Kisah Para Rasul 10:22 - Perjanjian Baru Bahasa Melayu Maluku Utara

²² Dorang bilang pa dia, “Bagini, bapa. Torang pe komandan kompi bapa Kornelius, suru torang datang kamari. Dia hidup butul pa Tuhan Allah pe muka deng jaga semba pa Tuhan Allah. Kong samua orang Yahudi bilang dia itu orang bae-bae. Kong baru saja, Tuhan Allah pe malaekat kudus suru pa dia la undang pa bapa pigi pa dia pe ruma, supaya dia bole dengar apa yang bapa bilang.”

Kisah Para Rasul 10:22 ပူးပေါင်းရင်းမြစ်များ

Matius 1:19

Yusuf ini orang yang hidup butul pa Tuhan Allah pe muka. Waktu dia tau Maria hamil, dia barencana dalam hati mo kase tinggal pa Maria deng babadiam. Barang, dia tara mau biking malu pa Maria di orang banya pe muka.

Matius 2:12

Abis itu, Tuhan Allah kase mimpi pa orang-orang yang pintar lia bintang itu. Tuhan Allah bilang pa dorang supaya jang bale ulang pa raja Herodes. Jadi, dorang pulang pa dong pe daera iko jalang laeng.

Markus 6:20

barang raja suru tentara jaga bae-bae pa Yohanes di penjara. Raja Herodes tako pa Yohanes, karna dia tau, Yohanes itu orang yang hidup butul deng hati bersi pa Tuhan Allah pe muka. Karna itu, dia tahang pa Yohanes. Biar raja pe hati tara sanang, tapi tiap kali dia dengar Yohanes bicara, dia suka dengar.

Markus 8:38

Orang-orang yang hidup skarang ini tara setia iko pa Tuhan Allah. Dorang lebe suka biking dosa. Kalu ada orang yang iko pa Kita deng Kita pe ajaran kong malu pa dorang itu, nanti Kita Anak Manusia me malu mo bilang, Kita kanal pa orang itu waktu Kita datang ulang deng Kita pe Bapa pe kuasa yang luar biasa, sama-sama deng malaekat-malaekat yang kudus.”

Lukas 2:25

Waktu itu di Yerusalem, ada satu orang dia pe nama Simeon. Dia itu hidup butul pa Tuhan Allah pe muka deng dia dengar-dengaran pa Tuhan Allah. Deng dia ada tunggu waktu yang nanti Tuhan Allah mo kase slamat pa bangsa Israel. Kong Roh Kudus salalu sama-sama deng dia.

Lukas 23:50

Ada satu orang dia pe nama Yusuf. Dia itu anggota agama Yahudi pe kumpulan yang paling tinggi yang pe nama Mahkama Agama. Dia itu orang bae-bae deng hidup butul pa Tuhan Allah pe muka.

Lukas 9:26

Karna sapa yang malu mangaku dia iko pa Kita deng iko Kita pe ajaran, nanti waktu Kita Anak Manusia datang ulang, Kita me akan malu mangaku dia iko pa Kita. Waktu itu Kita datang deng Kita pe kuasa yang luar biasa deng Kita pe Bapa pe kuasa yang luar biasa deng malaekat-malaekat yang kudus.

Yohanes 13:20

Inga bae-bae yang Kita bilang ini. Sapa saja yang tarima pa orang-orang yang Kita utus, itu berarti dia so tarima lagi pa Kita. Kong sapa saja yang tarima pa Kita, itu berarti orang itu so tarima pa Bapa yang utus pa Kita.

Yohanes 17:20

Yesus masi turus berdoa, Dia bilang, “Bapa, Kita berdoa bukang cuma untuk dorang ini yang so percaya pa Kita saja, tapi Kita berdoa lagi untuk orang-orang yang akan jadi percaya pa Kita karna dorang dengar ajaran tentang Kita, yang orang percaya ada kase ajar.

Yohanes 17:8

Barang, samua yang Bapa so bilang pa Kita, Kita so kase tau pa dorang, kong dorang percaya. Dorang butul-butul tau, Kita ini datang dari Bapa, kong dorang percaya, Bapa yang utus pa Kita.

Yohanes 5:24

Inga bae-bae yang Kita bilang ini. Sapa saja yang dengar apa yang Kita bilang deng percaya pa Tuhan Allah yang utus pa Kita, dia itu akan dapa hidup deng Tuhan Allah slama-lamanya. Dia so tara dapa hukuman tapisa deng Tuhan Allah tapi dia so talapas dari hukuman itu, kong so dapa hidup deng Tuhan Allah slama-lamanya.

Yohanes 6:63

Manusia tara mungkin mo dapa hidup deng Tuhan Allah slama-lamanya pake dia pe usaha sandiri, cuma Roh Kudus yang bole biking manusia hidup deng Tuhan Allah slama-lamanya. Samua kata-kata yang Kita bilang pa ngoni, pe asal dari Roh Kudus, kong kata-kata itu lagi yang kase hidup deng Tuhan Allah slama-lamanya.

Yohanes 6:68

Tapi Simon Petrus bilang pa Dia, “Guru, torang mo pigi pa sapa lagi? Cuma Guru pe ajaran yang kase tau bagimana torang bole dapa hidup deng Tuhan Allah slama-lamanya.

Kisah Para Rasul 10:2

Dia ini rajin iko Tuhan Allah pe mau. Dia deng dia pe keluarga jaga semba pa Tuhan Allah. Dia jaga bantu pa orang-orang Yahudi yang susa deng dia me rajin berdoa pa Tuhan Allah.

Kisah Para Rasul 10:21

Turus Petrus turung ka bawa. Bagitu Petrus baku dapa deng dorang tiga, dia bilang pa dorang, “Kita ini Petrus yang ngoni cari. Ngoni perlu apa deng kita?”

Kisah Para Rasul 10:30

Kornelius bilang pa dia, “Ampa hari lalu, kira-kira sama deng skarang ini jam tiga sore, kita ada berdoa di kita pe ruma. Kage-kage ada satu orang badiri pa kita pe muka. Orang itu pe baju bacahaya skali.

Kisah Para Rasul 10:33

Jadi, kita langsung suru pa dorang pigi ambe pa bapa, kong pe untung skali bapa mau datang kamari. Skarang torang samua so ada di sini, pa Tuhan Allah pe muka. Torang mo dengar samua yang Tuhan Allah suru bapa bilang pa torang.”

Kisah Para Rasul 10:6

Skarang dia tinggal pa satu orang pe ruma, dia itu me pe nama Simon. Dia pe ruma di pinggir pante, kong dia pe karja tukang kase bersi binatang pe kuli.”

Kisah Para Rasul 11:14

Dia yang mo kase tau Tuhan Allah pe Kabar Bae pa ngana. Kabar Bae itu yang mo kase slamat pa ngana deng ngana pe keluarga samua.’

Kisah Para Rasul 22:12

Di Damsyik, ada satu orang yang pe nama Ananias. Dia rajin iko aturan-aturan di lima kitab Musa. Samua orang Yahudi yang ada di situ tau dia itu orang bae-bae.

Kisah Para Rasul 24:15

Kong kita lagi sama deng dorang, kita percaya deng yakin pa Tuhan Allah, nanti samua orang yang so mati mo hidup ulang, biar dia itu orang yang hidup butul pa Tuhan Allah pe muka, deng yang tara hidup butul pa Tuhan Allah pe muka.

Kisah Para Rasul 6:3

Jadi bagini sudara-sudara, lebe bae ngoni pili tuju orang dari ngoni. Dorang itu musti orang yang bae-bae, yang Roh Kudus kuasai pa dorang, deng dorang bijaksana untuk kase selesai masala. Orang-orang itu yang nanti torang kase tugas untuk urus orang miskin pe makang deng minum,

Roma 1:17

Kabar Bae itu ada kuasa dari Tuhan Allah, karna Kabar Bae itu kase tau bagimana supaya torang bole jadi orang yang tara sala pa Tuhan Allah pe muka. Dia pe cara, torang musti percaya pa Tuhan Allah, tarada cara laeng. Itu sama deng yang so tatulis di Kitab Suci bagini, “Orang yang percaya pa Tuhan, dia itu yang Tuhan biking jadi orang yang tara sala pa Tuhan pe muka, kong dia yang mo hidup deng Tuhan Allah slama-lamanya.”

2 Korintus 5:18

Samua itu, Tuhan Allah yang biking. Jadi waktu Yesus Kristus mati di kayu salib, Dia kase bae-bae ulang torang manusia pe hubungan deng Tuhan Allah. Kong Dia lagi yang kase percaya pa torang untuk bantu pa orang-orang la dorang jadi percaya pa Dia supaya dorang me pe hubungan deng Tuhan Allah jadi bae-bae ulang.

1 Timotius 3:7

Orang yang pimpin jemaat musti punya nama bae di luar jemaat, supaya jang ada orang yang mo carita busu tentang dia, deng dia tara gampang tagoda iko Iblis pe mau.

Ibrani 10:38

Tapi Kita pe umat yang hidup butul pa Tuhan Allah pe muka, dorang itu hidup cuma bagantong deng dorang pe percaya pa Kita. Tapi kalu ada dari dorang yang so tara mau percaya lagi, Kita tara akan sanang deng dia.”

Ibrani 11:2

Barang, torang orang Israel pe orang tua dulu-dulu pe percaya macam bagitu. Itu yang biking sampe Tuhan Allah sanang deng dorang.

Ibrani 12:23

Di sana ngoni me baku dapa deng orang-orang yang percaya pa Tuhan Allah yang ada bakumpul, dorang itu Dia sebut Dia pe ana-ana yang tua, dorang itu pe nama-nama so tatulis di sorga. Di sana ngoni me baku dapa deng Tuhan Allah, Dia yang mo adili pa samua orang. Ngoni me baku dapa deng orang-orang yang so mati kamuka, yang waktu dong masi hidup, dong jaga biking yang butul pa Tuhan Allah pe muka, kong dorang itu Tuhan Allah so biking dorang jadi sempurna.

2 Petrus 3:2

Ngoni musti inga Tuhan Allah pe pasáng yang dulu Dia pe nabi-nabi so perna kase tau. Ngoni me musti inga parenta dari torang pe Tuhan Yesus yang kase slamat pa torang. Parenta itu, Yesus pe utusan-utusan yang orang sebut rasul ada kase tau pa ngoni.

3 Yohanes 1:12

Lia pa Demetrius! Samua orang deng kita me puji pa dia. Dia pantas dapa puji karna apa yang dia biking iko Tuhan pe ajaran. Kong ngoni tau, apa yang torang kase tau tentang dia itu butul. Torang tara bafoya.

Wahyu 14:10

Tuhan Allah mara skali kong mo hukum pa dorang. Hukuman itu sama deng dorang mo minum anggur pait yang tara campur deng apa-apa. Tuhan Allah mo buang pa dorang di api deng di belerang kong malaekat-malaekat yang kudus deng Anak Domba lia pa dorang dari atas.