daera Makedonia, Paulus kase tau Tuhan Allah pe Kabar Bae siang deng malam. Dia bilang pa orang-orang Yahudi, Yesus itu Mesias suda, Raja yang Tuhan Allah janji, deng yang dorang ada tunggu-tunggu.

Kisah Para Rasul 19:22

Abis Paulus bilang bagitu, turus dia suru pa dia pe tamang dua orang yang jaga bantu pa dia, pigi kamuka di daera Makedonia. Dorang dua itu, Timotius deng Erastus. Waktu dong pi kamuka, Paulus tinggal sadiki lama di daera Asia Kecil.

Roma 16:21

Timotius kita pe tamang karja, ada kirim salam pa ngoni. Deng ada salam dari Lukius, Yason deng Sosipater, kita pe tamang-tamang yang sama-sama orang Yahudi.

1 Korintus 16:10

Kalu Timotius datang pa ngoni, ngoni tarima bae-bae pa dia supaya dia rasa tenang deng tara tako waktu sama-sama deng ngoni. Karna dia me ada biking karja yang Tuhan suru, sama deng yang kita biking.

1 Korintus 4:17

Itu suda yang biking sampe kita utus Timotius pa ngoni, la dia kase inga ulang pa ngoni, bagimana kita pe cara hidup yang iko pa Kristus Yesus. Cara hidup itu yang kita so kase ajar pa samua jemaat di samua tampa yang kita pigi. Timotius itu kita so anggap kita pe ana. Dia kita sayang, deng dia lagi setia pa Tuhan.

1 Korintus 7:14

Karna ngoni yang percaya pa Tuhan Yesus, biar ngoni pe bini atau laki tara percaya, ngoni pe perkawinan Tuhan tarima karna ngoni laki bini so jadi satu. Kalu tara bagitu, ngoni pe ana-ana akan jadi sama deng ana-ana haram, tapi skarang Tuhan so tarima pa dorang jadi Dia pe umat sandiri.

2 Korintus 1:1

Sudara-sudara Tuhan Allah pe jemaat yang ada di kota Korintus, deng ngoni samua orang yang so jadi Tuhan Allah pe umat yang ada di seluru daera Akhaya. Salam dari kita Paulus, deng dari Timotius, torang pe sudara yang percaya. Kita ini Kristus Yesus pe utusan yang orang sebut rasul. Kita jadi rasul, itu karna Tuhan Allah pe mau.

2 Korintus 1:19

Ngoni bole percaya kita pe bicara skarang ini, karna Yesus Kristus, Anak Allah yang kita, Silwanus deng Timotius ada kase tau pa ngoni, tetap biking apa yang Dia so bilang. Dia pantas torang percaya. Dia tara perna bilang “iyo” kong di Dia pe hati bilang “tarada”.

Filipi 1:1

Sudara-sudara yang so jadi Tuhan Allah pe umat di kota Filipi, deng ngoni yang pimpin jemaat, deng diaken-diaken. Salam dari kita Paulus deng Timotius. Torang dua ini yang jaga biking apa yang Kristus Yesus suru.

Filipi 2:19

Kita baharap pa Tuhan Yesus, so tara lama lagi kita bole suru Timotius pigi lia pa ngoni. Deng bagitu, waktu dia bale pa kita, kita bisa tau ngoni pe kabar dari dia la kita pe hati jadi sanang.

Kolose 1:1

Surat ini dari kita Paulus. Kita ini Kristus Yesus pe utusan yang orang sebut rasul. Kita jadi rasul, itu karna Tuhan Allah pe mau. Surat ini me dari torang pe sudara Timotius yang sama-sama percaya pa Kristus Yesus.

1 Tesalonika 1:1

Sudara-sudara jemaat di kota Tesalonika yang so percaya pa Tuhan Allah, torang pe Bapa, deng pa Tuhan Yesus Kristus. Salam dari kita Paulus, deng kita pe tamang-tamang Silwanus deng Timotius. Torang minta pa Tuhan Allah supaya Dia kase Dia pe bae pa ngoni, deng Dia salalu biking ngoni pe hati tetap tenang.

1 Tesalonika 3:2

turus Timotius torang pe sudara yang sama-sama percaya, torang utus pigi pa ngoni. Timotius itu torang pe tamang karja yang sama-sama kase tau Tuhan Allah pe Kabar Bae tentang Yesus Kristus. Torang utus pa Timotius la kase kuat ngoni pe hati deng kase smangat pa ngoni supaya ngoni lebe tamba percaya pa Yesus.

1 Tesalonika 3:6

Tapi skarang Timotius so bale dari ngoni di Tesalonika, kong dia kase tau kabar tentang ngoni yang biking torang sanang. Dia carita, ngoni tetap percaya pa Yesus deng baku sayang. Ngoni me inga pa torang deng rasa sanang. Kong ngoni suka mo baku dapa ulang deng torang, sama deng torang me suka baku dapa deng ngoni.

2 Tesalonika 1:1

Sudara-sudara jemaat di kota Tesalonika yang percaya pa Tuhan Allah, torang pe Bapa, deng pa Tuhan Yesus Kristus. Salam dari kita Paulus, deng kita pe tamang-tamang Silwanus deng Timotius.

1 Timotius 1:18

Timotius, kita so anggap ngana itu sama deng kita pe ana sandiri! Kita suru ngana iko tugas yang kita so bilang ini. Tugas ini sama deng yang Tuhan Allah so kase pa ngana, yang Dia pe utusan kase tau pa ngana dulu. Jadi biking butul-butul ngana pe tugas ini sama deng satu tentara yang lawan pa orang yang serang dia pe daera. Kong supaya ngana biking tugas itu bae-bae, ngana musti percaya kuat Tuhan pe ajaran yang torang so kase tau pa ngana, turus apa yang ngana biking, ngana pe hati musti tau itu butul.

1 Timotius 1:2

Timotius, torang dua sama-sama percaya jadi kita so anggap ngana itu sama deng kita pe ana sandiri. Kita minta pa Tuhan Allah torang pe Bapa, deng pa Kristus Yesus torang pe Tuhan, supaya kase yang bae pa ngana, sayang pa ngana, deng salalu biking ngana pe hati tetap tenang.

2 Timotius 1:2

Timotius, kita sayang pa ngana sama deng kita pe ana sandiri. Kita minta pa Tuhan Allah, torang pe Bapa, deng pa Kristus Yesus, torang pe Tuhan, supaya kase yang bae pa ngana, sayang pa ngana, deng salalu biking ngana pe hati tetap tenang.

2 Timotius 1:5

Kita inga deng yakin, ngana itu sunggu-sunggu percaya pa Tuhan Yesus, sama deng ngana pe nene Lois deng mama Eunike yang so percaya pa Yesus kamuka.

2 Timotius 3:11

Ngana tau bagimana orang-orang siksa pa kita di kota Antiokhia, kota Ikonium deng kota Listra sampe kita menderita skali. Tapi Tuhan kase lapas pa kita dari siksa itu samua.

Filemon 1:1

Filemon, torang pe tamang satu karja yang kita sayang! Salam dari kita Paulus. Kita kirim surat ini dari dalam penjara. Kita di sini gara-gara kita ada kase tau Kabar Bae tentang Kristus Yesus pa orang-orang. Kita deng Timotius, torang pe sudara yang sama-sama percaya, yang ada tulis surat ini pa ngana, Filemon.

Ibrani 13:23

Kita mau ngoni tau, Timotius torang pe sudara yang percaya itu so bebas dari penjara. Jadi kalu dia so datang pa kita, torang mo sama-sama ka sana pigi pa ngoni.